У 2022 годзе Стары мост у Гродне плануюць перакрыць для замены пакрыцця. На мосце цалкам зрэжуць асфальт і пакладуць новы. Пра гэта паведаміла Гродзенская праўда.
Працы па замене асфальта адбудуцца пасля сканчэння рамонту і адкрыцця руху па Румлёўскім мосце. Верагодна, гэта адбудзецца ў чэрвені.
Замест ямачнага рамонту мост адрамантуюць метадам суцэльнага асфальтавання.
Стары мост рамантавалі ў мінулым годзе
Стары мост часткова перакрывалі з 16 лістапада па 20 снежня 2021 года. Спецыялісты замянялі зношаныя дэфармацыйныя швы. Змяняць асфальт тады не планавалі.
Падчас рамонта ў 2021 годзе рух па мосце абмежавалі. Прапускная здольнасць зменшылася на 50%. Кіроўцы транспарта маглі карыстацца толькі двума дарожнымі палосамі - па адной у кожны бок.
Таксама запланаваны рамонт Новага моста
Пасля сканчэння рамонта Румлёўскага моста плануюць правесці рэканструкцыю Новага моста на вуліцы Паповіча. «Працэс рэканструкцыі будзе больш доўгі з поўным перакрыццём руху. Таму да гэтага часу плануецца прывесці ў належны стан усе масты горада», — казаў старшыня Гродзенскага аблвыканкама Уладзімір Каранік падчас прамой тэлефоннай лініі ў сакавіку 2022 года.
