«Розніца толькі ў кошце». Гродзенкі расказалі, якой беларускай касметыкай карыстаюцца і чаму

Кацярына праз параду сяброўкі купляе туш для веек і памаду ад Luxvisage, сям’я Дар'і заўсёды карысталася касметыкай «Беліта», а майстар-брывіст кажа, што беларускі кандыцыянер для веек і броваў павінны быць у кожнай.

Чытачкі Hrodna.life расказалі, якой беларускай касметыкай яны карыстаюцца і чаму, а спецыялісты б’юці-сферы патлумачылі, як правільна даглядаць скуру.

Часцей за ўсё згадваюць «Беліта» і «Вітэкс»

Вікторыя пасля праглядаў блогераў вырашыла паспрабаваць энзімную пудру ад Bielita. Дзяўчына распавяла, што з ёй зручна ў дарозе — менш важыць і не разальецца. «Выдатна кінуць у сумку — гэта галоўныя плюсы», — кажа Вікторыя. З яе слоў, ад расхваленага блогерамі сродку чакала большага. «У рэальнасці - проста эфект звычайнага мыла. Як вынік — чыстая скура. У прынцыпе, гэта ўсё, што трэба ў дарозе».

Брэнды беларускай касметыкі: «Беліта-Вітэкс»; «Беліта-М»; «Маркел»; «Белкасмекс»; «Эксклюзіў касметык»; «Liv Delano»; «Флораліс»; «Modum»; «IRIS cosmetic»; «BIO WORLD»; «MASSTIGE»; «Белор-Дызайн»; «LiLo»; «LUXVISAGE»; «Relouis»; «Ines Cosmetics» і іншыя.

З усіх беларускіх брэндаў чытачкі Hrodna.life часцей за ўсё згадвалі «Беліта-Вітэкс».

«Любы гель для душа „Беліта“. Асабліва падабаецца з маслам аргана», — адказала на пытанне аб перавагах сярод касметычных сродкаў Таццяна.

На сайце вытворцы такіх геляў больш за 150 відаў. Ёсць стандартныя пахі - кветкавыя, ягадныя і фруктовыя, а таксама з пахам марозіва, ёгурту. Ёсць нават гелі з пахам шампанскага і рамантычнай Францыі.

Іншая чытачка распавяла, што ў адной з лінеек «Беліта-Вітэкс» яна знайшла для сябе сродкі для праблемнай скуры — прадукты з лінейкі Clean Skin.

«Разглядала ўсіх вытворцаў, але па коштавай катэгорыі задаволіла Беліта».

«Падабаецца якасцю і коштам»

Добрае спалучэнне цаны і якасці беларускай касметыкі ацанілі блізкія Дар'і.

«У нашай сям'і, колькі я памятаю, заўсёды была прадукцыя Беліта-Вітэкс. Таму і я працягваю ёй карыстацца».

З касметыкі ад «Беліты» сям’я Дар'і выкарыстоўвае практычна ўсё — ад геляў для душа і шампуняў з бальзамамі да таласа-абкручванняў і мужчынскіх геляў для барады.

Для догляду за тварам гродзенка карыстаецца крэмам, крэм-пенкай для мыцця, міцэлярнай вадой, тонікам для твара і вобласці вакол вачэй і спрэй-сыроваткай.

Гродзенка Маргарыта паспрабавала беларускую касметыку 15 гадоў таму і не мяняе свой выбар дагэтуль. «Раней купляла іншыя маркі, але цяпер толькі „Беліта“ („Вітэкс“). Падабаецца якасцю і цаной».

У спіс любімых сродкаў Маргарыты трапілі крэмы і гелі з серыі «Ідэальныя ручкі», гелі-патчы супраць азызласці пад вачыма з лінейкі «Aloe», маска для твару, шыі і дэкальтэ «Аднаўленне пругкасці» з гіалуроновой кіслатой і імбірам, «залатая» маска для твару, якая падцягвае, матыравальны крэм-праймер з серыі «PURE GREEN» і пілінг «Ms Бездакорнасць».

«Скура — гэта не толькі твар»

«Каб заставацца прыгожай і здаровай, наша скура кожны дзень мае патрэбу ў правільным доглядзе, — кажа Вольга Сазановіч, касметык-эстэтыст 5 разраду з вышэйшай медыцынскай адукацыяй. — Нельга забываць пра скуру вакол вачэй, вусны, шыю, дэкальтэ, рукі. Правільны комплексны догляд дасць жаданы і ўстойлівы эфект».

Для штодзённага догляду за скурай неабходны прынамсі мінімальны набор касметычных сродкаў, якія пасуюць для вашага тыпу скуры, узросту і ладу жыцця.

Вельмі важна, на думку спецыялісткі, памятаць пра асаблівасці скуры вакол вачэй, вуснаў, шыі і дэкальтэ. Скура ў гэтых зонах вельмі тонкая і найбольш схільная да ўздзеяння неспрыяльных умоў навакольнага асяроддзя і узроставых зменаў. Для догляду за гэтымі зонамі таксама неабходна выкарыстоўваць спецыяльныя касметычныя сродкі.

«Не заўсёды мы можам самі ацаніць тып і стан сваёй скуры слушна і падабраць набор сродкаў для догляду, якія палепшаць стан нашай скуры. Таму варта звярнуцца да спецыялістаў — касметолага ці дэрматолага», — кажа Вольга Сазановіч.

Прафесіяналы дапамогуць падабраць хатні догляд і, пры неабходнасці, прызначаць доглядныя або лячэбныя працэдуры ва ўмовах касметычнага кабінета: чысткі, пілінгі або іншыя працэдуры.

«Усе мы індывідуальныя, — кажа касметік-эстэтыст. — Скуры кожнага чалавека для яе прыгажосці і здароўя неабходны свой, адзіна правільны, догляд дома і ў спецыяліста ва ўмовах касметычнага кабінета».

«Вейкі даўжэйшыя, памада не скочваецца»

Параз параду сяброўкі Кацярына карыстаецца тушшу для веек і памадай ад Luxvisage. «Туш добрая тым, што вейкі адразу вылучаюцца і на выгляд робяцца даўжэйшымі, а памада доўга трымаецца на вуснах і не скочваецца», — распавяла гродзенка.

Таццяна карыстаецца тушшу ад Luxvisage, а таксама алеем для вуснаў і алоўкамі таго ж брэнда. Для броваў яна выкарыстоўвае маркеры ад Luxvisage і Relouis.

Алей для вуснаў ёсць у трох адценнях. У апісанні сказана, што яно аднаўляе, падтрымлівае ідэальны стан скуры вуснаў, надае лёгкае натуральнае адценне, далікатны бляск, а таксама ўвільгатняе і сілкуе.

З дэкаратыўнай касметыкі брэнда «Luxvisage» прафесійная візажыстка Ала Шафаловіч раіць звярнуць увагу на крэмавыя цені: «Добра тушуюцца, устойлівыя, тонкая тэкстура і прыгожыя адценні». Таксама яна раіць падводку для вачэй-фламастар Relouis PRO 24 hours eyeliner: «Устойлівая, насычаны чорны і зручны аплікатара». З памад трэба раіць «Paradiso Relouis». «Устойлівыя памады і прыгожая палітра адценняў». Сярод догляднай касметыкі для твару яна раіць звильгатняльны тонар ад «MASSTIGE», які падыходзіць для сухой скуры.

«Кандыцыянер для веек павінны быць у кожнай»

«На беларускім рынку шмат добрых прадуктаў для догляду за бровамі і вейкамі. Relouis, Luxvisage, Belorddesign», — пералічвае брэнды, у якіх ёсць сродкі для догляду за вейкамі і бровамі, Вольга Рапейка, майстар па бровах і вейках. Яна расказала, што прадукты для догляду бываюць на алейнай, воднай, гелевай аснове. Кожны выбірае зручны для сябе варыянт.

«З асноўных кампанентаў павінны прысутнічаць вітамін Е і пантэнол, — кажа спецыялістка. — Выдатна, калі ёсць гідралізаваны керацін, калаген, біятынол».

Вользе часта задаюць пытанне — як даглядаць за вейкамі?

«Кандыцыянер для веек. Гэта тое, што павінна быць у кожнай, хто хоча падоўжыць жыццё сваім вейкамі», — кажа Вольга Рапейка. Таксама яна рэкамендуе спецыяльны алей для догляду за вейкамі і бровамі.

Па словах майстра, вейкі могуць радзець, рабіцца больш слабымі і цьмянымі.

«Калі не толькі вейкі, але і скура, пазногці і валасы сталі губляць былую раскошу — гэта падстава звярнуцца да лекара, — тлумачыць Вольга. — Калі ўсё ў парадку, то прычынай магла стаць няякасная або няправільна падабраная дэкаратыўная або доглядная касметыка. Успомніце, які новы прадукт з’явіўся ў вас, выключыце яго і назірайце за вейкамі».

Таксама адной з прычын можа быць невыкананне правілаў демакіяжу.

«Калі карыстаецеся мицеллярной вадой, памятайце, што яе трэба старанна змываць звычайнай вадой. Тым, хто не любіць важдацца са спонжыкамі, можна карыстацца пенкай для мыцця», — кажа Вольга.

Сухасць скуры можа быць праз няправільны демакіяж, алергію. А ад недахопу бялкоў у харчаванні церпяць не толькі вейкі і бровы, а таксама скура, валасы, пазногці і ўвесь арганізм у цэлым.