У Гродне хапае сваіх жахаў, якія могуць стаць выдатнай падставай для строю на Хэлоўін. І не важна, што вы можаце не святкаваць гэтае нетрадыцыйнае для Беларусі свята: проста прагартайце старонку ніжэй, каб пабачыць нашу дызайнерку ў касцюме тэсту на цяжарнасць або Руслана Кулевіча ў ласінах і з баянам.

Мы падрыхтавалі пяць хэлоўінскіх касцюмаў: тры з іх датычаць актуальных гродзенскіх тэмаў, пра якія мы пісалі сёлета, яшчэ два гэта строі на вечныя тэмы, якія жахалі і будуць жахаць слабых нервамі людзей.

Сметніца-джэнтльмен

Сон розуму нараджае кашмары, так? Калі ў горадзе зусім бяда з малой архітэктурай, то і не дзіва, што турыстаў спрабуюць заманьваць арыгінальнымі сметніцамі. Праўда, у канструкцыі, відаць, быў ад пачатку нейкі хіб, бо вельмі часта «джэнтльмены» валяцца ад колькасці напханага ў іх смецця.

У вобраз сметніцы пераўвасобіўся наш галоўны рэдактар Аляксей Шота.

Баяністка Лена

Персанаж, які на вуліцы Савецкай мучае акардэон і вушы мінакоў. За апошнія чатыры гады жанчына стала хіба самым пазнавальным вулічным музыкам у горадзе — і хіба самым спрэчным. Гэтым летам гродзенцы нават паскардзіліся на непрафесійных музыкаў, што ганьбяць горад сваімі выступамі. Але баяністку так проста не пераможаш. Яна ўсё яшчэ на Савецкай.

Стыль баяністкі Лены паўтарыў наш Руслан Кулевіч.

Драўляны турыст

Скульптура-плагіят, няўдалая копія скульптуры з Іркуцка, з’явілася на хвалі святкавання юбілею горада і агульнага захаплення поспехамі бязвізу.

Самае страшнае, што людзі на фоне гэтага трэшу фоткаюцца!

У драўлянага істукана апрануўся Уладзімір Аплевіч.

Тэст на цяжарнасць з двума рыскамі

Начны кашмар галоўнага рэдактара. Нараджэнне дзіцяці, дэкрэтны адпачынак або проста адсутнасць вольных месцаў у дзіцячых садках ужо пазбавілі рэдакцыю пары таленавітых журналістак. Не хапала, каб яшчэ і дызайнерка Воля Новік па іх слядах пайшла!

Квітанцыя за камуналку

Жыроўкі — гэта як страшная істота Мора ў кнігах пра Мумі-троляў. Квітанцыя таксама можа прымусіць пахаладзець пальцы, якія яе трымаюць, ды прынясе з сабой маркоту і адчай. Паглядзіш на свежую квітанцыю — і ў душы быццам вечны лістапад.

Не дзіва, што мы абралі на гэтую ролю Алену Кавальчук — для маладога спецыяліста толькі пасля ўніверу кожная капейчына важная!

Як яшчэ апрануцца на Хэлоўін?

Гэтыя касцюмы — не адзіныя, якія прыйшлі нам на думку на апошняй планёрцы. Даволі жахлівы можа быць касцюм «рэканструктара Старога замку». Многіх напужае строй «касільшчыка ў 6 раніцы». Строй «чорнага» — польскага мытніка — паскорыць пульс не аднаго гродзенца з шэнгенам у кішэні.

А якія гродзенскія «страшныя» строі на Хэлоўін можаце прыдумаць вы? Пішыце ў каментарыях!


Уже несколько лет шеллак находится в топе самых популярных нейл-процедур. Он более щадящий для ваших ногтей и не требует спиливания топа. Приобрести шеллак можно здесь. Широкий выбор шеллаков по доступной стоимости.


Перадрук матэрыялаў Hrodna.life магчымая толькі з пісьмовага дазволу рэдакцыі. Кантакт info@hrodna.life