Казармы на Шчорса пасля рэканструкцыі стануць клубнымі дамамі. Што гэта такое?

Комплекс з двух жылых дамоў, якія зробяць з казармаў XIX ст. пасля рэканструкцыі, назвалі Double V. Яго пазіцыянуюць як клубны. Двор будзе не проста закрыты ад машын, а закрытай тэрыторыяй з зонай адпачынку.

UPD. 10 чэрвеня «Палессежылбуд» паведаміла, што назву комплекса зменяць з Double V на «Аляксандраўскія». Гэта гістарычная назва гэтых казармаў, якая выкарыстоўвалася яшчэ ў царскія часы. «Важным складнікам рэканструкцыйных работ з’яўляецца захаванне гісторыі і яе інтэграцыя ў сучаснае архітэктурнае аблічча гарадской прасторы» — адзначылі ў архітэктурнай майстэрні «Палессежылбудпраект».

Што такое клубны дом?

Пад клубнымі дамамі на постсавецкай прасторы звычайна маюць на ўвазе элітную нерухомасць, адзначае канал Urban Hrodna.

Такая нерухомасць можа ўключаць ад 5 да 30 кватэр. Мяркуецца, што будучых суседзяў можна выбіраць, прынамсі, яны належаць да аднаго сацыяльнага класу. Часта клубныя дома выкупляюць ужо знаёмыя паміж сабой людзі. Раней падборам будучых жыхароў займаліся агенцтвы, нават ладзілі сумоўі з пакупнікамі. Зараз фільтрам выступае хутчэй кошт. Зазвычай планіроўку кватэр узгадняюць з будучымі пакупнікамі.

Сярод рысаў клубнага дома:

• адметныя архітэктура і дызайн,
• зручнае размяшчэнне,
• добрая інфраструктура.

У інфраструктуру клубнага дома могуць уваходзіць камінная зала, басейн, сауна, курыльня, фітнес-зала, більярдавая, артэзіянская свідравіна, пральня. Усё, што знаходзіцца на тэрыторыі такога дома, даступна толькі яго жыхарам.

Што праектуюць у казармах

Кожны з дамоў - былых казарм — будзе падзелены на 3 секцыі (пад'езды) з асобным уваходам і лесвічным маршам. На Шчорса, 2 плануюць размясціць 30 кватэр, на Шчорса, 4 — 45 кватэр. У кожным з будынкаў будзе ўбудаваны гараж на 12 месцаў.

• У 1-й секцыі 1-га паверха размешчаны 2 аднапакаёвыя кватэры-студыі па 31 і 41 кв.м, двухпакаёвая кватэра ў 51 кв.м і трохпакаёвая двухбаковая кватэра ў 74 кв. м.
• 2-я (цэнтральная) секцыя 1-га паверха ўключае парадны ўваход. Тут размяшчаны 3 аднапакаёвыя кватэры ад 30 кв.м і 4 трохпакаёвыя кватэры ад 71 кв.м2, дзве з якіх двухбаковыя.
• У 3-й секцыі размешчаны 2 аднапакаёвыя кватэры-студыі па 31 і 41 кв.м, двухпакаёвая кватэра ў 51 кв.м і трохпакаёвая двухбаковая кватэра ў 74 кв.м.

Нулявы (паўпадвальны) паверх зоймуць убудаваныя гаражы. Раней на ім абяцалі захаваць аўтэнтычную цэглу. Балконы 1-га паверха дома № 4 утвораць над імі тэрасу. Выхад на яе будзе толькі з трохпакаёвых кватэр. У доме № 4 будзе мансардны жылы паверх.

Вышыня столяў 1-га паверха — 3,8 м.

Панарамныя вокны супярэчаць гістарычнаму выгляду

У апартаментах прадугледжаны вялікія панарамныя вокны. Аўтэнтычныя вокны вырашылі пашырыць насуперак гістарычнай адпаведнасці будынкаў XIX ст. Пры тым да рэканструкцыі казармы дайшлі ў сваім арыгінальным выглядзе, што вельмі рэдкая ў Беларусі з’ява. Заўвагі гісторыка Мечыслава Супрона на этапе грамадскіх абмеркаванняў праекта гарадскія ўлады не ўлічылі.

Працы планавалі пачаць у лютым і завяршыць цягам 2023 г.

Кампанія-забудоўшчык — PObudowa («Палессежылбуд»). Яны выкупілі казармы ў 2022 годзе са зніжкай у 80%.

На пакупку кватэр у будучым ЖК ужо вядуць папярэдні запіс, хаця коштаў яшчэ няма. Кампанія таксама будуе ў Гродне квартал «Аўгустоўскі» ў Баранавічах-9 каля вуліцы Ткацкай (траса ў бок Аўгустоўскага канала) і збіраецца будаваць двухсекцыйную высотку на Магістральнай. Нядаўна кампанія выкупіла Дом афіцэраў, які да таго спрабавалі прадаць больш за 20 разоў.

Да праектаў «Палессежылбуда» ёсць шмат пытанняў. Кампанія будуе і рэканструююе будынкі ў розных гарадах Беларусі. Часам — зусім не згодна з іх пачатковым выглядам, нават калі яны размешчаны ў гістарычным цэнтры горада.