Палітвязняў з Гродна і іх блізкіх судзяць за атрыманне замежнай дапамогі

На 16 лютага вядома пра мінімум чатыры суды над гродзенцамі за атрыманне замежнай дапамогі. Гэта палітвязні на «хіміі» і іх блізкія. Таксама штрафы атрымалі блізкія палітвязняў і аштрафаваныя ў Наваградку і Лідзе.

16 лютага ў судзе Кастрычніцкага раёна Гродна судзяць трох жыхароў. У якасці артыкула КаАП стаіць «Дэкрэт № 7 — Дэкрэт Прэзідэнта Рэспублікі Беларусь ад 08.11.2021 № 7». Менавіта ён рэгулюе атрыманне замежнай дапамогі. Раней затрыманых за замежную дапамогу судзілі паводле арт. 24.15 ч.2 КаАП «Парушэнне заканадаўства аб замежнай бязвыплатнай дапамозе».

Судзяць Сяргея Маланчука — жыхара Гродна, асуджанага на два гады «хіміі» па крымінальнай справе аб абразе прадстаўніка ўлады. Ён адбывае пакаранне ў ПУАТ-46. Суддзя — Максім Галубовіч.

Таксама судзяць Таццяну Цяраневіч. Магчыма, гэта сваячка Уладзіміра Цярэневіча, намеснік старшыні прафсаюза «Гродна Азот», які атрымаў 12 гадоў калоніі. Суддзя — Уладзімір Пазняк.

Той жа суддзя судзіць Голуба Аляксандра Веніямінавіча.

15 лютага ў судзе Кастрычніцкага раёна Гродна судзілі Яўгена Асіпчыка. Гэта палітвязень, якога асудзілі за мітынгі на тры гады «хіміі». У канцы лютага 2023 года яго перавялі ў гродзенскую ПУАТ № 24. Суддзя — Алена Тоўсцік-Самойла.

Рэйды па палітвязнях і іх блізкім правялі 23 студзеня. Паведамлялася, што КДБ валодае інфармацыяй з «Еўраопта» аб прадуктовых кошыках, якія закупляліся ў рамках праекта «INeedHelpBY», які прызналі экстрэмісцкім фарміраваннем. У Гродне паведамлялі пра затрыманне шасці чалавек. Фігурантам падобных спраў у вобласці далі штрафы і пастанавілі вярнуць грошы, атрыманыя з-за мяжы. Напрыклад, лідчанцы ў дэкрэце і жонцы палітвязня трэба будзе аддаць дзяржаве $ 5,6 тыс.