Не менш за 14 000 рублёў выдаткуюць у Гродне на Дзень народнага адзінства. Гэта ў разы менш, чым на Дзень горада

Дзень народнага адзінства адзначаць у Гродне 17 верасня. На свет, гук і сцэну выдаткуюць 14 000 рублёў. Гэта значна менш, чым, напрыклад, на Дзень горада. Праграмы свята пакуль не абвясцілі.

Колькі выдаткуюць?

На светлавое, гукавое, праекцыйнае абсталяванне і мультымедыйнае суправаджэнне мерапрыемстваў на плошчы Савецкай выдаткуюць 9000 рублёў з гарадскога бюджэту. У закупцы — гучнагаварыцелі, устойлівыя да надвор’я, і экран за сцэнай 4 на 6 метраў. Гродзенскі гарадскі цэнтр культуры праводзіць закупку з адной крыніцы.

Праз яшчэ адну закупку шукаюць фірму для абслугоўвання мабільнага сцэнічнага комплексу. Ён будзе каштаваць 5000 рублёў. Комплекс будзе складацца з асноўнай сцэнічнай скрыні з элеватарам і сцэнічным подыумам памерам не менш за 8 на 10 метраў і вышынёй подыўма не менш за 1.2 метра.

На святкаванні Дня горада 3 верасня 2000 рублёў выдаткавалі на абслугоўванне 35 біяпрыбіральняў. Можна выказаць здагадку, што гэты артыкул выдаткаў прадугледжаны і на Дзень адзінства.

Гэта шмат?

Для параўнання — выканаўцам па абслугоўванні мабільных сцэнічных комплексаў, асвятляльнага і гукавога абсталявання, LED экранаў на гарадскіх пляцоўках на Дзень горада заплацілі 58 000 рублёў. На Дзень горада ў 2021 годзе выдаткавалі 42 500 рублёў, а на Новы год — 17 000. На трохдзённы Фестываль нацыянальных культур — не менш за 179 тысяч рублёў.