На Дзятлаўскім заводзе. Фота ілюстрацыйнае: БелТА
У Беларусі істотна абнавілі Працоўны кодэкс. Частка пунктаў набылі сілу пасля афіцыйнага апублікавання, частка запрацуе з 1 студзеня 2024 года. Якія асноўныя змены чакаюць беларусаў, разбіралася «Наша Ніва».
Паводле абноўленага кодэксу заробак абавязаны выплочваць не радзей за два разы на месяц. У тым ліку і тым работнікам, якія працуюць па кантрактах, дзе прапісана выплата адзін раз на месяц. Змены ў кантракты трэба будзе ўнесці да 1 студзеня 2024 года.
Адпускныя можна выплочваць не пазней чым за 2 дні да пачатку адпачынку. Зараз гэта будзе тычыцца толькі адпачынкаў паводле графіка. У іншых выпадках, напрыклад, пры пераносе адпачынку, адпускныя абавязаны выплаціць — са згоды работніка — не пазней за 2 працоўныя дні ад дня пачатку адпачынку.
У зменах вызначылі правілы скарачэння перадсвяточнага працоўнага дня для тых, хто працуе няпоўны дзень. Перадсвяточны дзень будуць скарачаць прапарцыйна колькасці гадзін няпоўнага працоўнага часу. Напрыклад, калі чалавек працуе на 0,5 стаўкі (4 гадзіны), то перадсвяточны працоўны дзень для яго скароціцца на 30 хвілін.
Зараз тыя, хто працуе па нерэгулярным графіку, могуць працаваць больш за 10 гадзін на працягу працоўнага дня. Раней гэта было забаронена.
Таксама — толькі па ўласным жаданні работніка — можна адмовіцца ад перапынку для адпачынку і харчавання, калі працоўны дзень не перавышае 4 гадзін.
Шматдзетным бацькам дазволілі па ўзгадненні з наймальнікам скараціць працягласць штодзённай працы на адну гадзіну замест вызвалення ад працы на адзін дзень на тыдзень. Умова — гэта не будзе замінаць працы арганізацыі.
З’явіцца адпачынак для завяршэння работы над кваліфікацыйнай навуковай працай (дысертацыяй) на атрыманне вучонай ступені доктара навук. У кодэксе гэта замацоўваецца артыкулам 187. Такі адпачынак можна будзе ўзяць аднаразова, максімум на 30 дзён. Даць такі адпачынак наймальнік абавязаны па жаданні работніка, з захаваннем сярэдняга заробку.
На час паступлення ва ўстановы адукацыі для атрымання навукова-арыентаванай адукацыі (аспірантуру) таксама абавязаны даваць адпачынак, але ўжо без захавання заробку. Адпачынак для паступлення можна ўзяць максімум на 12 каляндарных дзён.
Работнікі набываюць права праходзіць дыспансерызацыю ў арганізацыях аховы здароўя ў працоўныя дні. Работнікі будуць вызваляцца ад працы. Пры гэтым за імі захаваюць месца працы, пасаду і сярэдні заробак. Колькасць дзён на дыспансэрызацыю наўпрост залежаць ад узросту.
Супрацоўнікам ва ўзросце да 40 гадоў даецца 1 працоўны дзень раз на 3 гады.
Супрацоўнікам, старэйшым за 40 гадоў — 1 працоўны дзень раз на год.
Для тых, каму да пенсіі засталося менш за 5 гадоў, і пенсіянераў, якія працуюць, вылучаюць 2 працоўныя дні раз на год.
Поўны спіс зменаў у Працоўным кодэксе апублікаваны на Нацыянальным прававым партале. Нарматыўныя акты трэба прывесці ў адпаведнасць са змененым кодэксам да 1 лютага 2024 года.
Чытайце таксама:
Новы сувенір у выглядзе "раскладанкі" са знакавымі аб'ектамі Гродна ствараюць улады. Яго выканаюць у выглядзе…
Некалькі сотняў Дзядоў Марозаў, Снягурак, сабачак, вавёрачак і разнастайных іншых персанажаў 20 снежня прайшлі ад…
Трохпакаёвая кватэра знаходзіцца на вуліцы Савецкіх Пагранічнікаў. Сцены ў ёй абвешаныя рэпрадукцыямі, дзвярныя праёмы выкананы…
Спецыяльнае праграмнае забеспячэнне для сачэння за актыўнасцю ў камп'ютарах закупляе Гродзенскае агенцтва па дзяржаўнай рэгістрацыі…
У Гродне рэканструююць тэрыторыю, прылеглую да вадаёма па вул. Рэпіна. Там жа ўладкуюць дзіцячую інклюзіўную…
У Гродне адкрылася выстава, прысвечаная мясцоваму ўраджэнцу мастаку Льву Баксту. Экспазіцыю размясцілі ў харальнай сінагозе,…