Павал Мажэйка ў Цэнтры гарадскога жыцця. Фота: "Радыё Св***да"
20 красавіка дырэктару «Цэнтру гарадскога жыцця» Паўлу Мажэйку патэлефанавалі з Эканамічнага суда Гродзенскай вобласці і паведамілі аб тым, што ў гэты дзень пройдзе падрыхтоўчае паседжанне па справе аб ліквідацыі ўстановы.
Справу разглядае суддзя Юлія Баклажац. На першым пасяджэнні прысутнічалі таксама намеснік пракурора горада Гродна Аляксандр Южык, намеснік начальніка юрыдычнага аддзела Гродзенскага гарвыканкама Сяргей Тыбулевіч, начальнік аддзела культуры Гродзенскага гарвыканкама Дзяніс Чарняк.
На першым пасяджэнні зачыталі іск ад пракурора горада Гродна Уладзіміра Клішына. 30 сакавіка ён звярнуўся ў Эканамічны суд Гродзенскай вобласці з просьбай ліквідаваць культурна-асветніцкую прыватную ўстанову «Цэнтр гарадскога жыцця». Прычына — выстава Алеся Пушкіна, на якой нібыта была карціна, якая падпадае пад Закон Аб супрацьдзеянні экстрэмізму. Верагодна, гаворка ідзе пра карціну, на якой намаляваны Яўген Жыхар. Дадзеныя пра яго ў іску амаль даслоўна ўзялі з Вікіпедыі, распавёў Мажэйка Hrodna.life.
У іску Клішын спасылаецца на арт.81 Кодэкса аб культуры, згодна з якім дзейнасць культурнай установы можна забараніць, калі яна прапагандуе вайну, экстрэмісцкую дзейнасць, гвалт і жорсткасць, сацыяльную, нацыянальную, рэлігійную, расавую выключнасць, нецярпімасць або варожасць, парнаграфію, падбухторвае да здзяйснення злачынстваў.
Доказаў на пасяджэнні не далі, распавёў Павел Hrodna.life. «Сказалі: «Мы так лічым», — перадаў ён. Павел папрасіў даць час на азнаямленне з матэрыяламі справы. 21 красавіка разгляд справы працягнецца. На працягу месяца іск разгледзяць.
Дырэктар рыхтуецца да рашэння аб ліквідацыі. «Думаю, ёсць палітычны заказ, які выконваецца — стаіць задача ліквідаваць досыць папулярную пляцоўку ў горадзе. У наш час нездарма заводзяцца справы, якія шытыя белымі ніткамі, людзі абсалютна не замарочваюцца з доказамі. Чакаць цуду не варта, — лічыць Павел. — Калі гаворка ідзе не толькі аб працы „Цэнтра“ як нейкай установы або інстытуцыі, а наогул аб здольнасцях творчых людзей горада працаваць, рэалізоўваць сябе, хацець пераменаў, у гэтым плане [ліквідацыя — Hrodna.life] ніяк не паўплывае».
Цэнтр гарадскога жыцця — гэта прыватная адукацыйна-культурная пляцоўка. Тут прайшлі сотні мерапрыемстваў, выступалі музыкі, праходзілі заняткі курсаў беларускай мовы «Мова Нанова», вясной 2020 года збіралі ахоўныя экраны для медыкаў. На кіраўніка пляцоўкі Паўла Мажэйку, мастака Алеся Пушкіна і «іншых асоб» 26 сакавіка завялі крымінальную справу паводле ч. 3 арт. 130 КК нібыта за дзеянні, накіраваныя на рэабілітацыю і апраўданне нацызму.
«За апошнія 27 гадоў грамадзянскай супольнасці ніколі не было лёгка, асабліва ў Гродне. Рэдкія пробліскі, калі ўлада не прэсавала моцна. Так што актыўныя людзі да такіх умоў прывыклі. Я ўпэўнены, што на месцы нашага зачыненага „Цэнтра“ з’явіцца яшчэ дзясятак. Гарадзенцы шануюць свабоду, праўду, свабоднае творчасць і перамены да лепшага. Падзеі апошніх месяцаў даказалі гэта», — кажа Павел.
Чытайце таксама:
Гіды і экскурсаводы ў Беларусі цяпер павінны ведаць асновы дзяржаўнай ідэалогіі. Такое патрабаванне з'явілася ў…
Айцец Андрэй Крот з Гродна быў у дэлегацыі беларускіх святароў, якая сустрэлася з новым пантыфікам.…
Фатаграфія кабінкі для перапранання на пляжы ў Ласосна патрапіла ў рэдакцыю Hrodna.life. Драўляныя балкі ў…
Псіхолага і дырэктарку ліквідаванага Гродзенскага дзіцячага хоспісу Вольгу Вялічку выключылі са спісу дэлегатаў Каардынацыйнай Рады…
Мужчына вяртае ў гняздо буслам птушаня, якое выпала, - такое відэа ў апошні тыдзень набірае…
Гарадскі выпускны пройдзе 13 чэрвеня на Савецкай плошчы. Запланавана ўрачыстае шэсце і выступленні беларускіх артыстаў.…