На Вялікай Траецкай, 9 у новым будынку з 17 верасня працуе кавярня «Чашки&ложки». Яе адкрыла былая сцюардэса, якая пераехала ў Гродна з Мінска 5 гадоў таму. У кавярні падаюць напоі і дэсерты ўласнай вытворчасці, а зніжкі на каву сумуюцца.

«Гэта наш першы вопыт, адкрыць установа мы вырашылі з вялікай любові да кавы», — распавядае Hrodna.life дырэктар кавярні Аксана Календа.

кофейня Чашки&ложки Большая Троицкая
Дырэктар кавярні «Чашки&ложки» Аксана Календа

«Кавярня — гэта тое, што я б хацела рабіць»

У Аксаны з мужам двое дзяцей, цяпер яна ў дэкрэтным адпачынку. Да дэкрэта яна жыла ў Мінску і працавала сцюардэсай. У самалёце яна пазнаёмілася са сваім будучым мужам Аляксеем, які цяпер дапамагае ёй кіраваць кавярняй.

«Мне хацелася б выйсці на працу, якая цешыла б мяне. Кавярня — гэта тое, што б я хацела рабіць. Ідэя мая, а рэалізацыя больш Аляксея.

Асноўная наша мэта — гэта папулярызацыя кавы. У нас з’явілася магчымасць, знайшлі добрае памяшканне і вырашылі, што гэта месца пасуе для кавярні".

кофейня Чашки&ложки Большая Троицкая

Назву ўстановы сям’я прыдумала сама, яна мае двайны сэнс. Афіцыйна — «Чашки&ложки», а скарочана ЧИЛ.

«ЧЫЛ — больш моладзевы слэнг — адпачыць, пачыліць, прыйсці ў спакойную абстаноўку, паслухаць лёгкую музыку, папіць смачную каву».

Смачная кава і дэсерты ўласнай вытворчасці

«Што тычыцца кавы, мы вельмі сур’ёзна падышлі да выбару збожжа. Мы заказвалі ў розных пастаўшчыкоў розныя віды. Барыста праводзілі дэгустацыю і метадам галасавання мы выбралі пэўнага пастаўшчыка», — распавядае гаспадыня кавярні.

Кававая карта дзеліцца на класічнае і аўтарскае меню. Па словах Аксаны Календы аўтарскае меню яны распрацавалі разам з барыста Цімурам, які ў грамадскім харчаванні ўжо шосты год. Ён пачынаў у Pizza&Coffee, пазней прайшоў курсы JS barista ў Мінску, затым працаваў у кавярні «CoFeCo». Частку аўтарскага меню ім дапамагла скласці каманда маскоўскіх прафесіяналаў.

кофейня Чашки&ложки Большая Троицкая

Каву ва ўстанове можна замовіць не толькі са звычайным малаком, але і з раслінным: міндальным, какосавым, рысавым ці аўсяным. Для аматараў ёсць безкафеінавая кава. Таксама ў кафэ прапануюць напоі і ліманады. Бліжэй да вясны з’явіцца халодная кава, зараз пакінулі толькі халодны смузі. «Але па жаданні кліента барыста можа зрабіць і халодную каву», — удакладняе Аксана.

Ва установе не выкарыстоўваюць штучныя інгрэдыенты, а толькі натуральныя прадукты. «Дапусцім, калі гэта малінавы раф, то гэта будзе не сіроп, а менавіта сапраўдная маліна, якая сцёртая ў парашок. Глінтвейн і гарачы шакалад мы самі варым, не выкарыстоўваем ні сумесі, ні парашкі». У будучыні аўтарскае меню плануюць пашырыць. Па словах Аксаны, ёсць шмат ідэй.

кофейня Чашки&ложки Большая Троицкая

Асартымент гарбаты таксама разнастайны: пачынаючы ад чорнай і заканчваючы малочным улунам.

Дэсерты ў кавярні ўласнага прыгатавання. Ва ўстанове працуе свая кухня, дзе кухары робяць дэсерты падобныя да хатніх. Пакуль ёсць чатыры віды прысмакаў: бульба, тырамісу, шакаладны торт і трайфл.

кофейня Чашки&ложки Большая Троицкая

«Будзем пашыраць лінію дэсертаў, таму што хочацца час прысвячаць не толькі каве, але і выпечцы». У будучыні тут плануюць выпякаць круасаны.

Эспрэса і амерыкана можна купіць за 2,5 рубля, капучына за 3, латте за 3,5. Бульбу — за 2, а шакаладны торт — за 4 рублі.

Дызайн прыдумалі самі

Дызайн муж і жонка таксама прыдумалі разам. Сталы, канапы і барную стойку праектаваў Аляксей. «Ён, у асноўным, быў у мяне адказным за сам рамонт, за аздабленне. Я ўжо прыдумляла нейкія дызайнерскія штучкі, штосьці накшталт гадзінніка, насценнага пано».

Лыжкі ўласнікі выкарыстоўвалі са сваёй калекцыі гарадоў розных краін, у якіх яны былі: Рыга, Брусэль, Санкт-Пецярбург, Мілан, Венецыя, Ватыкан, Дубай, Рым, Барселона і Мальта.

Дызайн аформлены пакуль не да канца. На белых сценах будуць вісець фота-палотны з інфармацыяй пра каву. «Іх ужо амаль зрабілі, засталося толькі прывезці і павесіць».

Кавярня разлічана на 17 пасадачных месцаў. Вясной на вуліцы плануюць зрабіць невялікую тэрасу.

кофейня Чашки&ложки Большая Троицкая

Пастаянныя і часовыя зніжкі

«Мы зробім тое, што ніхто не рабіў - нашы зніжкі будуць спалучацца», — распавядае Аксана аб фішцы ўстановы.

У кафэ будуць пастаянныя зніжкі: сёмая кава бясплатна, карта лаяльнасці кліента, карта любімага госця з 14% зніжкай, студэнтам пры прад’яўленні студэнцкага — зніжка 10%. Будуць часовыя, тыднёвыя акцыі. Так з 21 па 27 верасня ў кафэ дзейнічае акцыя, для тых, хто прыйдзе ў кедах — зніжка на каву 20%. «Але адпаведна, калі ён студэнт і ў яго ёсць карта любімага госця, усе гэтыя зніжкі можна скласці, і атрымаецца зніжка 44%».

Плануюцца розныя акцыі: напрыклад, той, хто прыйдзе са сваім кубкам, атрымае зніжку, таксама ў кавярні плануюць праводзіць тэматычныя вечары.

У будучыні Аксана хацела б мець сетку кавярняў. «Я вырашыла спыніцца на маленькай кавярні, адтачыць свае ўменні, навыкі і ў далейшым, калі ўсё атрымаецца, я б хацела стварыць сетку».

кофейня Чашки&ложки Большая Троицкая

Адрас: вул. Вялікая Траецкая, 9
Графік працы: нд-чц с 11.00 до 23.00, пт-сб с 11.00 до 00.00

Чытайце таксама:

Самы малады журналіст Hrodna.life. Скончыла школу сучаснай журналістыкі ў Гродне. Па адукацыі - эканаміст, але зразумела, што хоча займацца журналістыкай. Спецыялізуецца на тэкстах пра архітэктуру, падарожжы, пра людзей і для людзей.