Першая смерць ад каранавіруса здарылася ў Віцебску. Ноччу 31 сакавіка памёр заслужаны артыст Беларусі, акцёр тэатра імя Якуба Коласа Віктар Дашкевіч. Яму было 75 гадоў.

Гэтую навіну «Нашай Ніве» паведаміла жонка артыста.

У яе таксама запаленне лёгкіх — але яна ізаляваная дома, дачка прыносіць ёй прадукты і пакідае пад дзвярыма.


Чытайце таксама: «Пнеўманій мінімум у 2−3 разы больш», — каранавірус у Віцебску вачыма доктаркі


Як піша T*T.BY, дыягназ запаленне лёгкіх Віктару і яго жонцы паставілі ў паліклініцы. Іх адправілі на шпіталізацыю ў тубдыспансер. Аднак ён быў перапоўнены, таму ім выпісалі антыбіётыкі і адпусцілі дадому.

Дома ў акцёра была тэмпература. Дзяжурны лекар сказала, што трэба неадкладна ехаць у бальніцу.

Мужа і жонкі паклалі ў розныя палаты ў скурвендыспансеры. Узялі тэсты на каранавірус, але сказалі, што вынікі адмоўныя.

Разам з акцёрам знаходзіўся мужчына, якога пазней забралі з бальніцы. Чаму і куды — ніхто не сказаў. Затым ён ляжаў з іншымі трыма мужчынамі.

24 сакавіка акцёру стала горш, і яго перавялі ў Віцебскі абласны клінічны спецыялізаваны цэнтр. Там ўзялі новы аналіз на каранавірус. 26 сакавіка стала вядома, што вынік станоўчы.

Жонку акцёра выпісалі 26 сакавіка, яна на 14-дзённым карантыне. А яе муж быў у рэанімацыі, на апараце ШВЛ.

За мяжу акцёр не ездзіў.


«Выносілі з інсультам, дзядоў, бабак». Што адбываецца ў Іўі, дзе пацьвердзілі выпадак каранавірусу


Паводле апошняй інфармацыі Міністэрства аховы здароўя Беларусі, апублікаванай 30 сакавіка ў Telegram, у Беларусі 152 выпадкі COVID-19: 47 пацыенты «выпісаныя або рыхтуюцца да выпіскі», яшчэ 105 «знаходзяцца пад кантролем мэдыкаў і на лячэнні»