Улады Гродна анансавалі адкрыццё басейна «Лазурный» на плошчы Савецкіх пагранічнікаў пасля рамонту ў 2021 годзе. Для гэтага ў 2018 годзе горад прадаў закінуты аб’ект за 1157 рублёў. Але новы ўласнік з задачай пакуль не спраўляецца. У бліжэйшы час басейн дакладна не адкрыюць. Hrodna.life распавядае, чаму (навіна абноўлена ў 15:55 2 лютага 2021 года).

Як прадавалі «Лазурный»?

Першы крыты басейн Гродна аж да закрыцця ў 2013 годзе карыстаўся вялікім попытам. Яго зачынілі з-за аварыйнага стану — да таго моманту басейн прапрацаваў больш за 30 гадоў. За пяць гадоў прастою спартыўны аб’ект агульнай плошчай ў 2000 кв.м. пачаў разбурацца.

Басейн «Лазурный» адкрылі ў 1973 годзе для супрацоўнікаў і працаўнікоў завода карданных валаў. Ім маглі карыстацца і звычайныя грамадзяне. Доўгі час ён быў адным з самых папулярных басейнаў горада.

Камітэт «Гроднааблмаёмасць» некалькі разоў выстаўляў «Лазурный» на аўкцыён, але здолеў прадаць толькі ў 2018 годзе за 1157 рублёў (на той момант — $ 542). Цана была такой нізкай з-за таго, што на гандаль падалі ўсяго адну заяўку. Новым уласнікам басейна стала нейкае таварыства з абмежаванай адказнасцю. Назву фірмы ў «Гроднааблмаёмасць» не паведамлялі.

Калі павінны былі адкрыць абноўлены «Лазурный»?

Згодна з умовамі продажу новы ўласнік павінен быў на працягу года падрыхтаваць дакументацыю па рэканструкцыі або капітальным рамонце былога басейна пад аб’ект грамадскага прызначэння — напрыклад, гандлёвы цэнтр. Але не менш за палову ўсёй плошчы трэба было выкарыстоўваць для спартыўных і фізкультурных мэтаў.
Завяршыць усе працы ўласнік павінен быў на працягу трох гадоў, то бок на 2021 год планавалася адкрыццё.

Чаму не адкрылі?

Сёння вакол тэрыторыі басейна стаіць плот, але не відаць, каб там вяліся будаўнічыя работы.

Новы ўласнік не планаваў рабіць з «Лазурного» спартыўна-аздараўленчы комплекс, але ўсё роўна не змог выканаць свае абавязацельствы пасля куплі аб’екта, распавялі Hrodna.life у Гродзенскім гарвыканкаме. Зараз гарадскія ўлады займаюцца скасаваннем дамовы і будуць шукаць новага ўладальніка.

Абнаўленне ад 15.55 2 лютага 2021 года: намеснік старшыні Гродзенскага гарвыканкама Андрэй Болтрык заявіў «Вячэрняму Гродна», што інфармацыя аб продажы не адпавядае рэчаіснасці. Тэрмін дагавора з уласнікам мінае толькі ў снежні 2022 года.

Дзе ў Гродне ёсць басейны?

  • ФАК «АкваЦэнтр» (Горкага, 82)
  • Палац творчасці дзяцей і моладзі (Каложскі парк, 1)
  • «Хімвалакно» (Томіна, 26)
  • «Жамчужына» (Санаторная, 26)
  • Школа № 39 (Агінскага, 44а)
  • Гімназія № 1 (пр. Купалы 82)
  • Гімназія № 9 (Пестрака 34 1)
  • СШ № 34 (Індурская шаша, 14)
  • СШ № 40 (Крэмко, 29)
  • СДЮШАР № 5 / СШ № 20 (Соламавай, 76)

Рэпарцёр, фатограф, краязнаўца. Самы хуткі журналіст Гродна на ровары. Руслана і яго ровар ведаюць многія гараджане: ад чыноўнікаў да бамжоў. Падчас службы ў войску быў разведчыкам, а цяпер даказвае, што выведнік былым не бывае. Працуе ў Hrodna.life з 2013 года, калі сайт яшчэ працаваў пад брэндам «Твой стыль». У канцы 2018 выдаў кнігу «Горад адзін, успаміны розныя», дзе сабраў успаміны гродзенцаў пра 1930−40-я гады.