У ноч з 29 на 30 кастрычніка гарадскія бары пагрузіліся ў містычную атмасферу гарбузоў, свечак і зданяў з прасціны. Карэспандэнты Hrodna.life распыталі ўдзельнікаў свята аб іх строях і настроі.
“Хтосьці заходзіў у рожках”
У бары “Мендзялееў” наведвальнікаў сустракаюць супрацоўнікі ў грыме, зробленым на хуткую руку – усяго за 20 хвілін. Барвумэн на імя Аляска кажа, што пакуль госці прыходзяць у паўсядзённым адзенні. Але вечар толькі пачаўся, а пік наведвальнасці прыпадае на гадзіну ночы – усё яшчэ можа змяніцца.
“Праца ідзе, заказы ляцяць. Краем вока бачыла, што хтосьци заходзіў з рожкамі на галаве”.
У рестабары “Пабла” і бары “Лондан” пануе спакойная атмасфера. Усе наведнікі ў звычайным адзенні, аднак бары ўпрыгожаны грунтоўна. Супрацоўнікі “Пабла” кажуць, што павуцінне куплялі да свята, а свечкі ў бутэльках і так стаяць у іх у звычайныя дні як частка інтэр’еру.
Бармэн Эдгар з бара “Лондан” адзначае, што госці прыходзяць у паўсядзённым адзенні і асаблівага наплыву няма.
“Магу толькі сказаць, што ў цэлым наведвальнікаў стала менш. Таму сёння напаўняльнасць бара як і ў звычайны дзень”.
Чытайце таксама: Гарбузовы суп, гарбузовы латэ і сырнікі з гарбузовым соусам. Якія сезонныя прапановы ёсць ва ўстановах Гродна
“На мне цяпер каля тысячы рублёў”
У бары ” Сон ” – вечар герояў кіно. Нямала гасцей у грыме і касцюмах. Дар’і Петруль 26 гадоў, яна абрала вобраз Лідзіі Дытц з фільма “Бітлджус”.
“Мне падабаецца кінарэжысэр Цім Бертан, – кажа Дар’я, – таму фільм я выбрала адпаведны. Сукенка ўжо была, вэлюм зрабіла сама. На прадумванне і стварэнне вобразу выдаткавала прыкладна суткі”.
Дзяўчыне падабаецца ствараць незвычайныя вобразы і антураж. Акрамя касцюма яна збіралася спячы на Хэлоўін асаблівае тэматычнае печыва.
Дар’я кажа, што выходзіць у горад на свята Хэлоўіна практычна кожны год. Ёй здалося, што сёлета месцаў з тэматычнымі праграмамі было менш, чым звычайна.
Чытайце таксама: «Обычная пьянка, но в костюмах». Что гродненцы думают о Хэллоуине
У Валянціны ў вобразе жудаснага Чырвонага Капялюшыка іншае меркаванне. Ёй 26 гадоў і яна таксама кожны год у дні Хэлоўіна ходзіць па ўстановах. Летась усё здавалася больш “тухлым”, лічыць Валянціна, а сёння атмасферай і вобразамі яна задаволеная. Да гэтага з кампаніяй яны заходзілі ў кафэ “AvaCava” і там у касцюмах былі толькі яны. Магчыма, прыйшлі занадта рана, адзначыла Валянціна.
Сякера Валянціны зроблена з пенаплексу. “Гэта прамысловы ўцяпляльнік. Ён мяккі і з яго лёгка нешта выразаць і адшліфаваць. Рана на твары зроблена на аснове сілікону. У мяне яшчэ з мінулага года сілікон застаўся, яго і нанесла. А можна проста зварыць жэлацін і гліцэрын разам і наносіць».
Андрэй прыйшоў у “Сон” з кампаніяй, якая захапляецца “Sketch Day”. Гэта мастакі, якія займаюцца маляваннем з натуры і не толькі. Для свайго вобраза ён абраў персанажа Уладзіслава Тыка з фільма «Рэальныя вупыры».
“Гэта свайго роду камедыя і жахі ў адным фільме. Вампіры там смешныя і чалавечныя. Мне гэта спадабалася. Касцюм я сам не рабіў. Усё купіў, на мне цяпер каля тысячы рублёў».
Чытайце таксама: С весельем, призами и скидками. Как отметить Хэллоуин в Гродно
“Натхнялася сітуацыяй у свеце”
Калі ў іншых ўстановах адзначаць Дзень усіх святых пачыналі прыкладна з 21.00, то ў бары “Мята” свята пачыналася ў 23.00. Вядоўца Ірына распавяла, што ў “Мяте” усіх гасцей у хэллоўінскіх вобразах чакае камплімент – шот “Крывавая Мэры”.
Казаць пра колькасць людзей менавіта на Дзень усіх святых складана, адзначае Ірына. “Ёсць дыскатэка і танцы. За кошт гэтага людзі пастаянна прыходзяць і сыходзяць”. Наведвальнасць залежыць хутчэй не ад канкрэтнага свята, а ад вядоўцы і дыджэяў у пэўны вечар, лічыць Ірына.
Таццяна Будрыца і Марыя Карповіч прыйшлі сюды, бо даведаліся пра праграму з дыджэем. Яны былі тут у мінулыя выхадныя і ім усё спадабалася.
Свой вобраз Таццяна прадумвала грунтоўна: тыдзень праглядала варыянты макіяжу і касцюмы. Збірацца пачала каля сямі вечара. “Люблю ўсё бліскучае і прыгожае. Старалася зрабіць так, каб вобраз выглядаў святочна”.
Марыя падышла да свайго вобразу інакш. Яна натхнялася сітуацыяй у свеце. Свой касцюм яна называе супрацьрадыяцыйным. Рэчы для яго яна пазычыла ў сябра. “Выкажам здагадку, што такое адбылося, і уяві, што з’явіліся зомбі. Таму сёння я – зомбі вось у такім строі”.
Чытайце таксама: Эльфийка или женщина-змея? Кем нарядиться на Хэллоуин, если нечисть уже надоела
“Падводкі скончыліся, а белы грым змяшалі з танальнікам”
Па вуліцы Савецкай людзей у грыме спяшаюцца на свята, але іх не вельмі шмат.
16-гадовая Ганна з сяброўкай упершыню выйшлі ў вобразах на вуліцу. Над макіяжам яны працавалі каля дзвюх гадзін. Выкарыстоўвалі белы грым, змешвалі яго з танальным крэмам і пудрай. У працэсе ў іх скончылася падводка для вачэй, а для вуснаў яны купілі чорную памаду.
У трэндах гэтага года відавочна ўпрыгожванне інтэр’ераў павуціннем. Бары і кафэ ў асноўным закупілі такі дэкор. Некаторым установам пашанцавала: павучкі звонку ўпрыгожылі іх бясплатна.
Чытайце таксама: В Гродно отменили вечеринку и убрали декорации к Хэллоуину — пожаловалась провластная активистка
