Стаматалогія патаннее: новыя тарыфы на платныя паслугі ўстанавілі ў Беларусі

Гранічныя максімальныя тарыфы на стаматалагічныя паслугі ўстанавіла Міністэрства аховы здароўя Беларусі. Частка паслуг патаннее. Новыя цэны набудуць моц з 1 ліпеня 2024 года.

Новыя тарыфы на стаматалогію ўстанаўлівае пастанова Міністэрства аховы здароўя № 77 ад 24 красавіка 2024 г. Яна была афіцыйна апублікавана на Нацыянальным прававым інтэрнэт-партале 23 траўня. У апошні раз максімальныя дапушчальныя цэны на паслугі стаматолага мяняліся ў лістападзе 2023.

Што ў беларускай стаматалогіі стане таннейшым і на колькі?

Некаторыя паслугі стаматолагаў патаннеюць на 8,54%, іншыя на 13, 77%, а некаторыя нават на 31,43%. Больш за ўсё, мяркуючы па дакуменце, патаннее адбельванне зубоў з выкарыстаннем капы — амаль на 70%.

Як зменяцца цэны стаматалагічных паслуг

• Ацэнка вынікаў даследаванняў:
  • ацэнка лекарам вынікаў дэнтальных рэнтгенаграм, панарамных артапантамаграм, заключэнняў лекараў-рэнтгенолагаў па праведзеных рэнтгендаследаваннях — цяпер каштуе 15,10 рубля, а будзе каштаваць 13,02 рубля;
  • ацэнка вынікаў тэлерэнтгенаграм, конусна-прамянёвых камп’ютарных тамаграм — цяпер каштуе 30,20 рубля, а будзе каштаваць 26,04 рубля.
• Забор матэрыялу для даследавання:
  • трэпанбіёпсія — цяпер каштуе 41,20 рубля, будзе каштаваць 37,67 рубля;
  • інцызійная і эксцызійная біяпсія — цяпер каштуе 41,20 рубля, будзе каштаваць 28,25 рубля;
  • пункцыйная біяпсія — цяпер каштуе 10,30 рубля, будзе каштаваць 9,42 рубля.
• Выдаленне зубных адлажэнняў:
  • апаратным метадам (пнеўматычным, ультрагукавым, магнітастрыкцыйным і іншымі) (за адзін зуб) — цяпер каштуе 2,44, будзе каштаваць 1,88;
  • з ужываннем содаструменнага апарата (за адзін зуб) — цяпер каштуе 2,42, будзе каштаваць 1,88.
• Адбельванне зубоў:
  • адбельванне зубоў з выкарыстаннем капы (адна сківіца) — цяпер каштуе 91,20 рубля, будзе каштаваць 28,25 рубля.
• Аператыўныя ўмяшанні на сківіцах:
  • унутрыкасцяная дэнтальная імплантацыя аднаго імплантата — цяпер каштуе 188,73 рубля, будзе каштаваць 75,33 рубля.

Новыя тарыфы на стаматалагічныя паслугі, якія набудуць моц з 1 ліпеня 2024 года, можна паглядзець у пастанове Міністэрства аховы здароўя.

Чытайце таксама: На Дубко насупраць Old City пабудуюць гарадскі стаматалагічны цэнтр