Актывісты збіралі подпісы, каб прыбраць з парку Жылібера раяль. 4 сакавіка яны прыйшлі запісвацца на прыём да старшыні гарвыканкама Мечыславу Гоя, але ён іх тут жа прыняў. Выслухаўшы, загадаў службам прыбраць раяль.
Яго павінны былі прыбраць заўтра, 5 сакавіка, але ўвечары 4 сакавіка раяля ўжо не было — толькі лаўка.
Незвычайны раяль, на якім нельга граць, з’явіўся ў парку Жылібера 14 лютага. Яго ўстаноўкай займаўся смеццесартавальны завод, які у 2018 годзе ўсталёўваў у цэнтры Гродна сметніцы ў выглядзе джэнтльменаў і дам з сабачкамі.
У раяля былі ўстаноўлены датчыкі руху, яны рэагавалі, калі да прылады падыходзілі людзі. Спачатку там граў Стас Міхайлаў, потым — Бетховен. Людзі крытыкавалі дызайн раяля і казалі, што ён выклікае ў іх пахавальныя асацыяцыі.
