У Гродне знялі вулічныя паказальнікі з лацінкай: засталіся пустыя слупы

Турысты, якія прыехалі ў Гродна ў выхадныя 7-8 кастрычніка, замест турыстычных паказальнікаў пабачылі пустыя слупы. Раней там былі знакі з паказаннем накірункаў, назвамі вуліц і славутасцей. Зверху інфармацыя была напісаная на беларускай мове кірыліцай, а ўнізе – лацінкай. Пра гэта расказала “Наша Ніва”.

Паводле інфармацыі Hrodna.life, першыя знакі з надпісамі беларускай лацінкай пачалі здымаць у гістарычным цэнтры Гродна ў канцы верасня 2023.

“Наша Ніва” апублікавала фота пустога слупа на вуліцы Ажэшкі, раней размешчанае ў сацсетках. Паводле фотаздымкаў сервіса “Люстэркі” (“Зеркала”) ад “Яндекс. Карты” паказальнікі былі на месцы яшчэ 3 кастрычніка. А менш чым праз тыдзень ужо зніклі.

Пры гэтым зніклі не толькі надпісы беларускай лацінкай, такія як “vul. Lienina”, але і надпісы па-англійску “Railway station” і “Lutheran church”.

Магчыма, старыя паказальнікі заменяць варыянтамі з іншым дызайнам. Прыклад можна пабачыць у Каложскім парку, а таксама на вуліцы Ажэшкі бліжэй плошчы Леніна (на фота ніжэй). У новым варыянце дызайна бачныя мініяцюры турыстычных аб’ектаў, а надпісы зробленыя на беларускай мове і прадубляваныя на англійскай.

Як у Беларусі змагаюцца з лацінкай

У жніўні 2022 года праўладная актывістка з Гродна Вольга Бондарава прапанавала прыбраць дубляванне назваў гарадскіх аб’ектаў лацінкай. «Разам абаронім краіну ад калабарацыяністаў!», — напісала жанчына ў сваім Telegram-канале.

У красавіку 2023 года ў Беларусі забаранілі выкарыстоўваць лаціку ў геаграфічных назвах. Тады прычынай назвалі неабходнасць умацавання гістарычна-культурнай супольнасці беларускага народа і недапушчэнне прасоўвання чужых пісьмовых традыцый і культурных каштоўнасцей.

Да канца 2023 года ў Беларусі павінны знікнуць усе надпісы беларускай лацінкай.