Будынак былога скурвендыспансера на вуліцы Васілька, 10 плануюць рэканструяваць. Там хочуць размясціць аб’екты грамадскага прызначэння з апартаментамі і памяшканнямі бытавога абслугоўвання. Зараз адбываюцца грамадскія абмеркаванні паведаміў Гродзенскі гарвыканкам.
Рэканструкцыя будынка прадугледжана праграмай развіцця Гродна па плане дэтальнай планіроўкі гістарычнага цэнтра горада. Паводле гарвыканкама, пасля рэканструкцыі будынак павінен дазволіць аднавіць гістарычны выгляд вуліцы.
Ля будынка плануюць арганізаваць паркоўку і азеляніць тэрыторыю. Пры рэканструкцыі неабходна будзе захаваць існуючую расліннасць. У выпадку яе выдалення трэба будзе выплаціць кампенсацыю. Пасля рэалізацыі праекта на ўчастку трэба аднавіць пашкоджаныя экасістэмы ў найкарацейшыя тэрміны.
Грамадскія абмеркаванні адбываюцца з 29 чэрвеня па 30 жніўня 2022 года.
Хто зараз валодае будынкам
У сакавіку 2020 года на продаж выставілі былы скурвендыспансер — два былыя лячэбныя корпусы 1890 і 1891 года пабудовы, а таксама будынак паліклінікі, які складаецца з дзвюх частак 1891 і 1983 гадоў. У складзе быў таксама харчаблок з прыбудовай і склепам 1890 года пабудовы.
У ліпені 2020 года кампанія «БелБурБуд» выкупіла комплекс будынкаў на аўкцыёне. Цана аб’екта склала 900 тыс. рублёў.
У 2017 годзе гэты інвестар выкупіў вежу ў Румлёўскім парку. Там ён планаваў зрабіць рэканструкцыю і адкрыць назіральную пляцоўку. Але па выніках справаздачы аб ацэнцы ўздзеяння на навакольнае асяродзе праект адхілілі.
Башня в 2017 году 
У 2020 годзе будаўнічая кампанія «БелБурБуд» увайшла ў тройку рэгіянальных дыпламантаў нацыянальнага конкурсу «Найлепшы экспарцёр года»
Чым адметны будынак на Міхася Васілька, 10
Домам № 10 валодаў вядомы гродзенскі доктар Рыгор Варашыльскі. Вядомы калекцыянер паштовак і фатаграфій з відамі Гродна Фелікс Варашыльскі - яго ўнук. Дом № 8 сёння аб’яднаны ў адзін будынак з домам № 10. У розны час тут знаходзіўся радзільны дом, Дзіцячая бальніца, розныя аддзяленні абласной бальніцы, скурна-венералагічны дыспансер. У студзені 2018 года дыспансер пераехаў у будынак былой чыгуначнай бальніцы па вуліцы Будзёнага. З таго часу будынак на Васілька пуставаў.
«Я думаю, было б добра, калі б дом быў адноўлены ў пачатковым выглядзе: вярнуць балконы, ганак і сад ззаду дома. Як на старых сямейных фотаздымках», — сказаў Hrodna.life унук лекара і ўладальніка дома Фелікс Варашыльскі ў 2018 годзе.
Дом сям'і Варашыльскіх. На балконе — Рыгор Варашыльскі, побач з домам яго брат Мікалай. У вокнах першага паверха — бацькі Г. Варашыльскага. Фота Фелікса Варашыльскага 
Сям’я Варашыльскіх у двары дома. Фота Фелікса Варашыльскага
Чытайце таксама: Ад пансіяната адмовіліся: былы скурвендыспансер на Васілька выставілі на аўкцыён
