На Лідскай адкрылі краму нізкіх цэнаў “Спутнік”, на Кляцкова адкрыюць “Капеечку”, а ў Баранавічах пабудуюць свой гандлёвы цэнтр. Hrodna.life паглядзеў, якія гандлёвыя аб’екты адкрылі альбо плануюць адкрыць у Гродне.
У Баранавічах пабудуюць гандлёвы цэнтр
У мікрараёне Баранавічы, на скрыжыванні вуліц Ваўжэцкага і Пясочнай, плануюць пабудаваць гандлёвы цэнтр.
Гэта будзе аднапавярховы будынак у форме літары “Г” плошчай больш за 530 кв.м. У адным крыле будзе крама, а ў другім — аб’екты гаспадарчага абслугоўвання. Там можа размясціцца салон прыгажосці, рамонт адзення альбо пункт выдачы маркетплэйса. Плануюць добраўпарадкаваць тэрыторыі і арганізаваць побач паркоўку.
Калі пачнуць будаўніцтва, невядома. Зараз адбываюцца грамадскія абмеркаванні праекта.
На Кляцкова адкрыюць краму “Капеечка”
На вуліцы Кляцкова ў будынку былой крамы “Белмаркет” у гандлёвым цэнтры “Фламінга” адкрыюць краму “Копеечка”. Пра гэта стала вядома праз банэры з інфармацыяй аб пошуку супрацоўнікаў на фасадзе будынка. Калі адрыюць краму, дакладна не вядома.
На Лідскай адкрылі дыскаўнтар “Спутнік”
Краму “Спутнік” адкрылі на вуліцы Лідскай. Яна размяшчаецца насупраць інтэрнатаў недалёка ад скрыжывання вуліц Лідскай і Белуша. Гэта дыскаўнтар, які належыць уласнікам сеткі “Светофор”. У краме прадаюцца прадукты харчавання і гаспадарчыя тавары. Паводле газеты “Вячэрні Гродна”, асартымент тавараў большы, чым у крамах “Светофор”.
У краме працуе пяць кас. Сярод нязручнасцяў — складанасць выезду на вуліцу з вазком праз вузкія дзверы і высокі парог. Таксама каля крамы невялікая пракоўка, якую зрабілі падчас рэканструкцыі вуліцы Лідскай. Але пакінуць аўто можна каля суседняй крамы “Хіт!”.
