У Беларусі да 1 ліпеня абмежавалі выдачу ў адны рукі некаторых лекаў, масак, аднаразовых пальчатак, антысептыкаў. Гэта павінна дапамагчы вырашыць праблему з іх дэфіцытам. Мы спыталі чытачоў Hrodna.life, колькі аптэк ім давялося абысці, каб купіць патрэбныя падчас эпідэміі тавары. Аказалася, праблема сапраўды ёсць.
“Купіла сабе таблеткі ад ціску на 2 месяцы. Санітайзары, парацэтамол, маскі і пальчаткі купіла яшчэ месяц таму, зусім свабодна і па разумных цэнах. Зараз нічога гэтага няма ў продажы”, – напісала адна з самых запаслівых нашых чытачак.
Астатнім, менш прадбачлівым, пашанцавала менш. У сярэднім нашы чытачы ў Instagram абыходзілі 6 аптэк перш чым знаходзілі патрэбны тавар. Некаторыя не знайшлі наогул. Адна з чытачак абыйшла 8 аптэк, але «не купіла нічога, акрамя 9 пар пальчатак (апошнія) выпадкова на Фолюшы”.
Іншая чытачка абыйшла 7 аптэк, “потым плюнула і пашыла 10 масак, рукамі, сама, на ўсю сям’ю”. Хтосьці сцвярджае, што абышоў у пошуках антысептыку “ўсе аптэкі Фолюша, Паўднёвага” – безвынікова. “У Гродне тыдзень таму парацэтамола не аказалася ні ў адной аптэцы”, – напісалі нам таксама.
“На вул. Томіна і вул. Славінскага пастаянна няма масак”, – напісаў яшчэ адзін з чытачоў. Іншы тэлефанаваў на гарачую лінію і сцвярджае, што пачуў там у адказ: “Не ведаем, калі будуць маскі”.
Лайфхак: можна стаць у чаргу двойчы
Адносна масак і антысептыкаў аптэкі ўжо ў сакавіку ўводзілі ўнутраныя абмежаванні. Так, на мінулым тыдні гродзенцы, маці хлопца з анкалогіяй, якому маскі патрэбныя ў вялікай колькасці кожны дзень, адмовіліся прадаваць больш дзвюх на рукі. Калі журналіст s13.ru звязаўся з аптэкай, дзе гэта адбылося, там адказалі, што можна стаць у чаргу некалькі разоў. Карэспандэнту Hrodna.life абмежаванне на продаж санітайзара ў аптэцы на Антонава патлумачылі тым, што “іншаму не хопіць”: усяго заставалася шэсць бутэлечак.
Каму без маскі нельга выходзіць з дому
8 красавіка выйшаў загад, згодна з якім кантакты першага ўзроўню інфіцыраваных COVID-19 больш не будуць шпіталізаваць. Іх абавяжуць самаізалявацца дома, і толькі пры немагчымасці самаізаляцыі будуць накіроўваць у кантактныя цэнтры. Тым, хто адправіцца на самаізаляцыю, выдадуць пад подпіс патрабаванне аб захаванні правіл, сярод якіх – пры выхадзе з жылога памяшкання ў выпадках крайняй неабходнасці выкарыстоўваць маску. Таксама дэзсродкамі павінны забяспечыць работнікаў кіраўнікі прадпрыемстваў і арганізацый, маскі рэкамендуюць апранаць усім, у каго ёсць сімптомы рэспіраторнага захворвання.
Чаму менавіта гэтыя прэпараты
Парацэтамол зараз можна купіць не больш за 40 таблетак незалежна ад дазоўкі. Менавіта яго, а не, напрыклад, ібупрафен, рэкамендуюць прымаць, каб збіць высокую тэмпературу. Эксперты лічаць, што супрацьзапаленчы кампанент ібупрафена можа змяншаць эфектыўнасць імуннай сістэмы чалавека ў барацьбе з вірусам, піша bbc.com. Сусветная арганізацыя аховы здароўя (СААЗ) рэкамендавала людзям з сімптомамі Covid-19 пазбягаць яго прымянення.
Такім жа чынам абмежавалі адпачынак і для “Арпетола” і “Флустопа”. “Арпетол” – супрацьвірусны прэпарат. “Флустоп” – беларускі аналаг «Таміфлю», якім лячылі пнеўманіі і свіны грып у 2009 годзе. Як пісаў kp.by, менавіта “Флустоп” цяпер часта прызначаюць лекары пацыентам, якія скардзяцца на тэмпературу і іншыя праявы хваробы. Тлумачаць гэта тым, што акрамя каранавіруса ходзіць цяпер і звычайны грып, які таксама выклікае вірусную пнеўманію. Таксама «Флустопам» камплектуюць бальніцы.
Сапраўды, з абласных цэнтраў, па звестках apteka.103.by на вечар 10 красавіка, прэпарат ёсць толькі ў адной аптэцы Віцебска і адной (у колькасці 1 шт.) Гомеля. З “Арпетолам” сітуацыя не такая крытычная.
Як піша t*t.by, урад прыняў рашэнне вызначыць адзіным аператарам па рэалізацыі ўсяго асартыменту ахоўных вырабаў РУП «Белфармацыя», а для паставак яго ў медустановы – РУП “Белмедтэхніка”. Гэта павінна забяспечыць празрыстасць паставак і раўнамернае размеркаванне ахоўных сродкаў па ўсёй краіне.
