На цокальным паверсе будынка хацелі пабудаваць гаражы, але аказалася, што сцены не вытрымаюць. Ва ўпраўленні будаўніцтва, архітэктуры і горадабудаўніцтва Гродзенскага гарвыканкама расказалі, чаму вырашылі знесці аўтэнтычную казарму XIX стагоддзя на Шчорса, хаця спачатку абяцалі захаваць.
Першапачаткова забудоўшчык распрацаваў праект з захаваннем гістарычнага будынка казармы на Шчорса, 2. Праект прадугледжваў рэканструкцыю будынка пад шматкватэрны жылы дом і ўладкаванне гаражоў у цокальным паверсе. Але ўжо на стадыі падрыхтоўчых работ выявілі неадпаведнасць апорнай здольнасці сценаў будынка нарматывам, патлумачылі ў гарвыканкаме для «Гродно Плюс». Тое, што цэгла страціла свае ўласцівасці, пацвердзіла атэставаная на правядзенне абследаванняў кампанія. Праз гэта нельга было гарантаваць бяспеку рэканструяванага аб’екта — і без таго слабыя канструкцыі дадаткова нагружаліся.
Знясуць і пабудуюць
Забудоўшчык ААТ «Палессежылбуд» прыступіў да рэалізацыі праекта рэканструкцыі былой казармы на Шчорса, 2. Новае праектнае рашэнне прадугледжвае частковы дэмантаж неналежных апорных канструкцый. Пасля гэтага збіраюцца ўзвесці будынак з захаваннем габарытаў і характару архітэктуры існуючага будынка.
«Больш за тое, матэрыялы ад разборкі будынка захоўваюцца, у прыватнасці, цэгла, якая пройдзе дбайную праверку па марозаўстойлівасці і апорнай здольнасці, будзе прымяняцца ў абліцоўванні які будуецца аб’екта», — заявілі чыноўнікі.
Праект прайшоў усе ўзгадненні, запэўніваюць у гарвыканкаме. Ён быў распрацаваны ў адпаведнасці з архітэктурна-планіровачным заданнем і заданнем на праектаванне, ва ўстаноўленым парадку былі пройдзены ўсе неабходныя адміністрацыйныя працэдуры. У тым ліку аб’ект двойчы разглядаўся на архітэктурна-горадабудаўнічай радзе горада. Было атрымана ўзгадненне гарадскога і абласнога камітэта архітэктуры і будаўніцтва і станоўчае заключэнне Дзяржбудэкспертызы па Гродзенскай вобласці.
Ці знясуць таксама другую казарму комплексу XIX стагоддзя па Шчорса, 4, у гарвыканкаме не ўдакладнілі.
Знос стаў нечаканасцю
Пра знос аўтэнтычнай казармы стала вядома днём 13 сакавіка. У сувязі са зносам у Міністэрства культуры Беларусі і пракуратуру Гродна было адпраўлена патрабаванне спыніць знішчэнне культурных каштоўнасцей і прыцягнуць датычных да крымінальнай адказнасці паводле артыкула 344 КК «Наўмыснае знішчэнне або пашкоджанне гісторыка-культурных каштоўнасцяў або культурных каштоўнасцяў, якім можа быць нададзены статус гісторыка-культурнай каштоўнасці», піша канал «Спадчына». Аўтары канала заклікалі дасылаць аналагічныя звароты праз платформу обращения.бел.
Да зносу былыя казармы на Шчорса захаваліся ў арыгінальным выглядзе, што вельмі рэдка для Беларусі і лічыліся адным з найстарэйшых вайсковых мястэчкаў на тэрыторыі краіны. 27 мая 2022 года іх прадалі з аўкцыёна — з чацвёртай спробы і са зніжкай 80%. Казармы выкупіла брэсцкая будаўнічая кампанія ААТ «Палессежылбуд». Іх вырашылі перарабіць пад элітнае жытло.
Праект прадугледжваў пашырэнне аўтэнтычных аконных праёмаў. На тое, што гэта можа таксама змяніць характар апорных канструкцый і прывесці да аварыйнасці, звярнуў увагу краязнаўца Мечыслаў Супрон яшчэ падчас грамадскіх абмеркаванняў праекта ў 2022 годзе. Нягледзячы на заўвагі, праект практычна не змянілі.
