Генеральнага дырэктара «Гроднааблкінавідэапраката» Юрыя Аляксея прызначылі генеральным дырэктарам студыі «Беларусьфільм», паведаміла БелТА.
Хто такі Юрый Аляксей
Юрый Аляксей — гродзенскі БРСМавец, чыноўнік, ідэолаг, сенатар. Скончыў Беларускі камерцыйны інстытут кіравання па спецыяльнасці юрыст, Гродзенскі дзяржаўны аграрны ўніверсітэт па спецыяльнасці эканаміст-менеджар, Акадэмію кіравання пры Прэзідэнце (спецыяліст у галіне дзяржаўнага кіравання).
З БРСМ — у ідэолагі, з ідэолагаў - у сенатары
Працаваў:
- фатографам у Гродзенскім прафесійна-тэхнічным вучылішчы № 74,
- тэхнікам-рэнтгенолагам Гродзенскай абласной клінічнай бальніцы,
- галоўным спецыялістам, начальнікам аддзела патрыятычнага выхавання, спорту і вольнага часу моладзі Гродзенскага гарадскога камітэта Беларускага патрыятычнага саюза моладзі,
- другім сакратаром Гродзенскага гарадскога камітэта Беларускага рэспубліканскага саюза моладзі,
- галоўным спецыялістам, намеснікам загадчыка аддзела культуры Гродзенскага гарадскога выканаўчага камітэта,
- галоўным спецыялістам упраўлення інфармацыі і друку, упраўлення ідэалагічнай работы Гродзенскага абласнога выканаўчага камітэта,
- першым сакратаром Гродзенскага абласнога камітэта Беларускага рэспубліканскага саюза моладзі.
З 2012 года быў генеральным дырэктарам камунальнага ўнітарнага прадпрыемства «Гроднааблкінавідэапракат». З 2012 па 2016 года быў членам Савета Рэспублікі.
Аляксей судзіўся з гродзенскімі СМІ
У 2017 годзе Юрый Аляксей падаваў у суд на гродзенскі блог s13.ru. Тады ўладальніка блога Сяргея Чабоцьку аштрафавалі на 50 базавых велічынь за выявы алкаголю ў дзвюх публікацыях на сайце. Парадаксальнасць сітуацыі была ў тым, што ініцыятара скаргі - «Гроднааблкінавідэапракат» — у лютым 2017 года таксама аштрафавалі па гэтым артыкуле.
У снежні 2017 года «Гроднааблкінавідэапракат» прайграў суд з Hrodna.life і студэнткай-практыканткай, якая ў аўтарскай калонцы на Hrodna.life раскрытыкавала рэпертуар гарадскіх кінатэатраў.
Чытайце таксама: Гродненский «Киновидеопрокат» проиграл суд с Hrodna.life и студенткой, раскритиковавшей городские кинотеатры
