Як мінімум восем затрыманняў прайшло на гэтым тыдні ў Гродзенскай вобласці. Палітвязень Анджэй Пачобут не атрымлівае лекі для сэрца і не можа тэлефанаваць дадому. Палітвязню Андрэю Сачэўка змянілі меру пакарання — замест калоніі яго адправілі ў турму. Рэдакцыя Hrodna.life вывучыла, што адбылося ў вобласці з 28 жніўня па 3 верасня.
Затрыманні
- Намесніка дырэктара ТАА «КліматМайстар» затрымалі за рэгістрацыю ў плане «Перамога». Відэа з затрыманнем з’явілася на канале сілавікоў 31 жніўня. Мужчына гаварыў на відэа па-беларуску.
- Гродзенская міліцыя затрымала грамадзяніна Туркменістана з відам на жыхарства ў Беларусі. Яго затрымалі за распаўсюд экстрэмісцкіх матэрыялаў ВКонтакте і абразлівыя для грамадзян Расіі каментары пад публікацыямі ў Instagram.
- У пункце выдачы Wildberries на рынку «Карона» ў Гродне затрымалі супрацоўніка Дзяніса Швыркіна. У відэа на канале сілавікоў ён кажа, што затрыманы за распаўсюд «экстрэмісцкіх матэрыялаў». Ролік апублікавалі 3 верасня, але затрыманне, верагодна, адбылося раней. Вядома, што ўжо 30 жніўня Дзяніса судзілі па арт. 19.11 КаАП якраз за «экстрэмізм».
- Слесар па зборцы металаканструкцый затрыманы ў Гродне. Па словах мужчыны, яго затрымалі за распаўсюд экстрэмісцкіх матэрыялаў у сацсетках. Таксама ў 2020 годзе ён удзельнічаў у мітынгах і выходзіў на праезную частку са сцягам. Відаць, яго апазналі па фота «Свабоды».
- На працы ў лесе затрымалі жыхара Свіслачы — майстра ў лясгасе. Ён нібыта знаходзіўся ў «экстрэмісцкіх» Telegram-каналах і напісаў больш за 4000 каментароў. У іх ён нібыта заклікаў да псавання маёмасці супрацоўнікаў міліцыі і негатыўна выказваўся на адрас кіраўніцтва краіны.
- Затрымалі супрацоўніка «Гродзенскага шклозавода» — за абразлівыя каментары ў адрас кіруючых асоб, размешчаныя ў сацсетках. Сілавікі паведамілі, што змясцілі мужчыну ў ІЧУ.
- На фестывалі LIDBEER затрымалі наведвальнікаў. 2 верасня на фестывалі LIDBEER каля 18: 00−19: 00 затрымалі двух мужчын 35−40 гадоў. Яны крыкнулі «Жыве Беларусь!». Іх затрымалі амапаўцы і даставілі ў РАУС, паведамляе Telegram-канал «Задержания, суды в Лиде». Адзін з іх вярнуўся на фестываль і паведаміў, што другому прад’явілі арт.24.23 КаАП «Парушэнне парадку арганізацыі або правядзення масавых мерапрыемстваў» і штраф 500 рублёў. Telegram-канал сцвярджае, што затрыманага на фестывалі будуць судзіць 5 верасня яшчэ і паводле арт.19.11 КаАП у судзе Лідскага раёна. Гэта Юрый Шылкоўскі.
Палітвязень Анджэй Пачобут не атрымлівае лекі для сэрца і не можа тэлефанаваць дадому
Пра гэта намеснік старшыні Саюза палякаў Беларусі Марэк Занеўскі распавёў radiounet.fm на акцыі салідарнасці ў Беластоку.
«Што тычыцца Анджэя, на жаль, сітуацыя вельмі цяжкая. Наступныя шэсць месяцаў правядзе ў камеры для пакарання, беспадстаўна кінуты туды. Так што сітуацыя пагаршаецца. <…>
Найвялікшая праблема на сёння — гэта адсутнасць інфармацыі, бо да Анджэя не можа трапіць адвакат, не даходзяць лісты, яго пазбавілі магчымасці тэлефанавання дадому. І гэта стварае найвялікшую праблему, бо мы не ведаем, дзе ён цяпер, у якім ён стане і што ўвогуле там з ім дзеецца.
З той інфармацыі, што да нас даходзіць, ён на шэсць месяцаў асуджаны знаходзіцца ў камеры пакарання ў калоніі і не атрымлівае лекі для сэрца, якія патрабуе кожны дзень. Гэта таксама прымушае вельмі непакоіцца".
Палітвязню Андрэю Сачэўка змянілі меру пакарання — замест калоніі яго адправілі ў турму
На мінулым тыдні адбыўся судовы працэс па пераводзе палітвязня з Гродна на турэмны рэжым. Верагодней за ўсё, далейшае пакаранне ён будзе адбываць у магілёўскай турме № 4, паведамляе MAYDAY TEAM.
У бабруйскай папраўчай калоніі № 2, дзе адбываў свой тэрмін Сачэўка, на яго аказваўся вялікі ціск з боку супрацоўнікаў і адміністрацыі.
Так, у пачатку жніўня мужчыну адправілі ў памяшканне камернага тыпу на два месяцы. Да гэтага Сачаўка пратрымалі 23 сутак у штрафным ізалятары. Яшчэ тады яму заявілі, што на яго будуць ціснуць праз ягоныя «няправільныя погляды».
Новыя «экстрэмісты»
Палішэвіч Дзмітрый Генадзевіч, Савашынская Ірына Мікалаеўна, Паўленка Аляксей Мікалаевіч з Гродна, Піцко Людміла Іванаўна з Гродзенскага раёна папоўнілі «спіс экстрэмістаў» 25 жніўня.
Новыя палітвязні
Вячаслаў Янюк з Гродна 1 верасня быў прызнаны палітвязнем. Яго асудзілі на пяць гадоў калоніі за «масавыя беспарадкі» паводле ч.1 арт. 293 КК.
Бондарава прапануе забараніць валошкі
«Інфаказачка» з Гродна Вольга Бондарава знайшла новы сімвал, які палічыла крамольным — валошку. На яе думку, выкарыстанне валошкі як сімвала Беларусі - гэта «наступаць на нацысцкія граблі». Яна нават прапанавала альтэрнатыву.
Іменем Эміля Чачко назавуць вуліцу ў цэнтры Гродна
Безыменны праезд побач з Генеральным консульствам Польшчы ў Гродне атрымае назву. Зараз ён будзе называцца праездам Эміля Чачко. Такое рашэнне прыняў гарадскі Савет дэпутатаў 30 жніўня 2023 года.
«Адкаціліся на 30 гадоў назад». Што здарылася з польскамоўнай адукацыяй на Гродзеншчыне?
У былых польскіх школах у Гродне і Ваўкавыску дзеці могуць вывучаць польскую мову толькі адну гадзіну ў тыдзень. Дом польскі ў Баранавічах, дзе існавала прыватная польская школа, закрыты. Пра праблемы польскай адукацыі ў Беларусі расказала Радыё Ўнэт Ганна Кетліньска, кіраўнічка Падляскага аддзелу арганізацыі «Вспульнота польска», якая шмат гадоў супрацоўнічае і падтрымлівае палякаў у Беларусі.
У Гродне затрымалі супрацоўніцу камітэта судовых экспертыз — падпалкоўніка юстыцыі
У Гродне ўзялі пад варту падпалкоўніка юстыцыі Юлію Колас. Яе абвінавачваюць у абразе прадстаўніка ўлады па арт. 369 КК. Гродзенку 29 жніўня прызналі палітвязняволенай.
Таксама палітвязням прызналі Аляксандра Бірэту — ён асуджаны на два гады калоніі паводле арт. 369 КК «Абраза прадстаўніка ўлады», арт.368 УК «Абраза прэзідэнта Рэспублікі Беларусь», арт. 188 КК «Паклёп», арт. 367 КК «Паклёп у дачыненні да Прэзідэнта Рэспублікі Беларусь».
Прадпрымальніка з Зэльвы асудзілі на тры гады калоніі. Яго збілі пры затрыманні
Зэльвенскага прадпрымальніка і праваабаронцу Віктара Ламеку асудзілі на тры гады калоніі агульнага рэжыму. Прысуд вынеслі ў судзе Зэльвенскага раёна 31 жніўня. Яго асудзілі за паклёп і абразу на адрас Аляксандра Лукашэнкі па арт.367 КК і арт. 368 КК.
«Нам казалі: „Я падтрымліваю цяперашнюю ўладу“». Як сем «Хранителей» па вечарах ратуюць беларусаў ад крыміналак
Тры месяцы каманда «Хранители» піша сотням беларусаў паведамленні з інструкцыямі, як пазбегнуць пераследу за «палітыку». Гэта ў вольны час робяць сем валанцёраў з гродзенскага рэгіёна — праграмісты, удзельнікі дваровых ініцыятыў, былыя палітвязні. Рэдакцыя Hrodna.life пагаварыла з членамі каманды і распавядае (наколькі гэта магчыма для іх бяспекі), як уладкавана іх праца.
Гродзенцаў пачалі выклікаць у ДФР за данаты ў BYSOL
Сілавікі пачалі выклікаць людзей ва ўпраўленне Дэпартамента фінансавых расследаванняў па Гродзенскай вобласці за данаты ў BYSOL праз Facebook. Гэта «тэндэнцыя» рэпрэсій апошніх некалькіх дзён. Пра гэта Hrodna.life падчас інтэрв'ю распавяла ініцыятыва «Хранители».
