Таблічкі з назвай вуліц і нумароў дамоў на былым фрагменце вул.Горкага ў Гродне заменяць. Назву вуліцы Мітрапаліта Філарэта напішуць на беларускай мове, заўважыў Telegram-канал Urban Hrodna.

Зменіцца нумарацыя на некаторых дамах. Няцотныя дамы стануць цотнымі:

  • вул. Максіма Горкага, д. 3B пераймянуюць у вул. Мітрапаліта Філарэта, 4,
  • вул. Максіма Горкага, Д. 3 пераймянуюць у вул. Мітрапаліта Філарэта, 6,
  • вул. Максіма Горкага, д. 9 пераймянуюць у вул. Мітрапаліта Філарэта, 8,
  • вул. Максіма Горкага, д. 11А пераймянуюць у вул. Мітрапаліта Філарэта, 10,
  • вул. Максіма Горкага, Д. 15 пераймянуюць у вул. Мітрапаліта Філарэта, 14,
  • вул. Максіма Горкага, д. 17 пераймянуюць у вул. Мітрапаліта Філарэта, 16,
  • вул. Максіма Горкага, д. 19 пераймянуюць у вул. Мітрапаліта Філарэта, 18,
  • вул. Максіма Горкага, д. 19А пераймянуюць у вул Мітрапаліта Філарэта, 18А.

Замену правядуць з 8 красавіка па 7 траўня. Гродзенская гарадская жыллёва-камунальная гаспадарка да 7 красавіка правяла закупку з адной крыніцы. Кошт — 1 090 рублёў з бюджэту.

Як вуліца Філарэта з’явілася замест часткі вуліцы Горкага

Вуліца Мітрапаліта Філарэта з’явілася ў лістападзе 2021 года па рашэнні Гродзенскага гарадскога Савета дэпутатаў № 228. Пераназваная частка вуліцы Горкага ад плошчы Антонія Тызенгаўза да скрыжавання з вуліцай 17 верасня і вуліцай Камунальнай. Мітрапаліт Філарэт — ганаровы Патрыяршы Экзарха усяе Беларусі, Герой Беларусі. З 1978 да 2013 года кіраваў Беларускай Праваслаўнай царквой, потым сышоў на пенсію. Памёр 12 студзеня 2021 года.

Чытайце таксама: У Новым Свеце пачалі рамонт 90-гадовага дома. Да яго дабудуюць «двухпавярховы аб’ём»

У верасні гродзенцы збіралі подпісы супраць перайменавання вуліцы. «На працягу апошніх дзесяцігоддзяў мясцовыя ўлады (якія не былі абраныя жыхарамі шляхам выбараў) адкідвалі любыя прапановы па вяртанні назад гістарычных назваў вуліц, заўзята адстойваючы савецкія безаблічныя назвы, ніяк не звязаныя з гарадамі і іх гісторыяй», — пісалі аўтары петыцыі.