Ад пачатку 2023 улады сталі больш жорстка кантраляваць законнасць знаходжання замежнікаў на тэрыторыі Беларусі. А яшчэ ў 2021 для мігрантаў праводзілі на мяжы фестываль «Беларусь гасцінная» і арганізоўвалі часовае жытло.
Ад 15 да 17 лютага беларуская міліцыя праводзіла мерапрыемства «Нелегал». У Гродзенскай вобласці працавалі сумесна з Дзяржаўным памежным камітэтам. У выніку УУС выявіла 181 факт парушэння міграцыйнага заканадаўства. З іх 11 аднеслі да парушэння парадку працы.
Затрымлівалі грамадзян Туркменістана, Сірыі і Шры-Ланкі.
На адным з прадпрыемстваў працавалі пяць грамадзян Туркменістана. Іх прыцягнулі да адміністрацыйнай адказнасці і распачалі адміністрацыйны працэс супраць прадпрыемства.
Таксама сілавікі выявілі чатыры групы замежнікаў. Яны незаконна знаходзіліся ў Беларусі. Сярод іх 11 грамадзян Сірыі, 3 — Шры-Ланкі і асобы без грамадзянства, якія прыехалі з Палестыны.
Мігрантаў затрымалі ў Бераставіцкім і Гродзенскім раёнах, а таксама ў Кастрычніцкім раёне Гродна. Дзевяць з іх ужо выправілі з Беларусі.
Ад пачатку 2023 года на Гродзеншчыне затрымалі 31 чалавека, якія знаходзіліся ў Беларусі незаконна. У 2022 годзе такіх затрыманых было 270.
Не першыя затрыманні ў 2023 годзе
Раней, 18 лютага, міліцыя паведаміла пра групу з 94 нелегальных мігрантаў на аграсядзібе пад Мінскам. Іх затрымлівалі з АМАПам. Мігранты аказаліся грамадзянамі Алжыра, Афганістана, Егіпта, Емена, Ірака, Сірыі, Марока і Пакістана. Яны заехалі ў Беларусь з Расіі наземным транспартам і не мелі беларускіх візаў. Пазней планавалі перабрацца ў Еўропу.
Частку гэтых мігрантаў ужо дэпартавалі, частку затрымалі для высвятлення асобы. 54 замежнікі атрымалі адміністрацыйныя штрафы і права добраахвотна пакінуць краіну. У чацвярых ўжо была забарона на ўезд у Беларусь, атрыманая раней.
Паводле закону, большасць замежнікаў, якія прыехалі ў Беларусь, павінны зарэгістравацца напрацягу 10 каляндарных дзён.
Год таму мігрантам не перашкаджалі і нават дапамагалі
Абвастрэнне сітуацыі з мігрантамі, якія спрабавалі незаконна перасекчы польскую, літоўскую і латышскую межы з боку Беларусі, доўжылася амаль год. 26 траўня 2021 года Аляксандр Лукашэнка заявіў: «Мы спынялі наркотыкі і мігрантаў — зараз будзеце самі іх есці і лавіць». Імавернасць таго, што Беларусь у адказ на санкцыі Захаду праз палітвязняў пачне прапускаць мігрантаў, разглядалася экспертамі яшчэ ў 2011 годзе.
Плынь мігрантаў з Блізкага Усходу павялічылася ў траўні 2021. За 2021 год іх стала больш у 4 разы. Беларускія памежнікі не перашкаджалі спробам перасекчы межы ЕС з боку Беларусі, а міграцыйная служба не цікавілася наяўнасцю рэгістрацыі ў гэтых замежнікаў. У адказ памежнікі суседніх краін атрымалі права адпраўляць назад мігрантаў, якія нелегальна ўехалі з Беларусі.
Праз збор групы ў некалькі тысяч мігрантаў каля мяжы ў лістападзе 2021 Польшча закрыла памежны пераход «Кузніца» («Брузгі»). Мігранты зладзілі штурм, пасля якога засталіся стаяць лагерам ля нейтральнай паласы. Пазней беларускі бок размясціў іх у транспартна-лагістычным цэнтры побач з пунктам пропуску. Туды прывозілі гуманітарную дапамогу і прыязджаў Лукашэнка, афіцыйная прэса называла прыезджых уцекачамі. Мігранты пакінулі лагістычны цэнтр толькі ў сакавіку 2022. Частку з іх эвакуявалі рэйсам з Мінска ў Эрбіль, іншыя чакалі наступных рэйсаў. Памежны пераход у Кузніцы зачынены і цяпер.
Чытайце таксама: Некоторые пришли пешком, визы просрочены, понимают, что их используют. Что рассказали мигранты из лагеря под Гродно
Пра спробы незаконнага перасячэння мяжы і арышты людзей, якія ўдзельнічаюць у злачынных схемах перавозкі мігрантаў далей на Захад паведамляюць дагэтуль. Беларускі бок паведамляе пра смерці людзей на мяжы і вінаваціць у гэтым памежнікаў краін ЕС.
У 2021 годзе Беларусь была «гасціннай»
У снежні 2021 года ўлады арганізавалі фестываль фарбаў «Беларусь гасцінная» для дзяцей мігрантаў. Яго праводзіў Гродзенскі абласны камітэт БРСМ на тэрыторыі лагістычнага цэнтра каля польска-беларускай мяжы.
