Интерьеры отеля Cult в Гродно. Фото: сайт отеля
У Гродне на Віленскай, 37 адкрыўся новы буцік-гатэль і рэстаран The Cult — і выклікаў неадназначную рэакцыю праз цэны. Гатэль адкрыла гродзенская дызайнерка адзення Ірына Званко разам з мужам.
«Ён выглядае, як ажыўшая карцінка з Pinterest», — кажа ў TikTok блогерка Алеся Баклага. Яна адзначыла якасны сэрвіс, вялікую колькасць жывых кветак і незвычайную мэблю. У кожным нумары ёсць міні-бар, кавамашына, індывідуальная сістэма кандыцыянавання і «сучасныя дэвайсы». Таксама ў нумарах ёсць выхады на маленькія французскія балконы. Блогерка раіць у гатэлі не толькі адпачываць, але і ладзіць фотасесіі і зборы на вяселле.
Усяго ў гатэлі 10 нумароў з розным афармленнем плошчай ад 23 да 44 кв.м. Ёсць нумары з працоўнымі зонамі, прасторнымі ваннымі. На запыт могуць прапанаваць дзіцячыя ложкі і крэслы. Цэны — 450−700 рублёў за ноч. Для параўнання, ноч у нумары апарт-гатэля «У Грушы» з пяці нумароў каштуе 180 рублёў, у гасцініцы «Славія» ў розных філіялах — 130−330 рублёў, у апарт-гатэлі «Семашка» ў розныя даты — 270−550 рублёў, у «Кронан парк гатэлі» — 500−1050 рублёў.
Гаспадыні гатэля Ірыне Званко ў Гродне не хапае стыльнай установы. «У Мінску ты заходзіш — і ўсё такое стыльнае, прадуманае, адпрацаванае з дызайнерамі. А ў Гродне — усё нейкае як кланаванае», — лічыць яна. Ідэі для свайго гатэля Ірына з мужам Аляксандрам збіралі падчас падарожжаў, у гатэлях прэміум- і мідл-сегмента.
Першы паверх гатэля заняў рэстаран з адкрытай кухняй, дзе можна назіраць за працэсам прыгатавання страў. У меню — абшырная вінная карта і нетрывіяльныя стравы. Закускі каштуюць ад 25 да 55 рублёў. Сярод іх прапануюць крудо з тунца з манга і чылі (35 рублёў), камчацкага краба з капустай пак-чой і соусам шампань (55 рублёў), тартар з ялавічыны з мусам з пармезану і вэнджаным жаўтком (30 рублёў), карпачо з ялавічыны з вэнджанай смятанай, грыбным мусам і чырвонай ікрой (35 рублёў). У спісе салатаў (25−37 рублёў) — салата з томленай качкай, манга, апельсінам і страчатэлай. Гарачыя стравы каштуюць 29−45 рублёў: ледзяная рыба на вуглях з цукіні і соусам альфрэда, міньён з свініны з пюрэ з белай фасолі і антонаўскіх яблыкаў, фаршыраваная перапёлка з орзата, стэйк рыбай з грыбамі эрынгамі і перцавым соусам і іншыя.
На сняданкі падаюць круасаны з начынкай, блінчыкі і дранікі, тосты і сырнікі, кашы. Ёсць і супы (25 рублёў), і дэсерты (20 рублёў).
Хоць у рэстаране было шмат людзей, замову блогеркі прынеслі хутка. Праўда, прайс «вышэй за сярэдні», прызнае дзяўчына. За равіёлі з крабам, ваду і апельсінавы нектар яна заплаціла 64 рублі, пры гэтым 15 рублёў каштавала вада. Каментатараў гэта шакавала, як уразілі і кошты на нумары.
«Даю год гэтай установе, у нас людзі столькі не зарабляюць, каб аддаваць столькі», — упэўнены matveyF.
«На жаль, можа туды і ўкладзена шмат грошай, але цэны не адпавядаюць рэальнасці, гэта ўсё ж такі Гродна, а не Венецыя, і тое. нават у Венецыі мала хто гатовы плаціць такія грошы за нумар», — адзначае Zoddy.
«Сімпатычная ўстанова, калі б межы былі адкрыты, яна была б да месца…»
«Цэннік вядома ахавы 😳 але для турыстаў ад цэнтра далёка, яны туды не ходзяць. А так разлічана на іх у большасці, я думаю», — лічыць anastasia_kulesh.
Дызайн інтэр'ераў выклікаў рознагалоссі. «Дызайн быццам для людзей з парушанай псіхікай» і «смешны дызайн», — напісалі пра яго каментатары ў TikTok. Былі тыя, каму спадабалася: «Як прыгожа! Хачу туды!», — напісала карыстальніца llona.ikona. У Instagram Ірыны Званко захопленых водгукаў значна больш: «Стварыць такое месца, далёка не кожны зможа, гэта проста ракета🚀а нумары гэта асобны від раскошы», «Проста one love ❤️❤️❤️❤️ так прыгожа! Дух захапляе», «Дзякуй, што насычаеце наш горад такімі прыгожымі аб’ектамі». Адна з каментатарак піша, што ўпершыню наведае Гродна дзеля гатэля. «Я ўпэўнена хутка і Мішлен будзе ваш», — лічыць другая.
Гатэль адкрыўся на месцы гістарычнага будынка 1900 года пабудовы, вядомага ў Гродне як «Дом Лютэка» (дом Ярмолавіча). Двухпавярховы, атынкаваны, вузкі будынак на высокім цокалі, з карнізам і дэкаратыўным міжпавярховым поясам, высокім арачным праездам з пілястрамі прадалі ў 2019 годзе. Будынак не меў статуса гісторыка-культурнай каштоўнасці.
У першапачатковым праекце было аднаўленне дома ў тых жа габарытах, планавалі дадаць дзве прыбудовы — з боку галоўнага фасада і да дваровага, гарышча перабудаваць у мансардны паверх. Будоўлю пачалі ў 2021 г. — і першапачатковы дом цалкам знеслі. У выніку будынак цалкам перабудавалі, і ён страціў характэрныя рысы.
«На год максімум, а знеслі каштоўнасць😢дзеля таго каб людзі паспалі і паелі ((сум», — шкадуе Вікторыя ў каментарах да роліка пра гатэль.
Пакуль сады толькі заквітнеюць, ва ўстановах і крамах Гродна падрыхтавалі вясновыя фотазоны. Часта гэта гронкі…
На Савецкай вуліцы каля 80% падвалаў задзейнічаны пад бізнес, прыводзіць статыстыку газета “Гродзенская праўда”. Пры…
Уладальнікі гродзенскіх кавярань «Крепкий белый» і «Крепкий черный» запускаюць школу барыста. Летась арганізатары ўжо праводзілі…
Гродзенец Ігар Апякун канструюе мэблю для круізных лайнераў - стварае прататыпы праз спецыяльную праграму. Ігар…
Кніга «Удивительный Гродно» Яўгена Аснарэўскага выйшла ў мінскім выдавецтве «Рыфтур». Даведнік разлічаны і на турыстаў,…
Як мінімум дзве гродзенскія кавярні, My Lover Berry і «Крепкий белый», вырашылі апрабаваць новы фармат…