Закінуты дом у цэнтры Гродна перабудуюць пад офісны будынак

Закінуты дом па адрасе Будзённага, 52 рэканструююць пад шматфункцыянальны будынак. Забудоўшчык — мінская фірма ТАА «Актыўдэвелампент». Адпаведная інфармацыя з’явілася на сайце Гродзенскага гарвыканкама ў раздзеле «Грамадскія абмеркаванні».

Будынак зробяць вышэй, а ўчастак добраўпарадкуюць

Праект рэканструкцыі дома прадугледжвае павелічэнне яго паверхавасці. Плануецца, што прылеглую да ўчастка тэрыторыю добраўпарадкуюць — там з’явіцца цвёрдае дарожнае пакрыццё.

Дом на Будзённага, 52 не з’яўляецца гісторыка-культурнай каштоўнасцю. Пры гэтым ён знаходзіцца на тэрыторыі гістарычнага цэнтра Гродна, які з’яўляецца гісторыка-культурнай каштоўнасцю першай катэгорыі.

Рэканструкцыяй дома будзе займацца мінская фірма ТАА «Актыўдэвелампент».

Грамадскія абмеркаванні праекта правядуць са студзеня па люты 2025 года. Да сакавіка будзе прадстаўлена справаздача аб ацэнцы ўздзеяння на навакольнае асяроддзе. З сакавіка па красавік будзе прынятае канчатковае рашэнне па праекце.

Чытайце таксама: Чаму трэба хадзіць на грамадскія абмеркаванні ў Гродне

Папярэдні інвестар планаваў адкрыць на месцы дома кафэ

Закінуты дом разам з участкам выставілі на аўкцыён у ліпені 2023 года. Тады стартавы кошт лота складаў 151 048 руб. (амаль $ 50 тыс.), а інвестар мог рэканструяваць будынак пад аб’ект гандлёва-абслугоўваючага прызначэння.

Да гэтага дом ужо належаў прыватнаму інвестару, які збіраўся адкрыць у ім кафэ. Але працы так і не пачаліся і будынак перапрадалі.

Дом на Будзённага, 52 пабудавалі ў 1900 годзе ў стылі прымітыўнай эклектыкі. Дэкаратыўнае афармленне моцна пацярпела пры капітальным рамонце за савецкім часам. Пасля адсялення жыхароў у 2000-х будынак пуставаў шмат гадоў.

Чытайце таксама: Паміж могілкамі і «Азотам» пабудуюць гандлёва-выставачны цэнтр