У Гродне за дзяржздраду будуць судзіць поўнага цёзку былога дырэктара шклозавода. Загінуў баец палка Каліноўскага — паляк з беларускімі каранямі. Гродзенцаў прызналі былымі палітвязнямі. Рэдакцыя Hrodna.life вывучыла, што адбылося ў вобласці з 12 па 18 жніўня.
Палітвязень Дзяніс Івашын сапраўды быў у ШІЗА
«Нарэшце да маці прыйшла паштоўка ад Дзяніса Івашына, датаваная 8 жніўня. Шляхам нескладаных падлікаў можна вылічыць, што паміж папярэднім і новым пасланьнямі прамінула 15 дзён, якія складаюць роўна максымальны на дадзены момант пэрыяд зьмяшчэньня вязьняў у ШЫЗА», — напісала яго жонка Вольга.
Дзяніс напісаў, што ў парадку і атрымаў шмат лістоў.
Суполку «Пагоня Гродна» прызналі экстрэмісцкім фармаваннем
Фарміраваннем МУС 13 жніўня прызнаў арганізацыі «Пагоня Гродна» і «Free Belarus Women», а датычным да кіраўніцтва — 38-гадовага Дзяніса Чашчавіка. Усяго фарміраваннем прызналі 11 суполак і акаўнтаў у Facebook, Instagram і Telegram.
Новая «экстрэмісцкая» інфармацыя
TikTok-акаўнт «belarus_bez_lukachenko» і яго лагатып прызнаў экстрэмісцкім суд Лідскага раёна 8 жніўня. А 13 жніўня — ТікТок-акаўнт «shchyra_kazhuchi» і яго лагатып.
Новыя палітвязні
Вольга Куранчык і Андрэй Жалкоўскі з Гродна 13 жніўня прызнаны былымі палітвязнямі. Праваабаронцы патрабуюць іх рэабілітацыі.
Новыя «экстрэмісты»
Вур’е Міхаіл Аляксандравіч, Чарапок Паліна Антонаўна, Багдановіч Вольга Канстанцінаўна, Ярэц Наталля Сяргееўна, Барабан Дзмітрый Рыгоравіч з Гродна 16 жніўня папоўнілі спіс «экстрэмістаў».
У Гродне заявілі іск да дырэктара школы. Ён фальсіфікаваў выбары ў 2020-м
У Гродне судзілі Анатоля Барысавіча Кавалёва — былога дырэктара СШ № 31 імя Кляцкова. Іск да яго заявіла сама школа і пракуратура Гродна. З яго вынікае, што былы дырэктар нанёс школе некаторую шкоду. Рэдакцыя Hrodna.life пры дапамозе «Кіберпартызан» разбіралася, што вядома пра справу і асобу мужчыны.
У Гродне за дзяржзраду будуць судзіць поўнага цёзку былога дырэктара шклозавода. Што вядома пра Ігара Бацяна?
У Гродне будуць судзіць чалавека, чые дадзеныя цалкам супадаюць са звесткамі былога дырэктара шклозавода «Нёман» — Ігара Міхайлавіча Бацяна. Яго абвінавачваюць паводле палітычнага артыкула — здрада дзяржаве.
Загінуў баец Палка Каліноўскага — паляк з беларускімі каранямі
У час выканання баявых абавязкаў ва Украіне загінуў баец палка Каліноўскага і Міжнароднага легіёна, грамадзянін Польшчы, Пшэмыслаў «Кордзіян» Расевіч-Кучынскі. Раней ён быў валанцёрам у Гродне і вадзіў бясплатныя экскурсіі.
У Гродне за абразу Лукашэнкі судзяць былога старшыню яўрэйскай абшчыны
Судовае паседжанне па справе Рамана Смірнова прайшло 15 жніўня. Былому старшыні яўрэйскай абшчыны і дырэктару ТАА «Гродзенскае агенцтва нерухомасці» пагражае да чатырох гадоў калоніі за абразу Лукашэнкі.
