Як мінімум 11 рашэнняў судоў за распаўсюд экстрэмісцкіх матэрыялаў стала вядома ў Гродзенскай вобласці. У Лідзе затрымалі дальнабойшчыка, пакуль ён быў на спаборніцтвах з дзіцем. У школе Гродна збіраюць прысмакі для фонду прарасійскага актывіста Талая. Рэдакцыя Hrodna.life вывучыла, што адбылося ў вобласці c 4 па 10 снежня.
Новыя палітвязні
Юрый Хлебавец, Віталій Цыдзік, Юрый Мінін, Валянцін Дуброўшчык, Алег Кекух з Гродна, Вадзім Гусев са Шчучына, Яўген Шуляк са Смаргоні на гэтым тыдні прызнаныя палітвязнямі.
Судзілі дырэктара і маці ў дэкрэце
Як мінімум 11 рашэнняў судоў за распаўсюд экстрэмісцкіх матэрыялаў стала вядома ў Гродзенскай вобласці. Іх штрафавалі на 20−30 базавых велічынь і арыштоўвалі на пяць і 15 сутак. Сярод тых, каго судзілі - маці траіх непаўналетніх дзяцей у дэкрэце, менеджара ПУП, бухгалтара, дырэктара ПУП.
Затрыманне ў Гродне
Жыхара Гродна затрымалі за распаўсюд экстрэмісцкіх матэрыялаў і рэгістрацыю ў чат-боце «План Перамога» ў 2021 годзе.
Экс-палітвязень Аляксей Галоўкін эвакуяваны з Беларусі
«Дзякуючы намаганням службы эвакуацыі фонду BYSOL і нашым партнёрам Аляксей сёння ў бяспецы», — напісаў Андрэй Стрыжак.
Новыя «тэрарысты»
Варнель Максім Дзмітрыевіч, Крошкін Кірыл Алегавіч і Сігіневіч Аляксандр Уладзіміравіч з Гродзенскай вобласці 4 снежня папоўнілі спіс «тэрарыстаў».
У Лідзе затрыманы дальнабойшчык
1 снежня ў Лідзе сілавікі затрымалі мужчыну, калі ён з дзіцем і жонкай былі на спаборніцтвах у спартыўна-аздараўленчым комплексе «Алімпія», паведамляе Telegram-канал «Задержания, суды в Лиде».
Мужчыне патэлефанавалі нібыта з ДАІ і паведамілі, што з яго машынай здарылася ДТЗ. Ён выйшаў і яго паклалі тварам у зямлю, надзелі кайданкі і павезлі ў Лідскі РАУС. Адбыўся суд — мужчыну арыштавалі 10 сутак. Яго возяць на прымусовыя працы.
Палітвязня Паўла Вінаградава зноў будуць судзіць
Пасяджэнне «Аб пераводзе ў папраўчую ўстанову іншага віду і змене ўмоў рэжыму» прайшло 6 снежня ў судзе Ваўкавыскага раёна. Суддзя — Мікалай Сяргейка, паведамляе Telegram-канал «Право имеют».
Павел Вінаградаў - актывіст і блогер, затрыманы ў канцы 2021 года ў сябе ў прыватным доме ў Беразіно. Паводле арт. 130 КК «Распальванне сацыяльнай варожасці або варожасці», ч.2 арт. 367 КК «Паклёп у дачыненні да Прэзідэнта Рэспублікі Беларусь» і арт. 342 КК «Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх» асуджаны на пяць гадоў калоніі.
У зняволенні на яго ціснулі — змяшчалі ў ШІЗА і ПКТ. Апошнія паўгода ў ваўкавыскай калоніі ён паўгода правёў у ШІЗА.
Сілавікі прыйшлі на шклозавод «Нёман» у Бярозаўцы
8 снежня на шклозаводзе «Нёман» у Бярозаўцы затрымалі супрацоўнікаў за распаўсюд экстрэмісцкіх матэрыялаў у інтэрнэце. Затрымалі каля 10 чалавек. Затрыманым пагражаюць суткі, штрафы і звальненні. Кіруе затрыманнямі, па словах адміністратараў, старшы ўчастковы інспектар маёр міліцыі Пятроўскі Іван Леанідавіч.
У школе Гродна збіраюць прысмакі для дзяцей Данбаса. Ініцыятар — фонд прарасійскага актывіста Талая
У Гродна 12 снежня прыязджае Аляксей Талай. У сувязі з яго прыездам бацькам гродзенскіх школьнікаў прапануюць паўдзельнічаць у «тэрміновым зборы дапамогі дзецям Данбаса» для фонду Талая. Прыносіць просяць прысмакі і сродкі асабістай гігіены.
У Гродне затрымалі двух мужчын: арганізатара мерапрыемстваў і інжынера
У Гродне затрымалі вядучага і арганізатара мерапрыемстваў Міхаіла Манькевіча. Таксама з ім затрымалі інжынера-канстуктара. Мяркуючы з відэа, да мужчын прыйшлі на іх офіс. Прычынай сталі падпіскі і распаўсюд экстрэмісцкіх матэрыялаў.
У Свіслачы перайменавалі гімназію імя Каліноўскага
Гімназію № 1 імя Кастуся Каліноўскага ў Свіслачы Гродзенскай вобласці перайменавалі ў гімназію № 1 імя Пашы (Праскоўі) Васіленкі. Пра гэта ў Telegram-канале паведаміла Вольга Бондарава.
У Гродзенскай вобласці з’явілася яшчэ адно экстрэмісцкае фарміраванне — назвалі кіраўніцу
Сетку Telegram-каналаў «Дятлово Для Жизни» прызналі экстрэмісцкім фарміраваннем. МУС 6 снежня 2023 года прыняў рашэнне «Аб прызнанні групы грамадзян экстрэмісцкім фарміраваннем і забароне яго дзейнасці».
