Гродзенскае праектнае бюро “Інтэлсток інжынірынг” атрымала дзве ўзнагароды за праекты будынкаў у Гродне. Іх уручылі падчас архітэктурнай прэміі IAD AWARDS 2024 ARCHITECTURE & DESIGN COMMUNITY (ADC).
Журы прэміі адзначыла Залатой узнагародай праект Віктара Вараб’я і Вадзіма Жука ў намінацыі “Архітэктура” у катэгорыі “Карпаратыўныя і офісныя будынкі”. Гэта праект офіснага будынка на скрыжыванні вуліц Пушкіна і Дубко.
Адметнасць будынка – шкляныя кансолі, якія складаюцца ў кубічную кампазіцыю. У вячэрні час будынак падсвечваецца і пераўтвараецца ў светлавую і колеравую дамінанту. Уваход у будынак знаходзіцца ў паглыбленай уваходнай групе, якая становіцца працягам вулічнай плошчы і нібыта запрашае мінакоў усярэдзіну.
У кастрычніку 2023 года гэты праект атрымаў Малы Гран-Пры ў намінацыі “Праект” падчас XXI Рэспубліканскага конкурсу на лепшы “Праект”, “Будаўніцтва”.
Не адзіная адзнака на конкурсе
Яшчэ адзін прыз – “Срэбраную ўзнагароду IAD AWARDS 2024 ADC” – атрымаў праект будынка тых жа архітэктараў на вуліцы Вялікай Траецкай. Гэты праект прадугледжвае ўзвядзенне будынка, які будзе адпавядаць маштабу гістарычнай забудовы цэнтра горада, але без стылізацыі і псеўдагістарызму. Канцэпцыя новага будынка натхнёная гістарычнай забудовай цэнтра Гродна.
Сілуэт будынка ўлічвае захаванне існуючага дрэва, што дазволіла арганізаваць пад яго кронай прастору ўваходнай групы. Дрэва стала важнай часткай кампазіцыі, якую падкрэслівае пластыка фасада. Аконныя праёмы і фасадныя прастынкі выкананы з розных тыпаразмераў з нарастаючым рытмам пры набліжэнні да ўваходнай групы, а цагляны руст паступова “раствараецца” пры аддаленні ад дрэва.
Зараз будынак знаходзіцца на фінальнай стадыі будаўніцтва. У чэрвені 2021 года гэты праект атрымаў срэбны дыплом незалежнага архітэктурнага рэйтынгу “Залатая капітэль”, дыплом ХХ Рэспубліканскага конкурсу на лепшы “Праект”, “Будаўніцтва”, а таксама трапіў у шорт-ліст Міжнароднай Прэміі Eurasian Prize.
Чытайце таксама: Новый офисный центр построят на Большой Троицкой. Авторы проекта уже получили награду
Што гэта за прэмія?
Прэмію IAD AWARDS 2024 ARCHITECTURE & DESIGN COMMUNITY (ADC) уручаюць з 2019 года. Яе задача – забяспечыць медыйнасць найлепшым праектам, якія трапляюць на конкурс з усяго свету. У журы прэміі больш за 50 архітэктараў, дызайнераў, прадстаўнікоў галінавых інстытутаў, а таксама даследчыкі і прафесары.
