19 чэрвеня блізу 15 гадзіны Тэлеграм-канал «Краіна для жыцця» (“Страна для жизни”), які належаў Сяргею Ціханоўскаму, узламалі невядомыя.
Спачатку з канала сталі актыўна выдаляць ранейшыя допісы і ўдзельнікаў, пасля назва змянілася на “РаЗАм”, пазней ён стаў недаступны.
Слоган і лагатып належаць БРСМ. Зараз пры спробе зайсці з’яўляецца надпіс “Канал недасяжны, бо парушыў правілы Telegram”. Канал меў блізу 50 тысяч падпісантаў.
Паводле папярэдняй інфармацыі карыстальнікаў, канал узламалі праз акаунт Сяргея Ціханоўскага.
Зараз Ціханоўскі заключаны пад варту. Яго і яшчэ сем затрыманых на пікеце ў Гродне вінавацяць у «арганізацыі і падрыхтоўцы дзеянняў, што груба парушаюць грамадскі парадак» (ч.1 арт. 342 Крымінальнага кодэкса). Гэты артыкул прадугледжвае штраф, арышт, абмежаванне або пазбаўленне волі на тэрмін да 3 гадоў. Расследаванне праходзіць у рамках крымінальнай справы аб гвалце ў дачыненні да супрацоўнікаў органаў унутраных спраў.
Паводле незарэгістраванага праваабарончага цэнтра “Вясна”, на Сяргея Ціханўскага заведзеная яшчэ адна крымінальная справа – паводле арт. 191 Крымінальнага кодэкса Беларусі за перашкоду дзейнасці ЦВК. Скаргу на яго ў Следчы камітэт падала Лідзія Ярмошына, старшыня ЦВК. У дзеяннях блогера на пікеце па зборы подпісаў за вылучэнне яго жонкі, Святланы Ціханоўскай, у кандыдаты на прэзідэнцкія выбары, Лідзія Ярмошына пабачыла пагрозу дляя сябе.
Чытайце таксама: «Дзеці або далейшая барацьба». Святлана Ціханоўская атрымлівае званкі з пагрозамі
Што адбылося ў Гродне ў дзень візіта Ціханоўскага?
У Гродне затрымалі палітычных актывістаў. Увечары 29 траўня на пікеце падчас збору подпісаў за Святлану Ціханоўскую адбыўся інцыдэнт, у выніку якога блогера Сяргея Ціханоўскага і некаторых яго прыхільнікаў затрымала міліцыя. Сярод затрыманых – сябра ініцыятыўнай групы Дзмітрый Фурманаў. Удзельніцу верагоднай правакацыі супраць Ціханоўскага апазналі ў сацсетках.
Затрыманні працягнуліся на наступны дзень. 30 траўня затрымалі актывіста Мікалая Саляніка, які днём раней вёў перамовы з кіраўніцтвам міліцыі і спрабаваў даведацца, за што быў затрыманы і дзе знаходзіцца Ціханоўскі. Праваабарончы цэнтр “Вясна” склаў спіс затрыманых у Гродне. Частку з іх перавезлі ў Мінск.
Гэта не спыніла ініцыятыўную групу Ціханоўскай. Афіцыйна было заяўлена, што падчас інцыдэнту пацярпеў міліцыянт. Узбуджаная крымінальная справа па факце гвалту ў адносінах да супрацоўнікаў органаў унутраных справаў. Нягледзячы на гэта, на наступныя дні да пікету Святланы Ціханоўскай выстраіліся чэргі – людзі стаялі, каб аддаць подпіс, нават пад дажджом.
Праваабаронцы прызналі Сяргея Ціханоўскага і іншых затрыманых у Гродне палітычнымі вязьнямі.
У выніку пад удар патрапілі і выпадковыя людзі. Увечары 29 траўня ў сацсетках пачалося цкаванне выпадковага чалавека, якога прынялі за супрацоўніка органаў у цывільным, які ўдзельнічаў у затрыманні ў Гродне. У дзяржаўных СМІ з другога боку пачалося цкаванне 81-гадовай пенсіянеркі Галіны Філіпаўны, якая падчас стрыму з Савецкай плошчы выказалася супраць Лукашэнкі і ў падтрымку Ціханоўскіх. Пенсіянерку Станіславу Дамшэль, якая 29 траўня таксама была на Савецкай, абвінавацілі ў дробным хуліганстве, але яна не пусціла міліцыю да сябе дадому. Выпадковыя людзі былі і сярод затрыманых на плошчы.
