Хлору больш у 9,5 разоў, няма ўмоў для асабістай гігіены. Якія праблемы знайшлі ў басейнах Гродзенскай вобласці (абноўлена)

У кастрычніку санстанцыя праверыла басейны Гродна. «У цэлым» ваду палічылі бясшкоднай, хаця ў некаторых пробах знайшлі перавышэнне рэшткавага свабоднага хлору да 9,5 разоў ад нарматыўнага. Як зразумець, што вада для вас небяспечная?

Абноўлена 23 лістапада: праверкі праходзілі на тэрыторыі Гродзенскай вобласці, а не ў Гродне, удакладніла выданне S13.

Правяральнікі сустрэлі ў гродзенскіх басейнах парушэнні:

• не ва ўсіх басейнах супрацоўнікі кантралявалі стан здароўя наведвальнікаў і выкананне імі правілаў асабістай гігіены;
• не было ўмоў для выканання наведвальнікамі правілаў асабістай гігіены;
• не кантралююцца параметры мікраклімату (тэмпература, адносная вільготнасць, хуткасць руху паветра) для іх адпаведнасці нормам;
• лабараторны кантроль за паказчыкамі бяспекі і бясшкоднасці вады ў басейнах не быў своечасовым;
• не было лакальных прававых актаў, якія вызначаюць, што рабіць, калі вада не адпавядае вызначаным гігіенічным нарматывам, ці калі трапяць нейкія забруджвальнікі;
• столь і сцены ў залах басейна, распранальнях і душавых былі ў дрэнным стане.

А што з вадой?

«У цэлым» якасць вады басейнаў паводле бяспекі і бясшкоднасці прызналі адпаведнай патрабаванням гігіенічнага нарматыву, зацверджанага Саветам міністраў.

А вось па выніках лабараторных даследаванняў пробы вады з некаторых басейнах паказалі перавышэнне рэшткавага вольнага хлору ў 1,5−9,5 разоў ад нарматыўнага, хларыд-іёна — у 2,5−3,0 разы. Такія лічбы сведчаць аб парушэннях рэжыму дэзінфекцыі вады.

Наколькі шкодны хлор у вадзе і для каго

У санстанцыі адзначылі, што ў большасці выпадкаў хлор у басейне не нясе сур’ёзнай шкоды здароўю. Але пры значным перавышэнні нормы дзяцей і людзей, адчувальных да хлору, алергікаў, астматыкаў могуць чакаць сур’ёзныя наступствы.

Найбольш частыя сімптомы перадазавання хлору такія:

• алергічны дэрматыт;
• абвастрэнне для стану скуры пры наяўнасці экзэмы або псарыязу;
• абцяжаранае дыханне, кашаль, астматычны прыступ;
• боль у жываце, млоснасць, ваніты.

Чытайце таксама:

• У Гродне нарэшце адновяць басейн «Лазурный»: там з’явяцца два серпантыны, джакузі і хуткая рака
• Басейн з відам на М6 і зала для міжнародных спаборніцтваў. У Гродне прэзентавалі новы спарткомплекс