Дырэктара ЦСК «Нёман» Віктара Шумеля звольнілі распараджэннем старшыні аблвыканкама — работнікі спарткомплексу паскардзіліся на выкарыстанне службовага аўтамабіля Шумелем у непрацоўны час. Віктар распавёў, што працаўнікі не пісалі зваротаў, а яго рыхтаваліся «закрыць».

Работнікі цэнтральнага спартыўнага комплексу звярнуліся ва ўпраўленне і ў РАУС Ленінскага раёна горада Гродна з інфармацыяй аб злоўжыванні дырэктарам сваімі службовымі паўнамоцтвамі, паведамілі grodnonews. by ва ўпраўленні спорту і турызму аблвыканкама. Гаворка ідзе аб выкарыстанні былым кіраўніком ЦСК «Нёман» службовага аўтамабіля ў непрацоўны час і падчас знаходжання ў працоўным адпачынку.

 — Шляхам маніторынгу было ўстаноўлена, што ён не падаваў шляхавыя лісты, было зафіксавана нямэтавае выкарыстанне службовага транспартнага сродку. Акрамя таго, Шумель карыстаўся для запраўкі службовай заправачнай картай. Паводле інфармацыі кіраўніцтва ЦСК «Нёман», дырэктар выкарыстаў службовы аўтамабіль, не ставячы ў вядомасць іншых службовых асоб, — растлумачыў grodnonews. by Алег Андрэйчык, начальнік упраўлення спорту і турызму аблвыканкама.

У сувязі з гэтымі фактамі ўпраўленнем спорту і турызму была накіравана дакладная запіска на імя старшыні аблвыканкама.

Як патлумачыў grodnonews. by Валерый Клімовіч, начальнік Галоўнага ўпраўлення арганізацыйна-кадравай работы аблвыканкама, дырэктар ЦСК «Нёман» Віктар Шумель быў звольнены распараджэннем уласніка згодна з артыкулам 257 Працоўнага кодэкса Беларусі. Да гэтага на імя старшыні аблвыканкама Шумелем быў накіраваны ліст, у якім ён паведаміў, што адмаўляецца выконваць абавязацельствы, прадугледжаныя кантрактам.

Працоўная кніжка, па інфармацыі Алега Андрэйчыка, Шумелю была адпраўлена па пошце. Ацэнку дзеянням былога дырэктара дадуць праваахоўнікі.

Віктар з’ехаў у Польшчу

Віктар Шумель прапрацаваў дырэктарам спарткомплексу амаль тры гады. Пытанняў да яго працы, са слоў былога дырэктара, не ўзнікала. Цяпер ён з’ехаў у Польшчу па відзе на жыхарства і знаходзіцца на карантыне. Шукае жыллё і працу.

 — Ёсць спецыяльны артыкул для кіраўніка ў Працоўным кодэксе — 257, па якім могуць звольніць без матываў, аб’явы, папярэджанняў. Менавіта ім скарысталіся. Па стандартных артыкулах я не мог быць звольнены падчас адпачынку. Указ быў падпісаны 25 жніўня — у апошні працоўны дзень Краўцова, — сказаў Віктар Шумель падчас прамога эфіру з Андрэем Ірхай у Instagram. — Мне крыўдна, таму што вельмі многае было зроблена, многія праекты былі пачаты і яны, груба кажучы, заглухнуць. Гэта крыўдна.

21 жніўня Віктар паехаў у Мінск, таму што увайшоў у Каардынацыйны савет. Тады ж яму паступіў званок з праваахоўных органаў. Хто менавіта тэлефанаваў, Віктар не памятае. Яму паведамілі, што яго работнікі падавалі заяву аб выкарыстанні Віктарам службовай машыны для паездак на мітынгі. Шумель адказаў, што аўтамабіль знаходзіцца ў Гродне на стаянцы. Віктар пазней даведаўся — работнікі не падавалі заявы.

Калі Віктар вернецца ў Беларусь

 — Цяпер там разглядаюць іншыя розныя артыкулы. Спрабуюць і па стадыёне знайсці нешта, каб закрыць мяне. Я асцерагаўся. Даведаўся аб артыкуле аб масавых беспарадках. Пайшоў да адваката. Думаў, чаго мне баяцца, давайце па законе. На што адвакаты сказалі: улічваючы вашу палітычнасць у дадзены момант, ніякі адвакат вам не дапаможа. Гэта я чуў ад двух адвакатаў. Пасля гэтага я звязаўся з людзьмі з праваахоўных органаў праз свае каналы і тое ж самае пачуў: «Цябе выклічуць хутка на допыт, і, незалежна ад таго, у якой якасці, гэта будзе твой апошні допыт». Таму я прыняў для сябе рашэнне, што варта пакуль схавацца.

Віктар плануе вярнуцца ў Беларусь, калі зразумее, што зможа сябе абараняць законнымі спосабамі.

 — Што тычыцца таго, што людзі паверылі мне, людзі пайшлі… Я не вельмі рады фармулёўцы «новы мэр», не імкнуўся да гэтага і не імкнуся. Я выказваў сваё меркаванне, — сказаў Віктар.

Таксама ў эфіры ў Instagram Віктар распавёў, чаму наважыўся выйсці з дзяржаўнага прафсаюзу і як яго затрымлівалі ў дзень выбараў 9 жніўня.

Перадрук матэрыялаў Hrodna.life магчымая толькі з пісьмовага дазволу рэдакцыі. Кантакт info@hrodna.life