Музейны пакой, прысвечаны рукатворным лялькам, адкрыецца 22 снежня ў бібліятэцы №3. Да наваселля майстрыхі сабралі ў экпазіцыі некалькі дзясяткаў лялек. Палімерная гліна, грунтаваны тэкстыль, тканіна, салома – натхненне можа ператварыць любы матэрыял у ляльку, а “сур’ёзную” бібліятэку ў “бібліятэку сямейнага тыпу”. Пакуль выстава рыхтуецца да адкрыцця, Hrodna.life запытаўся ў майстрых і бібліятэкараў пра таямніцы лялечных душ і творчасць у асяроддзі кніг.

“Гарадзенскія лялькі” нарадзіліся ў бібліятэцы

“Мужчыны збіраюцца ў гаражах, а мы – у бібліятэцы”. Як “гуляючы ў лялькі” стварыць клуб, выставу і музей
Музейны пакой, ці “Лялечны дом” ў бібліятэцы №3

Бібліятэку на вуліцы Лізы Чайкінай не выпадкова абралі месцам для лялечнага музея. Менавіта тут тры гады таму нарадзіўся клуб “Гарадзенскія лялькі”. Жанчыны сабраліся ў бібліятэцы на “лялечны” навучальны курс, а пасля не захацелі раставацца. Ад таго часу  лялькі ў бібліятэцы сталі звычайнай справай.

“Калі дзеці бачаць лялек у бібліятэцы, то заўжды пра іх распытваюць. Можна распавесці пра герояў казак, пра кніжкі і іх аўтараў. Бонусам за ўвагу звычайна бывае просьба: “А можна мне ўзяць такую кніжку? А можна ў бібліятэку запісацца?”

– расказвае бібліятэкарка Іна Сотнікава.

“Бібліятэка сямейнага тыпу”

Такія чытачы потым прыводзяць за сабой бацькоў і бабуль з дзядулямі, удзельнічаюць у іншых мерапрыемствах бібліятэкі. “Фармальна наша бібліятэка для дарослых, але працуючы лялькамі і з дзецьмі, ператвараем яе ў “бібліятэку сямейнага тыпу”. Што да ўласных адносін з лялькамі, то па словах Іны, гэта “гісторыя пра тое, як хобі стала часткай працы”.

“Мужчыны збіраюцца ў гаражах, а мы – у бібліятэцы”. Як “гуляючы ў лялькі” стварыць клуб, выставу і музей
Іна Сотнікава, кіраўнічка клуба і загадчыца бібліятэкі. З яе лёгкай рукі бібліятэка стала для лялек сапраўдным домам

Зараз  у бібліятэку заходзяць не толькі памяняць кніжкі. Пенсіянеры застаюцца ў чытальнай зале пагартаць часопісы, мамы з дзецьмі прыходзяць памаляваць ці паўдзельнічаць у майстар-класах ды іншых імпрэзах. Лялечны музейны пакой дасць яшчэ адну нагоду наведаць бібліятэку. Пра кожную ляльку, што тут прадстаўлена, можна распавесці цэлую гісторыю.

Лялькі з душой і характарам

Калядную кампазіцыю з Іосіфам, Марыяй і немаўляткам рабілі разам дзве лялечніцы – Святлана Янчылік і Алена Шылко.

“Мужчыны збіраюцца ў гаражах, а мы – у бібліятэцы”. Як “гуляючы ў лялькі” стварыць клуб, выставу і музей
Калядная кампазіцыя Алены шылко і святланы Янчылік

“Гэта свята для мяне вельмі важнае. Ствараючы вобраз Іосіфа хацела выказаць уласныя эмоцыі і сваё адчуванне Бога, што маю ў сэрцы”, – расказала Святлана. Другая яе лялька – “Аватар” – зусім іншая паводле характару. Стваралася яна пад уражаннем ад фільма – захацелася перадаць экспрэсію і рухомасць касмічных істот.

“Мужчыны збіраюцца ў гаражах, а мы – у бібліятэцы”. Як “гуляючы ў лялькі” стварыць клуб, выставу і музей
“Аватар” Святланы Янчылік

“Хочацца рабіць пазітыўных герояў, каб яны краналі сэрца, каб гледачы адгукаліся на пачуцці, укладзеныя ў працу”.

Праца над імклівым аватарам заняла амаль тры месяцы.

Дарослая “гульня ў лялькі”, мяркуе Святлана, дае магчымасць рэалізаваць усе свае мастацкія навыкі і засвоеныя тэхнікі. Дэкупаж, шытво, бісер, лепка ці роспіс – у лялечным свеце для ўсяго знойдзецца прымяненне. “Лялька ўвасабляе ўсе ўменні майстра”.

Але не заўжды ўсё залежыць ад чалавека, раскрывае яшчэ адну “лялечную” таямніцу майстарка Алена Шылко. Ёсць лялькі з храктарам, каторыя “не даюцца” і бывае, “даспяваюць” месяцамі.

“Мужчыны збіраюцца ў гаражах, а мы – у бібліятэцы”. Як “гуляючы ў лялькі” стварыць клуб, выставу і музей
Кот Базіліа ў выкананні акцёра Ралана Быкава. лялька аўтарства Алены Шылко

“Калі задумала зрабіць Ката Базіліа, якога ў фільме пра Залаты ключык іграў Ралан Быкаў, вырашыла пераглядзець фільм, каб узгадаць рысы твару і характэрныя рухі. Выйшла ў сеціва і адразу пабачыла навіну, што ў той дзень быў юбілей акцёра, 70 год ад нараджэння. І вось за гэты адзін вечар лялька зляпілася. Напэўна, ён сам дапамагаў. А вось з Лісой Алісай, каторую іграла Алена Санаева, нічога не атрымалася. Некалькі разоў спрабавала – “не ідзе”.

“Мужчыны збіраюцца ў гаражах, а мы – у бібліятэцы”. Як “гуляючы ў лялькі” стварыць клуб, выставу і музей
“Восень”, Алена Шылко

Лялечнае наваселле

“Некалі мы і марыць не маглі, што ў “Гарадзенскіх лялек” будзе ўласны, хоць і невялікі, музей. Напачатку ж не было для іх нават паліц”, – узгадвае Іна Сотнікава. Аде калі робіш нешта з душой, то і вынік, і развіццё абавязкова будуць, упэўнены “апантаныя лялечніцы”.

“Ведаеце, мужчыны так у гаражах збіраюцца, а мы ў бібліятэцы з лялькамі, – параўноўвае Алена Шылко. – Без клуба ўжо цяжкавата было б”.

“Мужчыны збіраюцца ў гаражах, а мы – у бібліятэцы”. Як “гуляючы ў лялькі” стварыць клуб, выставу і музей


Адкрыццё “Лялечнага дому” адбудзеца 22 снежня ў 16.00 па адрасе вул. Лізы Чайкінай, 49.

Яшчэ адна “карнавальная” выстава з удзелам “Гарадзенскіх лялек” пачне працаваць з 21 снежня ў Музеі гісторыі Гарадніцы.

Калі вы знайшлі ў тэксце памылку або абдрукоўку, калі ласка, паведаміце нам, выбраўшы адпаведны фрагмент і націснуўшы клавішы Ctrl+Enter.