З 4 ліпеня ўзмацніліся праверкі на мяжы. Польская мытня перастала адзначаць tax-free, а тэхніку і запчасткі, якія вязуць у Беларусь, правяраюць нават на зялёным канале. Людзям патлумачылі, што гэта звязана з уступленнем у дзеянне новага 14 пакета санкцый.
Інфармацыя пра змены ў парадку пропуску на польскай мяжы з’явілася ў чатах, прысвечаных перасячэнню мяжы з Еўрасаюзам.
«14 пакет санкцый, бязтаварны выезд, новая змена сказала. Назад у РП раварочваюць усіх. Там спіс на 200+ лістоў, толькі пару найменняў прахадных. Блытаніна поўная», — напісаў адзін з карыстальнікаў чата. Людзей з таварам на мытні не выпускаюць і адпраўляюць назад у Польшчу, а тыя едуць вяртаць набытае ў магазіны.
Вывозіць прадукты і лекі не забаронена. Таксама прапускаюць каву і пральны парашок, напісалі ў «прымежным» чаце. Аўтобусы пакуль правяраюць выбарачна.
Поўны спіс забароненых да вывазу тавараў даступны па спасылцы. У яго ўваходзяць:
- ікра і яе імітацыя, ракападобныя ў любой форме,
- хімічныя рэчывы, палімеры,
- сродкі гігіены (пена для галення, мыла, дэзадаранты, парфумерыя, туалетная папера),
- розныя будаўнічыя матэрыялы, дрот, фольга,
- жаночая адзенне,
- абутак з падэшвай з гумы, штучных матэрыялаў, скуры,
- каштоўныя, напаўкаштоўныя і сінтэтычныя камяні,
- матрацы, пасцельныя прыналежнасці, коўдры, падушкі,
- любыя ёмістасці са шкла, якія выкарыстоўваюцца для транспартавання або ўпакоўкі,
- фотаапараты і ўспышкі,
- тэхніка: машынкі для галення, рухавікі і маторы, помпы, халадзільнікі і маразільнікі, пасудамыйныя машыны, радыётэхніка,
- апаратура для фізічных і хімічных вымярэнняў і іншае.
Санкцыі не павінны распаўсюджвацца на тавары для асабістага карыстання. Але пакуль мытнікі не прапускаюць любыя новыя тавары — як для перапродажу, так і для асабістага карыстання, піша MOST са спасылкай на сваю крыніцу.
14-ы пакет санкцый у сувязі з агрэсіўнай вайной Расіі супраць Украіны прынялі 24 чэрвеня. Пакет быў закліканы ўзмацніць экспартныя абмежаванні на прамысловыя тавары і перадавыя тэхналогіі.
Чытайце таксама:
