Каго з гродзенцаў аб’явілі ў вышук у Расіі: шукайце сябе і сяброў у базе МУС (абноўлена)

Расійская «Медыязона» выпампавала базу вышуку МУС Расіі і зрабіла зручны пошук па ёй. Беларуская «Медыязона» вылучыла з базы ўсіх грамадзян Беларусі. Іх аказалася 3186 чалавек. Сярод іх ёсць і гродзенцы. Вы можаце самі пашукаць сябе і знаёмых па прозвішчы, імені і імені па бацьку.

Абноўлена. За 6 месяцаў Расія дадала ў базу вышуку МУС 773 грамадзяніна Беларусі і тых, хто тут нарадзіўся. Некаторых людзей прыбралі з базы. Усяго ў базе знаходзіцца больш за 3500 чалавек. Людзей з гэтай базы шукаюць у Расіі і ў Беларусі. Праверыць сябе ў абноўленай базе можна тут.

Рэдакцыя Hrodna.life паглядзела, якіх вядомых гродзенцаў і ўраджэнцаў Гродзенскай вобласці (ці іх поўных цёзак) шукае расійская міліцыя.

У выніку хуткага пошуку ў базе вышуку МУС Расіі знайшліся:

• Уладзімір Хільмановіч — гродзенскі журналіст і праваабаронца,
• Алеся Руднік — паліталагіня і даследчыца, якую беларускі Следчы камітэт назваў адной з 20 «аналітыкаў Ціханаўскай»,
• Ігар Банцэр — музыка і былы палітзняволены,
• Таццяна Кулевіч — жонка журналіста Руслана Кулевіча,
• Вольга Вялічка — псіхолаг, дырэктарка дзіцячага хоспіса,
• Вадзім Саранчукоў — лідар партыі БНФ,
• Сяргей Верамеенка — актывіст Беларускай хрысціянскай дэмакратыі,
• Дзмітрый Фурманаў — былы палітзняволены,
• Карына Маліноўская — з’ехала ў Польшчу і прайшла трэніроўку ад BYPOL,
• Рэгіна Лавар — былая палітзняволеная з Іўя,
• Алесь Кіркевіч — журналіст,
• Юрый Дзяшук — журналіст з Бярозаўкі,
• Анджэй Пісальнік — журналіст і актывіст польскай меншасці,
• Пётр Анісімовіч — актывіст БНФ, атрымаў «хімію» і выехаў з Беларусі.
• Вольга Верамеенка — актывістка, сузаснавальніца гродзенскай крамы нацыянальнай сімволікі «Адметнасць».
• Вольга Івашына — актывістка, жонка палітвязня журналіста Дзяніса Івашына.

Гэта, відавочна, далёка не ўсе гродзенцы, хто можа быць у базе МУС Расіі.

Пра грамадзян Расіі ў базе звычайна пазначана, па якім артыкуле Крымінальнага кодэкса яны адшукваюцца. Аднак пра ўсіх знойдзеных намі гродзенцаў паказана толькі агульнае «адшукваецца па артыкуле КК» — без удакладненняў.

Даведацца, знаходзіцеся вы ці вашы знаёмыя ў вышуку ў Расіі, можна на сайце «Медиазона Беларусь».