Цэнтральная выбарчая камісія зарэгістравала кандыдатаў у прэзідэнты Рэспублікі Беларусь. Выбары пройдуць 9 жніўня. Віктару Бабарыку і Валерыю Цапкалу было адмоўлена, пяць чалавек атрымалі кандыдацкія пасведчанні. Рэдакцыя Hrodna.Life падрыхтавала падрабязны спіс зарэгістраваных кандыдатаў.
Няхай я буду «кардоннай» выявай на пікеце, людзі ўсё роўна ідуць за ім. І такое ў планы ўладаў не ўваходзіла. Я так разумею, што народны рух не згасне. Усе павінны разумець, што мы галасуем не за кагосьці, а супраць аднаго чалавека.
Святлана Ціханоўская
Святлана Ціханоўская па адукацыі настаўніца замежных моваў, працуе перакладчыцай. Раней не ўдзельнічала ў палітычных кампаніях. Узяла ўдзел у выбарах, каб падтрымаць свайго мужа, блогера Сяргея Ціханоўскага, якога не зарэгістравалі прэтэндэнтам у кандыдаты. Пазней яго затрымалі на пікеце па зборы подпісаў у Гродне, заведзена крымінальная справа. «ЦВК непрадказальна», — сказала Ціханоўская перад пасяджэннем па рэгістрацыі кандыдатаў.
- Паводле ЦВК, здала 109 479 подпісаў.
- Пасля праверак улічылі 104 757.
- У Гродне здалі 5028 подпісаў, па Гродзенскім раёне — 638, па Гродзенскай вобласці - каля 10 000 подпісаў.
У гэтай электаральнай кампаніі толькі я і Аляксандр Рыгоравіч. Больш нікога з рэальных палітыкаў, якія маглі б сапраўды прад’яўляць прэтэнзіі на ўладу, няма.
Ганна Канапацкая
Ганна Канапацкая — юрыстка паводле адукацыі. Актывістка Аб’яднанай грамадзянскай партыі (АГП). Раней кіравала юрыдычнай фірмай. Экс-дэпутатка Палаты прадстаўнікоў. У 2019 годзе Канапацкая планавала зноў балатавацца ў дэпутаты, але яе подпісы былі прызнаныя ЦВК несапраўднымі. Лічыць, што іншыя кандыдаты схільныя ўплыву «расійскіх лялькаводаў».
- Паводле ЦВК здала 151 631 подпісаў.
- Пасля праверак улічылі 146 588.
- У Гродне здалі 387 подпісаў, па Гродзенскім раёне — 17, па Гродзенскай вобласці сабралі 600−700 подпісаў.
Мы страцілі чарговыя пяць гадоў. Нас палохаюць 90-мі, але цяпер нас палохае будучыня. Усіх, хто лічыць, што ў Беларусі патрэбны новы прэзідэнт, заклікаю да салідарнасці. Галасуйце толькі ў дзень выбараў.
Андрэй Дзмітрыеў
Андрэй Дзмітрыеў паводле адукацыі палітолаг. Сустаршыня грамадзянскай кампаніі «Гавары праўду». У час выбарчай кампаніі 2010 года быў кіраўніком штаба Уладзіміра Някляева, у 2015 годзе — штаба Таццяны Караткевіч.
- Паводле ЦВК здаў 110 754 подпісаў.
- Пасля праверак улічылі 106 841
Беларусь гатовая да пераменаў, але нашы людзі цяпер у пэўнай апатыі. Рана ці позна перамены наступяць, але каб яны былі не хаатычныя, а строга структураваныя, павінны быць людзі, якія павінны ўзяць на сябе адказнасць.
Сяргей Чэрачэнь
Сяргей Чэрачэнь вучыўся ў БДУіР на спецыяльнасці «Шматканальныя сістэмы тэлекамунікацый», паралельна — у Інстытуце бізнес-тэхналогій «Атлант-М». З 2016 года пачаў займацца грамадскай дзейнасцю. Былы сябра Камуністычнай партыі, з 2018 года — старшыня Беларускай сацыял-дэмакратычнай Грамады, на гэтай пасадзе ён змяніў Станіслава Шушкевіча. Таксама з 2018 года дырэктар ТАА «С58 Тэхноладжыз» — кампаніі, якая займаецца інвестыцыйнай і кансалтынгавай дзейнасцю. Да рэгістрацыі кандыдатам на сваім сайце пытаўся, ці здымацца яму з выбараў.
- Паводле ЦВК, здаў 149 750 подпісаў.
- Казаў, што каманда сабрала 106 тысячаў подпісаў.
- Пасля праверак улічылі 143 109.
Запомніце, вы і ўсе, хто мяне пачуе: краіну яны не атрымаюць. Мы яе два з лішнім дзясятка гадоў, збіраючы драбкі, ствараючы гэтую квітнеючую краіну, рабілі не для таго, каб яны прыватызавалі гэтую краіну і пусцілі па свеце гэтых небарак, якія заўседы пад бізуном хадзілі. Мы ім не дазволім падзяліць Беларусь, як гэта было ў 39-м годзе.
Александр Лукашэнка
Аляксандр Лукашэнка паводле адукацыі гісторык, эканаміст. Раней займаў розныя пасады, у тым ліку дырэктара саўгаса «Гарадзец» Шклоўскага раёна, у 1990 годзе быў абраны народным дэпутатам Вярхоўнага Савета. З 1994 года — прэзідэнт Беларусі. Зараз падыходзіць да заканчэння яго пяты тэрмін прэзідэнцтва.
- Паводле ЦВК, здаў 1 958 800 подпісаў.
- Пасля праверак улічылі 1 939 572.
