Махае рукой абвінавачаны Дзмітрый Фурманаў. Фота: Алена Кавальчук
26 траўня бацькам Дзмітрыя Фурманава Аляксандру і Вользе адмовілі ў спатканні з сынам. Палітвязню падоўжылі знаходжанне ў карцэры да 1 чэрвеня. Да гэтага Дзмітрый ужо правёў у карцары турмы № 1 Гродна сем сутак.
Абноўлена 31 траўня. Дзмітрый Фурманаў будзе ў карцэры да 8 чэрвеня, паведамляе праваабарончы цэнтр «Вясна».
Дазвол на спатканне ад суддзі атрымалі, распавяла ў Facebook дзяўчына Дзмітрыя Вольга Каракіна. 19 траўня спатканне перанеслі па той жа прычыне — знаходжанне ў карцары.
— Пасля смерці палітвязня Вітольда Ашурка ў карцары мы ўсе вельмі моцна занепакоеныя здароўем Дзімы, бо невядома, што там робяць з палітвязнямі! Катаванні, збіццё, прыніжэнне, псіхатропы, ды ўсё што заўгодна, каб зламаць… <…> Размаўляла цяпер з імі, вельмі страшна чуць, як мама Дзімы рыдае, — напісала Вольга.
— Вельмі трывожна на душы. Такія думкі, што, можа быць, яго так збілі, каб не відаць было. Два спатканні мы ўжо прапусцілі з-за гэтых карцэраў, — сказаў Аляксандр Hrodna.life.
У сярэдзіне траўня Фурманава адправілі ў карцэр пасля таго, як ён прысеў на ложак у неналежны час, а наглядчык напісаў рапарт, што ён ляжаў. Яго выклікалі на прафілактычную гутарку, дзе тлумачэнні Дзмітрыя не сталі слухаць. Пасля гэтага ён замаўчаў у знак пратэсту і атрымаў сем сутак карцару. За што Фурманаў атрымаў карцар другі раз, бацькі не ведаюць.
У карцары абвінавачаны знаходзіцца адзін у камеры, яму нельга чытаць, пісаць і атрымліваць лісты, хадзіць на шпацыр, хадзіць на спатканні. У камеры прыбіраюць ложак і матрац. Як правіла, распавёў Аляксандр, гэтыя камеры размяшчаюцца ў падвале, з-за чаго там холадна і сыра.
З пачатку судовага разбіральніцтва ў студзені, калі абвінавачаных перавезлі ў турму № 1 Гродна, у Дзмітрыя з бацькамі было чатыры спатканні. У асноўным Фурманавы бачаць сына на судовых пасяджэннях. Адвакат паведамляе, што «Дзіма бадзёры, настроены добра, духам не падае, — распавядае бацька. — Мы самі бачым — ён хлопец моцны духам. Ён нас падтрымлівае, не тое, што мы яго. Лісты добрыя піша». Лісты бацькам прыходзяць прыкладна раз у тыдзень — часцей, чым калі ён быў у СІЗА Мінска і Жодзіна. Дзмітрыю жа прыходзяць сотні лістоў ад беларусаў, на якія ён імкнецца адказаць.
— Мы былі вельмі засмучаныя, таму што два спатканні не атрымлівалася ўбачыць яго. Перадачу перадавалі - не дайшла. Ну, і трывожымся, вядома ж, трывожымся, — распавядае Аляксандр. У мамы Дзмітрыя з — за перажыванняў праблемы з ціскам, яна часта плача. Па словах Аляксандра, Дзмітрый адчувае віну з-за таго, што бацькі ўжо год жывуць «на ўзводзе».
Дзмітрый Фурманаў — палітвязень, які праходзіць абвінавачаным па «справе Ціханоўскага». Яго абвінавацілі паводле ч. 1 арт. 342 КК «Удзел у групавых дзеяннях, якія груба парушаюць грамадскі парадак». Па словах пракурора, Фурманаў дапамагаў шукаць Ціханоўскаму саўдзельнікаў за ўзнагароджанне. Пракурор запатрабаваў яму два гады пазбаўлення волі ў калоніі агульнага рэжыму. 31 траўня пройдзе апошняе слова абвінавачаных. Шэсць сутак ён і яго дзяўчына Вольга трымалі галадоўку. Улетку 2020 года дзяўчына і мама палітвязня абвяшчалі галадоўку, каб дапамагчы Дзмітрыю.
Чытайце таксама:
Шматгадзінныя чэргі, перфаратар і два акенца на рэгістрацыю. Дзяўчына схадзіла ў Гродзенскае агенцтва па дзяржаўнай…
Прадпрыемства "Гродна Азот" 12 лютага ў Telegram-канале анансавала конкурс да Дня роднай мовы. Да самога…
Палітзняволены з Гродна Кірыл Кетурка скончыў жыццё самагубствам у Цэнтры ўтрымання пад вартай у Варшаве-Служэўцы…
Былому сенатару і дырэктару «Краснасельскбудматэрыялы» Уладзіміру Кісялёву пагражае да трох гадоў калоніі за разгалашэнне службовай…
"Малочны Мір" абавязалі змяніць назву для серыі глазураваных сыркоў. Пасля чыёсьці скаргі ў Міністэрства антыманапольнага…
На Гагарына, 25 у Гродне прадаецца двухпакаёвая кватэра з выдатна захаваным постсавецкім інтэр'ерам. Дом, у…