Палітвязню Дзянісу Івашыну прад’явілі новае абвінавачванне. Па якім артыкуле — пакуль невядома

Дзяніс Івашын 2 верасня 2021 года прыцягнуты ў якасці абвінавачанага ў здзяйсненні менш цяжкага і асаблівага цяжкага злачынства. Таму намеснік генеральнага пракурора Беларусі падоўжыў яму тэрмін утрымання пад вартай да васьмі месяцаў 28 сутак.

Гэта вынікае з адказу КДБ жонцы Дзяніса Вользе за подпісам начальніка следчага аддзела УКДБ Рэспублікі Беларусь Гродзенскай вобласці А. і. Варанецкага.

Пры гэтым канкрэтныя артыкулы, па якім яго прыцягнулі, не называюцца. Аб новым абвінавачванні не паведамілі нават блізкім — маці Людміле і жонцы Вользе.

 — <…> супраць Дзяніса на дадзены момант высунутыя два крымінальныя абвінавачаньні паводле невядомых артыкулаў КК, адно зь якіх належыць да менш цяжкіх (верагодна, маецца на ўвазе вядомы ўжо 365-ты артыкул КК — умяшальніцтва ў дзейнасьць супрацоўніка ворганаў нутраных справаў), а другое — да асабліва цяжкіх злачынстваў, але абсалютна невядома якога, — напісала Вольга ў Facebook.

Журналіста Дзяніса Івашына затрымалі увечары 12 сакавіка. З таго часу ён знаходзіцца пад вартай. У яго дома, на лецішчы, а таксама ў бацькоў супрацоўнікі КДБ правялі ператрус. Раней было вядома, што Дзяніс праходзіць падазраваным паводле арт.365 КК — Умяшанне ў дзейнасць супрацоўнікаў органаў унутраных спраў. Яго прызналі палітвязнем. Ён не стаў пісаць ліст Лукашэнку аб памілаванні.