На грамадскія абмеркаванні паўторна выставілі справаздачу аб уплыве на навакольнае асяроддзе перабудовы казармаў XIX ст. на Шчорса, 2 і 4. У новым праекце раптоўна вырасла колькасць паверхаў і кватэр. Нягледзячы на забарону неабгрунтаванай змены фасадаў, забудоўшчык вырашыў пашырыць гістарычныя вокны.
Былыя царскія казармы перарабляюць на клубны комплекс (элітнае жытло). Зараз абодва будынкі хочуць перарабіць на трохсекцыйныя, трох- і чатырохпавярховыя (раней планавалі двухпавярховыя і мансардны паверх у адным з іх), заўважыў канал Urban Hrodna.
На Шчорса, 2 паводле новай справаздачы будзе 39 кватэр і паркоўка на 58 машынамесцаў, на Шчорса, 4 — 52 кватэры і паркоўка на 33 месцы. У папярэдняй справаздачы АУНА гаворка ішла пра 30 і 45 кватэр адпаведна і падземныя гаражы на 12 месцаў у кожным будынку.
У новым АУНА разглядалі безальтэрнатыўнае размяшчэнне пляцоўкі будаўніцтва і рэалізацыю праекта або поўную адмову ад яго.
Што яшчэ не так з праектам
Грамадскае абмеркаванне самога праекта ладзілі ў лістападзе 2022. Пасля яго праект амаль не змяніўся: ад няслушнага пашырэння арыгінальных вокнаў на першым і другім паверхах не адмовіліся. Такія змены моцна сказяць архітэктурны выгляд будынкаў XIX ст. Пры тым, ва ўмовах продажу будынкаў новым уласнікам была забарона на неабгрунтаваныя змены фасад, бо казармы — шэраговая гістарычная забудова, якая ахоўваецца.
Гісторык Мечыслаў Супрон прыводзіў прыклады перабудовы падобных казармаў у аб’екты грамадскага прызначэння і жылля ў Польшчы і Літве. Знешні выгляд там пакідалі нязменным, што не перашкаджае іх эксплуатацыі.
Да перабудовы казармы ў Гродне захаваліся ў арыгінальным выглядзе, што вельмі рэдкая ў Беларусі з’ява.
Калі пройдуць новыя абмеркаванні
Новыя абмеркаванні адбудуцца ў кастрычніку-лістападзе (дакладных датаў пакуль няма). Папярэднія праходзілі вясной. Сустрэчу для абмеркавання справаздачы АУНА правядуць толькі ў выпадку, калі будуць звароты ад грамадзян. У такім разе пры патрэбе на дапрацоўку АУНА дадуць яшчэ тыдзень.
Дзяржаўную экспертызу справаздача па АУНА ў складзе праектнай дакументацыі пройдзе ў лістападзе. Яна зойме месяц.
Рашэнне па планаванай дзейнасці мусяць прыняць у снежні 2023 года.
Да забудоўшчыка — шмат пытанняў
Кампанія-забудоўшчык — PObudowa («Палессежылбуд»). Яны выкупілі казармы ў 2022 годзе са зніжкай у 80%.
На пакупку кватэр у будучым ЖК ужо вядуць папярэдні запіс. Раней продаж збіраліся адкрыць у канцы ліпеня 2023 года. Кампанія таксама будуе ў Гродне квартал «Аўгустоўскі» ў Баранавічах-9 каля вуліцы Ткацкай (траса ў бок Аўгустоўскага канала) і двухсекцыйную высотку на Магістральнай. Акрамя таго кампанія выкупіла Дом афіцэраў, які да таго спрабавалі прадаць больш за 20 разоў.
Да праектаў «Палессежылбуда» ёсць шмат пытанняў. Кампанія будуе і рэканструююе будынкі ў розных гарадах Беларусі. Часам — зусім не згодна з іх пачатковым выглядам, нават калі яны размешчаны ў гістарычным цэнтры горада.
