Фота з допісу Бондаравай
«Інфаказачка» з Гродна Вольга Бондарава знайшла новы сімвал, які палічыла крамольным — валошку. На яе думку, выкарыстанне валошкі як сімвала Беларусі - гэта «наступаць на нацысцкія граблі». Яна нават прапанавала альтэрнатыву.
«Якія былі сімвалы ў беларускіх нацыстаў пад Гітлерам? — Бчб і васілёк. Ну няўжо нельга хоць на імгненне ўключыць галаву і зазірнуць углыб гісторыі, хаця б пры выбары сімволікі? Гэта так складана — не танчыць на граблях?», — абураецца яна ў сваім канале.
Вольга Бондарава — праўладная актывістка з Гродна, раней судзімая за кантрабанду цыгарэт у Польшчу. Называе сябе «інфаспецназаўкай». Актыўна змагаецца з усімі, хто выступаў супраць рэжыму, а таксама з кнігамі, мастакамі, гістарычнымі асобамі, лацінкай, помнікамі і нават монстрамі. З верасня 2022 — студэнтка педуніверсітэта па спецыяльнасці «Беларуская мова і літаратура». Некаторыя яе захады асудзілі нават дэпутат Ігар Марзалюк і намесніца кіраўніка гродзенскага абласнога аддзялення партыі «Белая Русь» Святлана Вараніца.
Альтэрнатывай Бондарава бачыць каласы, серп і молат.
«Не спрачаюся, васілёк — прыгожая кветка. Але колькі можна рабіць памылкі, таварышы? Каласы, серп і молат у якасці сімвалаў — не? Кляты „совак“ папулярызаваць нельга? А Рэйх, значыць, не так стромна?!».
Валошку сапраўды шырока і даўно ўжываюць як неафіцыйны сімвал Беларусі, пры тым менавіта дзяржаўныя і калядзяржаўныя інстытуты.
«Василек (валошка) по праву может считаться национальным цветком. Он олицетворяет белорусский народ: скромный, дружелюбный и гостеприимный,» — напісана ў выданні «Символы Беларуси» (2020 г., выдавецтва «Белорусская Энциклопедия имени Петруся Бровки»). Кветка выкарыстана ў дызайне вокладкі гэтай кнігі.
З 1994 года васілёк з’яўляецца сімвалам БЕЛКАРТ (плацежнай сістэмы Беларусі на аснове банкаўскіх плацежных картак). Памятная манета з выявай васілька ўваходзіць у серыю «Кветкі Беларусі». Валошка з’яўляецца часткай лагатыпа нацыянальнай авіякампаніі «Белавія», выява змешчана на самалётах і брэндаваных рэчах.
Рэалістычны вобраз валошкі як сімвал радзімы і найлепшых якасцяў беларусаў быў пакладзены ў аснову афармлення афіцыйных мерапрыемстваў, прымеркаваных да Дня Незалежнасці ў 2021 годзе. А годам раней для гэтага ўжывалі графічны вобраз кветкі. У 2022 годзе валошка была галоўным сімвалам XXXI фестывалю «Славянскі базар». Летась у мінскім парку Дружбы народаў 800 кустоў кізільніка высадзілі ў форме пялёстка васілька, «каб сімвалічна падкрэсліць ідэю блакітнага неба і сініх азёр Беларусі».
Чытайце таксама:
Пакуль сады толькі заквітнеюць, ва ўстановах і крамах Гродна падрыхтавалі вясновыя фотазоны. Часта гэта гронкі…
На Савецкай вуліцы каля 80% падвалаў задзейнічаны пад бізнес, прыводзіць статыстыку газета “Гродзенская праўда”. Пры…
Уладальнікі гродзенскіх кавярань «Крепкий белый» і «Крепкий черный» запускаюць школу барыста. Летась арганізатары ўжо праводзілі…
Гродзенец Ігар Апякун канструюе мэблю для круізных лайнераў - стварае прататыпы праз спецыяльную праграму. Ігар…
Кніга «Удивительный Гродно» Яўгена Аснарэўскага выйшла ў мінскім выдавецтве «Рыфтур». Даведнік разлічаны і на турыстаў,…
Як мінімум дзве гродзенскія кавярні, My Lover Berry і «Крепкий белый», вырашылі апрабаваць новы фармат…