Справу аб выкладчыку, які курыў марыхуану з непаўнагадовымі, разгледзяць у Гродзенскім абласным судзе. Раней яго асудзілі да 8 гадоў абмежавання волі. З прысудам суда Ленінскага раёна не пагадзіліся абодва бакі.
Па дадзеных следства, 38-гадовы гродзенец з верасня 2018 года па кастрычнік 2019 года набываў марыхуану і частаваў ёю вучняў. Судовае разбіральніцтва доўжылася амаль два месяцы.
Абвінавачаны атрымаў восем гадоў пазбаўлення волі. Яго прызналі вінаватым у куплі наркотыкаў без мэты і з мэтай збыту, схіленні вучняў да ўжывання наркотыкаў і прадастаўленні памяшкання для ўжывання. Суддзя таксама запрасіў штраф — 250 базавых велічынь.
Што кажа адвакат?
Адвакат абвінавачанага паведаміў Hrodna.life, што апеляцыя на рашэнне суда Ленінскага раёна Гродна была пададзеная. Якога выніку будуць дамагацца ў абласным судзе, ён не распавёў, спасылаючыся на адвакацкую таямніцу.
Раней адвакат прасіў прызначыць мінімальнае пакаранне паводле ч. 1 арт. 328, не звязанае з пазбаўленнем волі. Ён казаў, што віна па арт. 332 ч. 1 і арт. 331 ч. 2 КК (скланенне непаўналетніх да ўжывання наркотыкаў і прадастаўленне для гэтага памяшкання), не даказаная.
Што кажа бок абвінавачвання?
Бок абвінавачання таксама падаў апеляцыйны пратэст. У ім просяць прызнаць А. вінаватым па ч. 3 арт. 328. Таксама бок абвінавачвання не згодны з тым, што суд выключыў эпізоды, калі А. схіляў непаўналетніх да ўжывання наркатычных сродкаў і прадастаўляў памяшканне ў перыяд часу з верасня 2018 года па 4 кастрычніка 2019.
— Суд падзяліў ч. 3 арт. 328 на ч. 1 і ч. 2 арт. 328 і, адпаведна, прызначыў меншае пакаранне. Мы лічым, што кваліфікацыя дзеянняў абвінавачанага па ч. 1, ч. 2 арт. 328 няправільная, а яго дзеянні трэба кваліфікаваць па ч. 3, — паведаміў Hrodna.life пракурор.
Таксама бок абвінавачвання просіць аб пазбаўленні А. права займацца дзейнасцю, звязанай з аказаннем іншых відаў адукацыі, не ўключаных у іншыя групоўкі, на пяць гадоў.
Бок абвінавачвання запытае тое ж пакаранне, што і ў судзе Ленінскага раёна Гродна, — 11 гадоў пазбаўлення волі.
Як ішло судовае разбіральніцтва?
У справе — трое непаўналетніх пацярпелых. З адным пацярпелым налічваецца тры эпізоды, другім — дзевяць, трэцім — дванаццаць. З паказанняў вынікае, што вучні разумелі, што гаворка ідзе аб марыхуане — наркотыку. Некаторыя апраўдваюцца, што толькі падчас другога ўжывання даведаліся, што марыхуана забароненая ў Беларусі. Тым не менш, згаджаліся ўжываць яе і далей.
У канцы следства мужчына даў паказанні і сказаў, што з вучнямі ён курыў палын і шалфей, а замест ЛСД былі раздрукаваныя кавалачкі паперы. Па яго словах, ён спецыяльна ствараў ілюзію чагосьці забароненага, калі кожны з вучняў заўважыў у кабінеце прыстасаванні для курэння марыхуаны. Таго, што ён сам ужываў і аднойчы набыў марыхуану, выкладчык не адмаўляе.
