Большасць замежнікаў, якія купляюць кватэры ў Гродне — рускамоўныя. Яны выбіраюць вялікія кватэры ў цэнтры або шукаюць дамы на беразе возера. Беларусь яны называюць бяспечнай краінай, дзе «парадку больш». Якое жыллё купляюць замежнікі ў Гродне распавёў для Hrodna.life дырэктар ТАА «Крама нерухомасці» Уладзімір Пыльскі.

Увесну 2022 года рэальнымі і патэнцыйнымі пакупнікамі ў агенцтве сталі жыхары Расіі, Казахстана, Польшчы, ЗША, Ізраіля, Германіі, Швецыі, Латвіі. Пры гэтым у агульнай колькасці ўсіх продажаў працэнт замежных пакупнікоў застаецца невялікім.

«Для пераезду на пастаяннае месца жыхарства нерухомасць купляюць расіяне і казахстанцы», — адзначае Уладзімір Пыльскі. У прыклад ён прыводзіць дваіх пакупнікоў з Масквы: адзін з іх купіў кватэру плошчай 100 кв. м, другі - катэдж. Пераезд з сям’ёй у Гродна звычайна матывуюць тым, што ў Беларусі нашмат спакайней на вуліцах. «Не баімся дзяцей адных на вуліцу адпускаць, вечарам, ноччу можам спакойна гуляць і ніхто на нас не нападае. Парадку больш», — цытуе Пыльскі сваіх кліентаў.

Замежнікі родам з Гродна

Без пераезду на сталое месца жыхарства купляюць кватэры тыя, у каго ёсць тут сваякі або тыя, у каго ў Гродне прайшло дзяцінства. Ёсць і тыя, хто купляе кватэры для інвестыцый. Былі і расіяне, якія прадалі кватэру сёлета, бо не бачаць магчымасці зарабіць у Беларусі.

«Часцей за ўсё замежныя пакупнікі - гэта выхадцы з Гродна. Самі, або іх бацькі, дзядулі, бабулі», — кажа Пыльскі. 95% пакупнікоў - рускамоўныя, старэйшыя за 40, сямейныя.

Дызайнерскія кватэры ў цэнтры і закінутыя хаты ў вёсцы

«Лідар сярод пакупак — вялікія дызайнерскія кватэры ў цэнтры Гродна. На другім месцы — прыватныя дамы на беразе возера, вадасховішча, а таксама катэджы ў прыгарадзе», — распавядае рыэлтар.

Чытайце таксама: Ад $ 300 000 да $ 700 000. Як выглядаюць самыя дарагія катэджы, якія прадаюцца ў Гродне

Расіяне таксама цікавяцца закінутымі дамамі ў вёсках Гродзенскага раёна. Сёлета ў Гродзенскі райвыканкам паступіла тры звароты ад грамадзян Расійскай Федэрацыі, якія цікавіліся купляй пустуючага дома ў прыгарадзе. Інфармацыю аб такіх дамах і аўкцыёнах па іх размяшчаюць на сайце райвыканкама.

З пачатку года квадратны метр падаражэў на $ 60

За пяць месяцаў 2022 года на другасным рынку ў Гродне прададзена 706 кватэр, распавёў Уладзімір Пыльскі. З іх — 115 кватэр у студзені, 116 — у лютым, 170 — у сакавіку, 223 кватэры — у красавіку (абсалютны рэкорд за многія гады), і 82 кватэры за 19 дзён у траўні. Палова прададзеных кватэр — двухпакаёвыя. Меншым попытам карыстаюцца чатырохпакаёвыя кватэры.

цены на недвижимость в Гродно, квартиры и дома

«У красавіку па колькасці ўгодаў у „Краме нерухомасці“ ўсталявалі рэкорд за пяцігадовую гісторыю кампаніі», — распавядае рыэлтар. Ён прыводзіць некалькі прыкладаў: аднапакаёвыя кватэры прадавалі ад $ 20 700 да $ 32 500, двухпакаёвыя — ад $ 24 700 да $ 37 000, трохпакаёвыя ад $ 38 900 да $ 63 000. Уладзімір адзначыў, што з пачатку 2022 года сярэдняя цана за квадратны метр павялічылася з $ 629 да $ 693.