12 пунктаў ад відэааблогера з Гродна — пра тое, чаму ў Беларусі памерла здымка з паветра

Новыя правілы здымкі з дрона ў Беларусі, якія з’явіліся ў чэрвені 2023 года, змены ў Паветраны кодэкс Беларусі і ўказ Лукашэнкі ад 25 верасня «Аб дзяржаўным уліку і эксплуатацыі грамадзянскіх беспілотных лятальных апаратаў» сталі фактычна забаронай на здымку з паветра. Відэа з апісаннем таго, што трэба зрабіць для звычайнай гарадской здымкі замест, уласна, самой здымкі, з’явілася ў YouTube-канале «Михалыч».

Яго аўтар — гродзенскі відэаблогер пад нікам @belarus01. На канале размешчана 169 відэа. Падпісчыкаў - 2,11 тысячы. Сярод іншага кантэнту ён часта размяшчаў здымкі найбольш важных будоўляў у Гродне і іх дынамікі. Відэа «Галоўныя будоўлі Гродна (лістапад-2023)» — іншае, пра тое, чаму яно не з’явілася.

«Вы маглі б паглядзець новае відэа з галоўнымі будоўлямі горада Гродна, аднак я, згодна з новымі правіламі…» — такім тэкстам яно пачынаецца.

Далей, таксама на чорным фоне, аўтар пералічвае, што ён не зрабіў, але мусіў бы ў адпаведнасці з апошнімі зменамі заканадаўства адносна здымкі з дрона.

Чаму ж блогер не зняў відэа пра Гродна?

1. Не стаў індывідуальным прадпрымальнікам ці не стварыў арганізацыю з адпаведным відам дзейнасці.
2. Не прадаў (не падарыў, не перадаў) ва ўласнасць створанай арганізацыі або ІП дрон.
3. Не прайшоў навучанне на адкрытую і спецыяльную катэгорыі. Тэрмін навучання — 2 тыдні, кошт навучання — каля 700 рублёў.
4. Не зарэгістраваў дрон у Дэпартаменце па авіяцыі і не атрымаў прысвоены дрону бартавы нумар.
5. Не атрымаў афіцыйны дазвол (пісьмовы) ад Дэпартамента па авіяцыі, якое дае права эксплуатаваць дрон.
6. Не падрыхтаваў ацэнку аперацыйных рызык пры эксплуатацыі дрона.
7. Не заключыў Дагавор на абслугоўванне з РУП «Белаэранавігацыя» (60 рублёў за месяц).
8. Не падаў заяўку і не атрымаў дазволу на выкарыстанне паветранай прасторы ад РУП «Белаэранавігацыя» (мінімум за 2 гадзіны і максімум за 5 дзён, праз асабісты кабінет).
9. Не падрыхтаваў заяву і не атрымаў дазвол ад Генеральнага штаба ВСРБ на правядзенне аэра-фотаздымкі (калі дрон будзе перасякаць зону з абмежаваннямі або забароненую зону, неабходна атрымаць пісьмовы дазвол ва ўладальніка «забароненай» зоны).
10. Не ўзгадніў палёт з мясцовым выканаўчым камітэтам (пісьмова).
11. Не выканаў 10 пунктаў checklist -a, непасрэдна перад і пасля палёту, а менавіта:
    • не атрымаў умовы палёту ў 570-ым цэнтры арганізацыі паветранага руху (за 1,5 гадзіны);
    • не праінфармаваў 570-ы цэнтр арганізацыі паветранага руху аб пачатку палёту (за 10−15 хвілін). Пры неабходнасці, Цэнтр мае права запатрабаваць ад Вас паінфармаваць іншых зацікаўленых асоб;
    • не праінфармаваў бліжэйшае падраздзяленне СПА аб пачатку працы на дроне;
    • не праінфармаваў 570-ы цэнтр арганізацыі паветранага руху аб заканчэнні палёту на дроне;
    • не праінфармаваў бліжэйшае падраздзяленне СПА аб заканчэнні палёту на робат.
12. Не купіў DVD-дыск і не накіраваў зняты матэрыял у канверце, поштай у адрас Генеральнага штаба ВСРБ для праверкі яго спецыяльнай камісіяй на прадмет наяўнасці матэрыялаў, абмежаваных або забароненых да распаўсюджвання. ТОЛЬКІ ПАСЛЯ АТРЫМАННЯ АКТА ПРАВЕРКІ ДАЗВАЛЯЕЦЦА ПУБЛІКАВАЦЬ АДСНЯТЫ МАТЭРЫЯЛ!

«Калі мы сёння ўбачым відэа з дрона, адзнятае напярэдадні, можна толькі нізка пакланіцца службовым асобам усёй сістэмы, якая выдае дазволы на палёт, або пазайздросціць здольнасцям да планавання ўладальніка дрона», — так аўтар рэзюмаваў сваё відэа аб няздзейсненай здымцы. У адказ на адзін з каментароў пад відэа ён прызнае: «Зараз з паветра можна здымаць толькі з паветранага шарыка ці паветранага змея (і гэта не жарт)».

Пры гэтым таксама ў каментарах аўтар канала піша: «Нацыянальная бяспека павінна падтрымлівацца, і з гэтым я згодзен».

Папярэдняя здымка з дрона гродзенскіх будоўляў была зроблена ў жніўні 2023 года.

У аўтара канала — праўладная пазіцыя?

У сваім канале блогер публікаваў відэа, знятыя ў паветра: як выглядаюць асноўныя будоўлі ў Гродне і што на іх змянілася, населеныя пункты Гродзенскай і іншых абласцей, пейзажы, святы ў розных гарадах, у тым ліку мерапрыемствы, прысвечаныя памяці Другой сусветнай вайны, здымкі з Дня пажарнай службы, розныя мерапрыемствы гродзенскіх пагранічнікаў, напрыклад, прыняцце прысягі.

Ёсць на канале і 30-хвіліннае відэа пра падзеі 2021 года, калі тысячы недакументаваных мігрантаў, якія прыехалі ў Беларусь, сілай спрабавалі прарвацца ў Польшчу праз мяжу. Яно называецца «Крызіс на мяжы (30 хвілін пра беларускае і еўрапейскае стаўленне да ўцекачоў)». На кадры, знятыя з паветра, накладзена драматычная музыка і тэкст аб тым, як беларускі афіцыйны бок дапамагаў мігрантам.

Таксама ў апісанні відэа аўтар сцвярджае, што Польшча тады «ігнаравала вяршэнства права і дэклараваныя прынцыпы гуманізму». «Нягледзячы на ​​аказваемую пасільную дапамогу беларускім бокам і прапановы прайсці на тэрыторыю Беларусі, іншаземцы заставаліся на лініі граніцы ў надзеі рэалізаваць свае правы. Польшча, у сваю чаргу, замест дапамогі і абароны прымяняла фізічную сілу, зброю, слёзацечны газ і вадамёты, пад якімі апынуліся жанчыны, дзеці і журналісты», — піша ён.