Ізноў 3%! Столькі беларусаў хочуць ваяваць з Украінай. Што яшчэ вядома з апытання Chatham House

За вайну з Украінай выступаюць 3% беларусаў, 25% лічаць, што Беларусь павінна быць нейтральнай, а 28% выказваюць сваю падтрымку Расіі, але без удзелу Беларусі ў вайне. Вынікі даследвання «Погляды беларусаў на вайсковы канфлікт Расіі і Украіны» апублікаваў брытанскі цэнтр Chatham House. Што яшчэ вядома з гэтага апытання.

Як беларусы ўспрымаюць расійскія войскі на сваёй тэрыторыі

Большасць беларусаў - 44% - не падтрымліваюць прысутнасць войскаў Расіі на тэрыторыі Беларусі. Прыхільнікі ўлады падтрымліваюць знаходжанне расійскіх вайскоўцаў у Беларусі, але яны не згодныя з тым, што варта гэтую прысутнасць павялічыць.

Менш за паловую апытаных беларусаў лічаць, што краіна бярэ ўдзел у вайне. Большая частка не ўспрымае прадстаўленне беларускай тэрыторыі як удзел. Толькі кожны пятны лічыць, што Беларусь з’яўляецца краінай-агрэсарам.

У артыкуле 18 абноўленай Канстытуцыі Беларусі, якая набыла моц 15 сакавіка, напісана: «Рэспубліка Беларусь выключае вайсковую агрэсію са сваёй тэрыторыі ў адносінах іншых дзяржаў». Згодна з нормамі міжнароднага права дзейнасць дзяржавы, якая дазваляе выкарыстоўваць сваю тэрыторыю для акта агрэсіі супраць трэцяй дзяржавы, таксама лічыцца актам агрэсіі.

Чытайце таксама: Дэпутатка з Гродна: «Расія не нападае на Украіну праз Беларусь». Што сказала Лілія Кір'як падчас тэлефоннай прамой лініі

Колькі беларусаў супраць абстрэлаў Украіны з тэрыторыі Беларусі

Супраць абстрэлаў Украіны з тэрыторыі Беларусі выказаліся 67% рэспандэнтаў. Супраць таго, каб тэрыторыю Беларусі выкарыстоўвалі як плацдарм для вядзення вайны з Украінай — 52%.

Супраць размяшчэння ў Беларусі ядзернай зброі выказаліся 80%. За размяшчэнне — 20%. На пытанне аб размяшчэнні расійскіх вайсковых баз станоўча выказалія 24%, а 44% супраць.

За вайну з Украінай выказаліся 3% беларусаў

Толькі 3% рэспандэнтаў лічаць, што Беларусь павінная ваяваць разам з Расіяй супраць Украіны. 25% лічаць, што трэба займаць нейтральную пазіцыю і на тэрыторыі Беларусі не павінны знаходзіцца войскі іншых дзяржаў. За падтрымку Расіі, але без удзелу ў вайне Беларусі, выказаліся 28%. Толькі 20% лічаць, што Беларусь павінна падтрымаць Украіну.

Чаго чакаюць Беларусы

З-за санкцый і вайны Расіі супраць Украіны 71% апытаных чакаюць, што ў Беларусі вырастуць цэны, а 60% чакаюць, што жыццё простага чалавека пагоршыцца. Прыхільнікі ўлады чакаюць, што жыццё зменіцца да лепшага — 16% спадзяецца, што эканоміка стабілізуецца, а 12% думаюць, што жыццё стане лепшым.

Брытанскі цэнтр Chatham House праводзіў апытанне ў пачатку сакавіка 2022 года. Пад канец месяца чаканні беларусаў пра рост цэн амаль апраўдаліся.

Дзе беларусы чытаюць інфармацыю пра вайну ва Украіне

Пра баявыя дзеянні ва Украіне 22% беларусаў даведваюцца з беларускіх недзяржаўных СМІ. 20% - з беларускіх дзяржаўных СМІ. 18% рэспандэнтаў прызналі, што ўвогуле не цікавяцца падзеямі ва Украіне.

Аўтары даследвання адзначылі, што прыхільнікі Лукашэнкі ў асноўным атрымліваюць інфармацыю з дзяржаўных беларускіх і расійскіх СМІ, а апаненты — з недзяржаўных беларускіх, расійскіх і ў меншай ступені ўкраінскіх СМІ.

Пераважная большасць тых, хто сочыць за беларускімі дзяржаўнымі і расійскімі СМІ, лічаць, што ў вайне пераможа Расія. Такіх рэспандэндаў 87% і 67% адпаведна. Тыя, хто атрымлівае інфармацыю з недзяржаўных СМІ Беларусі альбо украінскіх СМІ, лічаць, што пераможа Украіна — 53% і 59%.

Хто пераможа ў гэтай вайне

Агулам 45% беларусаў думаюць, што пераможа Расія. У тое, што пераможа Украіна верыць 21% апытаных. 35% не здолелі адказаць на пытанне.

Што да грамадска-палітычнай пазіцыі ў цэлым, то яна застаецца больш-менш нязменнай ад 2020 года. Прыкладна 30% людзей стаяць на пралукашэнкаўскіх пазіцыях, у тым ліку і падзяляюць лукашэнкаўскае бачанне канфлікту ва Украіне. 40—50% — у апазіцыі да Аляксандра Лукашэнкі, у тым ліку і па пытанні Украіны. Астатнія вагаюцца.

Калі праводзілі апытанне і колькі людзей ў ім удзельнічала

Сацыялагічнае апытанне праводзілі ў Беларусі з 5 па 14 сакавіка 2022 года. Рэспандэнтаў апытвалі анлайн. Колькаць удзельнікаў - 896 чалавек. Усе яны — гараджане, якія карыстаюцца інтэрнэтам.