На I Міжнародным архітэктурным форуме «Эфектыўнае асяроддзе» выбіралі праект для квартала паміж вуліцамі Ткацкая і Гарадзенская ў Баранавічах. Перамог праект з Уфы. Раней казалі, што забудоўшчыкам будзе расійская кампанія. Hrodna.life паглядзеў, якія праекты выбрала журы.
На архітэктурным форуме, які прайшоў 30 лістапада ў Мінску, падвялі вынікі I Беларускага конкурсу з міжнародным удзелам на распрацоўку эфектыўнага асяроддзя жылога квартала ў горадзе Гродна. У экспазіцыі форума прэзентавалі 42 праекты забудовы.
I прэмію і прыз у памеры 7 000 рублёў атрымаў аўтарскі калектыў архітэктурнага бюро «Ніткі» — Радзік Гарэеў, Рэгіна Гарэева - за праект //12 sq// (г. Уфа, Расійская Федэрацыя).
II прэмію і прыз у 5000 рублёў забраў аўтарскі калектыў - Дар’я Лаўрынава і Аляксей Лаўрухін — за праект «Хатняя рака» (г. Санкт-Пецярбург, Расійская Федэрацыя).
III прэмію і 3000 рублёў атрымаў аўтарскі калектыў - Данііл Барсукоў, Даніл Дземенка — за праект «Лугі» (г. Брэст, Рэспубліка Беларусь).
Дыпломам ад праектнай кампаніі VIASET узнагародзілі Анастасію Сідарэнку за праект «Меандр» (г. Брэст, Рэспубліка Беларусь).
Дыплом «За своеасаблівасць архітэктурнай мовы» ад Беларускага саюза архітэктараў атрымала Соф’я Максіменка за праект «Вытокі» (г. Баранавічы, Рэспубліка Беларусь).
Дыплом і спецыяльны прыз ад генеральнага партнёра форуму, кампаніі Astron Buildings, атрымаў аўтарскі калектыў Маскоўскага архітэктурнага інстытута за праект «Прыродна-культурны шлях».
На форуме сустрэліся архітэктары, забудоўшчыкі і прафесары
Мэта форуму была аб’яднаць архітэктараў, аўтараў твораў мастацтва, ландшафтных архітэктараў, дызайнераў і інжынераў па свеце, дэвелапераў, заказчыкаў, стваральнікаў норм і правіл праектавання і прафесарска-педагагічны склад вышэйшых архітэктурных школ Беларусі.
За дзень працы форум наведала больш за 400 прадстаўнікоў сферы архітэктуры і будаўніцтва з Беларусі і блізкага замежжа.
Забудову хочуць аддаць расіянам
Забудову квартала паміж Ткацкай і Гарадзенскай абмяркоўвалі вясной у Гродзенскім аблвыканкаме. Рэалізоўваць праект збіраліся на аснове вопыту расійскай дзяржаўнай кампаніі «Дом.РФ». Абмяркоўвалі, што квартал варта будаваць у канцэпцыі 15-хвіліннага горада. Гэта мадэль гарадскога планавання, у якой усе асноўныя патрэбы чалавека (жыллё, праца, адукацыя, медыцынскія паслугі, гандаль, адпачынак) размешчаны ў межах 15 хвілін пешаходнай або веласіпеднай даступнасці ад дома.
Праект прадугледжваў шматкватэрныя дамы, катэджы і таўнхаусы. Побач планавалі размясціць сацыяльную інфраструктуру. Праект стваралі з улікам стандартаў «ДОМ.РФ», з напрацоўкамі савецкага горадабудаўніцтва і сучаснымі трэндамі па архітэктуры.
