Яўген Дудкін і Зміцер Салаш
31 жніўня гродзенцы Яўген Дудкін і Зміцер Салаш паспрабавалі падаць у Гродзенскі гарадскі савет дэпутатаў дакументы для правядзення сходу з нагоды адклікання дэпутата Ліліі Кір'як. Яна прадстаўляе інтарэсы 51 выбарчай акругі Гродна ў Палаце прадстаўнікоў Нацыянальнага сходу Рэспублікі Беларусь. Зарэгістраваць дакументы не ўдалося.
У падачы дакументаў гродзенцам адмовілі на падставе таго што, як аказалася, старшыня гарадскога савета дэпутатаў Барыс Фёдараў знаходзіцца ў адпачынку, а яго сакратар адсутнічае на працы. «Па якіх прычынах, нам невядома», — расказаў Яўген Дудкін.
У гарадскім выканаўчым камітэце гродзенцам дазволілі запісацца на прыём толькі на 10 верасня.
«Мы будзем выкарыстоўваць іншыя варыянты», — адзначыў Яўген Дудкін.
— На жаль, мы бачым, што ўлада не ідзе да нас насустрач. Зваротак, які немагчыма было падаць, мы адправілі па электроннай пошце, адправім заказным лістом, — патлумачыў Зміцер Салаш, ініцыятар падачы дакументаў у горсавет. — Каб маглі правесці сход з нагоды адклікання Кір'як Ліліі Вацлаваўны. Гэта першы крок, мы будзем змагацца законнымі метадамі.
Пад зваротам сабралі 273 подпісы выбрацаў з 51 выбарчай акругі. Па словах Зміцера Салаша, подпісаў больш, яшчэ ёсць асобныя сабраныя подпісы, не далучаныя сёння. Для дадзенага варыянту зваротку патрэбна 150 подпісаў. «Мы прыкладзем усе подпісы, адправім заказным лістом і будзем чакаць адказу ўладаў. Мы хочам дыялогу», — сказаў ён.
У Гродне існуе некалькі падобных ініцыятыў. Іх кіраўнікі сустракаліся, каб скаардынаваць дзейнасць, растлумачыў Яўген Дудкін.
«Кожны грамадзянін мае абавязак бараніць краіну ад таго, што сёння адбываецца ў дзяржаве: катаванні, гвалт, фальсіфікацыі. Фактычна, сёння бачым захоп улады, і не бачым дыялогу. Калі гарадзенцы дамагліся магчымасці мірна, з песнямі, з шарыкамі мітынгаваць на плошчы, а потым ім забараняюць, і праводзяць ужо мітынг для іншага апанента — гэта хлусня і непавага для гарадзенцаў», — лічыць Яўген.
Па словах актывістаў, людзі падпісваліся ахвотна, без страху.
Лілія Кір'як — дэпутатка сёмага склікання Палаты прадстаўнікоў. З’яўлялася дэпутаткай Гродзенскага гарадскога Савета дэпутатаў дваццаць сёмага склікання.
Ініцыятывы па адкліканні выбарцамі дэпутатаў з прычыны іх бяздзейнасці з’явіліся ў розных гарадах Беларусі. Пра тое, што ў грамадзян ёсць такое права, напярэдадні нагадалі адзін з членаў прэзідыума Каардынацыйнага савета і ініцыятыва «Сумленныя людзі».
Да гэтага Беларускі Хельсінкскі Камітэт запатрабаваў ад дэпутатаў Нацыянальнага сходу Беларусі стварыць парламенцкую камісію па расследаванні катаванняў. Праваабаронцы заклікалі беларусаў пісьмова (праз пошту, афіцыйны e-mail) звярнуцца да сваіх дэпутатаў з патрабаваннем ініцыяваць стварэнне такой камісіі.
Чытайце таксама:
Гродзенскія пункты выдачы заказаў Wildberries і Ozon аказаліся перапоўнены падарункамі для жывёл. Гэта вынік Таемнага…
Новы сувенір у выглядзе "раскладанкі" са знакавымі аб'ектамі Гродна ствараюць улады. Яго выканаюць у выглядзе…
Некалькі сотняў Дзядоў Марозаў, Снягурак, сабачак, вавёрачак і разнастайных іншых персанажаў 20 снежня прайшлі ад…
Трохпакаёвая кватэра знаходзіцца на вуліцы Савецкіх Пагранічнікаў. Сцены ў ёй абвешаныя рэпрадукцыямі, дзвярныя праёмы выкананы…
Спецыяльнае праграмнае забеспячэнне для сачэння за актыўнасцю ў камп'ютарах закупляе Гродзенскае агенцтва па дзяржаўнай рэгістрацыі…
У Гродне рэканструююць тэрыторыю, прылеглую да вадаёма па вул. Рэпіна. Там жа ўладкуюць дзіцячую інклюзіўную…