Раніцай 16 ліпеня з ператрусамі прыйшлі да трох журналістаў з Гродна: Аляксея Кайрыса, Паўла Мажэйкі і Аляксандра Саенкі. Саенка праходзіць сведкам па ч. 1 арт. 342 КК (Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх). Верагодна, у іншых журналістаў ператрус таксама прайшоў у рамках гэтай справы.
UPD. Таксама каля 15.30 стала вядома пра ператрус у гродзенкі Лізаветы Белятка.
Каля 8.00 сілавікі з ператрусам прыйшлі да журналіста-фрылансера і гісторыка Аляксея Кайрыса. Пазней яго павезлі на допыт. На 13.00 ён усё яшчэ знаходзіцца на допыце. Hrodna.life вядома, што ў яго канфіскавалі як мінімум сістэмны блок.
UPD 13.55. Аляксей Кайрыс дома. Ён таксама праходзіць сведкай па ч. 1 арт. 342 КК. У яго забралі сістэмны блок, тэлефон і грошы.
Каля 9.00 прыйшлі да Паўла Мажэйкі. Ператрус у яго скончыўся каля 13.00. Ён на волі. Павел Мажэйка — журналіст, аўтар перадачы «Intermarium» на адным з замежных тэлеканалаў, былы палітвязень, кіраўнік пляцоўкі «Цэнтр гарадскога жыцця», падазраваны па справе аб «рэабілітацыі нацызму», бацька дваіх дзяцей.
Каля 9.30 прыйшлі да Аляксандра Саенкі — неаднаразовага пераможцы прафесійнага конкурсу «Прэс-Фота Беларусі», удзельніка міжнародных выстаў. Пасля допыту яго вызвалілі праз дзве гадзіны. Ён праходзіць сведкам па ч. 1 арт. 342 КК. У ходзе ператрусу ў яго забралі два тэлефона, два фотаапарата і флэшку.
Актывіста адпусцілі
Таксама 16 чэрвеня стала вядома, што гродзенскага праваабаронцу Віктара Сазонава напярэдадні ўвечары выпусцілі з ІЧУ пад падпіску аб нявыездзе. У яго статус падазраванага. Яго затрымалі на 72 гадзіны 14 ліпеня пасля ператрусу.
Ператрус у актывіста
15 ліпеня на лецішчы ў Вадзіма Саранчукова прайшоў ператрус. Па паведамленнях суседзяў актывіста, дом апячатаны. Сам Вадзім зараз недаступны. Вадзім Саранчукоў - намеснік старшыні Партыі «Беларускі Народны Фронт», часова выконвае абавязкі старшыні пасля арышту Рыгора Кастусёва.
Ператрусы ў Беларусі
Не менш за 20 ператрусаў прайшло па Беларусі 16 ліпеня. Сілавікі прыходзілі да журналістаў «Б****т», «Радыё Свабода» і да актывістаў арганізацый. Некаторых пасля ператрусаў затрымалі. Таксама сілавікі прыйшлі ў офісы «Радыё Свабода» і «ТаймАкт».
Чытайце таксама:
