Людзі і справы

Этнакрама «Цудоўня» стварыла ўласны брэнд адзення: хутка вясновая сэксуальная калекцыя!

Ідэя адаптаваць традыцыйны беларускі строй пад сучаснае адзенне не новая. Але раней выкарыстоўваліся больш класічныя варыянты. А стваральнікі брэнда «Цудоўня» з аднайменнай гродзенскай этнакрамы вырашылі дадаць адзенню больш сэксуальнасці і правакацыі. Пры гэтым зрабіць дасяжныя нават для студэнтаў кошты, захоўваючы якасць. Глядзіце, што атрымалася.

З чаго ўсё пачалося

— Да нас прыйшла дзяўчына — шукала спадніцу. У нас вісела адна на той момант — звычайная, са стандартнага беларускага строю. Яна яе прымерыла: спадніца глядзелася на ёй не вельмі прывабна. Я падумала: дзевачкі ж хочуць насіць беларускае, але яно выглядае непрыгожа. А можна паяднаць 21-е стагоддзе з беларускасцю. Так з’явілася ідэя, — расказвае Яна Літвінчук, ініцыятарка праекта.

У краме ідэю абмеркавалі і вырашылі шыць сваё пад уласным брэндам. Да праекту далучылі швачку Таццяну Пілец і майстрыху Галіну Ломаву, якая займаецца вышыўкай. Яна Літвінчук кажа, што хацелася дадаць трошкі правакацыі і сэксуальнасці, але без пахабнасці. Каб адзенне магла і хацела апрануць і студэнтка, і 35-гадовая жанчына. Так у снежні 2018 «Цудоўня» запусціла сваю лінію адзення.

Як ствараецца адзенне «Цудоўня»

Яна прыдумвае вобразы і спрабуе іх намаляваць. Разам са швачкай распрацоўваецца канчатковая схема. Затым закупляецца тканіна, ніткі, падбіраецца колеравая гама. Швачка канструюе тканіну, каб выраб быў максімальна эканамічны. Майстрыха робіць машынную вышыўку. Тканіна з вышыўкай вяртаецца да швачкі, якая стварае канчатковы выраб. Пакуль працэс стварэння дзвюх рэчаў займае цалкам каля двух тыдняў.

Для адзення выкарыстоўваюць натуральныя тканіны — лён, воўна, батыст. Пакуль гатовыя дзве спадніцы — адна з вышыўкай, другая клецістая з бантнай складкай. І касцюм — топік і спадніца. Адзенне можна ацаніць у краме і замовіць любы памер ці пашыць пад знятыя меркі.

Як аб’ядноўваюць традыцыйнасць і сучаснасць

У «Цудоўні» адштурхоўваюцца ад стандартных канонаў моды і спрабуюць аб’яднаць іх з беларускімі матывамі.

— Калі браць касцюм, топік — сучасны з традыцыйнай вышыўкай. На спадніцы вышыўка і традыцыйны строй, толькі талія ўзята высока і даўжыня не максі, а мідзі. На іншай спадніцы традыцыйная клетка і бантная складка, традыцыйная для беларусаў. Але яна не такая аб’ёмная і доўгая, як аўтэнтычная.

Узоры вышыўкі бяруць з кнігі «Беларускі народны строй» Лабачэўскай і Зімінай. Выкарыстоўваюцца арнаменты, характэрныя не толькі для Гродзеншчыны, але і для іншых рэгіёнаў Беларусі. «Мы ж не толькі гродзенцам прэзентуем, а ўсёй краіне», — кажа Яна.

Цэны і новая калекцыя

Адзеннем актыўна цікавяцца людзі з усёй Беларусі. «Цудоўні» пішуць і з Гродна, і з Віцебску, і з Мінску. Праўда, праект пакуль не акупіў укладзеныя ў яго ўласныя сродкі. У першую чаргу таму, што нацэнку на адзенне практычна не ставяць. Рэчы каштуюць ад 40 да 60 рублёў. Камплект абыйдзецца ў 80 рублёў.

Адбіць грошы плануюць з наступнай калекцыі, якую прэзентуюць у красавіку. Прадставяць шэсць жаночых вобразаў - кашулі, спадніцы і сукенкі. Калекцыя будзе выканана ў светлых колерах — блакітных, бірузовых, белых. Іншых сакрэтаў пакуль не раскрываюць. Стаўку робяць менавіта на жаночыя вобразы, бо ў іншых крамах традыцыйнага адзення выбару для жанчын мала.

Праца над новай калекцыяй

Ці можна паставіць вопратку «Цудоўні» ў адзін шэраг з крамамі кшталту «Honar» ці «Elen Carotte»?

«Па якасці - так, — упэўнена адказвае Яна. — Мы не саступаем па якасці тканіны, пашыву, кроя. Саступаем па рэкламе і маштабах. Але мы толькі пачынаем, зараджаемся і не ведаем, у што гэта выльецца. У ідэале хацелася б, каб быў масштаб «Elen Carotte» ці «Honar».

У этнакраме плануюць і далей працаваць з адзеннем. «А навошта чымсьці пачынаць займацца, калі гэта на адзін сезон?» — кажуць у «Цудоўні». Таму наперадзе — восеньская калекцыя.

Падзяліцца

Апошнія запісы

Тры Белавежскія пушчы. Як агароджы на мяжы змяняюць лес і жывёльны свет у Беларусі, Польшчы і паміж платамі

Белавежская пушча сёння раздзеленая не на дзве, а насамрэч на тры часткі: беларускую, польскую і…

31 сакавіка 2025

«Трэнд — мацоўня, здароўе». Задалі адны і тыя ж пытанні металістам з Беларусі і Польшчы

Ужо некалькі дзесяцігоддзяў метал-музыка аб'ядноўвае людзей не толькі адных музычных прыхільнасцяў, але і падобнага светапогляду.…

26 сакавіка 2025

У гродзенскім ГЦ развяліся прусакі. Куды звяртацца, калі заўважылі насякомых у кафэ ці ў сябе дома

У ГЗК Triniti гродзенцы заўважылі прусака — насякомае бегала па канапе ў зоне фуд-корту. Hrodna.life…

26 сакавіка 2025

«Магчыма, будзе і новы матэрыял». Вакаліст гурта Ulis Слава Корань расказаў, як эміграцыя не дае яму пісаць

Беларускі гурт Ulis праіснаваў больш за 20 гадоў. Яго спадчына жыве - музыканты робяць каверы,…

20 сакавіка 2025

«Мама выпісвала фальшывыя дакументы і дапамагала трапіць у Польшчу». Рэпатрыянтка — пра дзяцінства ў Гродне і эміграцыю ў 1946-м

Крысціна Мішчук (Пянткоўская) нарадзілася ў 1933 годзе ў Гродне ў сям'і мясцовай інтэлігенцыі. Каталічка. Тата…

18 сакавіка 2025

«Мая зямля — што хачу, тое і раблю». З’ездзілі ў польскую вёску ля мяжы з Беларуссю, куды стараста запрашае жыць усіх ахвотных

У 500 метрах ад плота, узведзенага на польскім баку мяжы з Беларуссю, стаіць вёска Азяраны…

17 сакавіка 2025