Чыгунка, якая злучае Вільнюс і Друскінінкай, дапаможа скараціць аўтамабільны рух да аднаго з самых папулярных курортаў у Літве, сказаў delfi.lt мэр Друскінінкай Рычардас Малінаўскас.
«Калі б вы маглі прыехаць у Вільню з Друскінінкай за гадзіну, праглядаючы інтэрнэт, папіваючы каву і не рызыкуючы няшчаснымі выпадкамі, гэта было б нашай марай», — сказаў мэр Друскінінкая.
Мэр Варэнскага раёна Альгіс Кашэта падтрымаў яго і сказаў, што гэта таксама дапаможа людзям, якія пражываюць у яго муніцыпалітэце, наведаць сваякоў, якія пражываюць у Беларусі.
«Гэта было б вельмі дарэчы, бо гэта не толькі палегчыць нам сувязь з беларускімі гарадамі і пасёлкамі, дзе ў многіх людзей у гэтым раёне шмат сваякоў, але і паскорыць развіццё бізнесу. Я думаю, што гэта было б надзвычай каштоўна на нацыянальным узроўні, так як Гродна з’яўляецца буйным прамысловым цэнтрам», — сказаў Кашэта.
Міністр: Мы ставімся да гэтага вельмі сур’ёзна
Ідэя аднаўлення чыгуначнай лініі Вільня-Друскінінкай-Гродна была агучана на мінулым тыдні на прэс-канферэнцыі міністра транспарту і камунікацый Яраславаса Наркевічуса.
«Мы вельмі сур’ёзна ставімся да аналізу магчымай рэканструкцыі чыгуначных шляхоў паміж Гродна і Друскінінкаем, падлучаючы да гэтага Вільню», — сказаў Наркевічус.
Наркевічус дадаў, што гэта будзе выгадна як з пункту гледжання турызму, так і бізнесу, таму што гэта будзе садзейнічаць павелічэнню турыстычных патокаў і грузавых перавозак.
Разглядаюцца тры варыянты
Прэс-сакратар Літоўскай чыгункі Гінтарас Любінас паведаміў, што ў цяперашні час разглядаюцца тры варыянты аднаўлення зносінаў з Парэчча пад Гроднам з Вільняй — з будаўніцтвам шляхоў праз Друскінінкай альбо наўпрост з Марцінконіса да Парэчча з адгалінаваннем да Друскінінкая.
«Выбар варыянту будаўніцтва або перабудовы лініі залежыць не толькі ад пасажыраў, якія вандруюць з мэтай турызму, але таксама і грузавых перавозак у напрамку Беларусі», — сказаў прадстаўнік Літоўскай чыгункі.
«Гэта павінна быць рашэнне ўрада»
Мэры Друскінінкая і Варэнскага раёна перакананыя, што рэканструкцыя чыгуначнай лініі да Гродна абыйдзецца ў сотні мільёнаў еўра і што муніцыпалітэты могуць унесці сімвалічны ўклад. Самастойна Друскінінкай не ў стане столькі інвеставаць.
«Гэта павінна быць рашэнне ўрада, гэта павінен быць праект агульнадзяржаўнага значэння», — сказаў Кашэта.
Мэры Друскінінкая і Варэнскага раёна заявілі, што атрымалі запэўніванні ад прадстаўнікоў Гродзенскай вобласці, што яны таксама зацікаўлены ў аднаўленні ўчастка да Гродна.
Участак чыгункі Вільня-Марцінконіс-Гродна быў часткай чыгуначнай лініі Санкт-Пецярбург-Варшава, пабудаванай у часы царскай Расіі, таксама было адгалінаванне ад Парэчча да Друскінінкай. Гэты ўчастак чыгункі быў дэмантаваны больш за два дзесяцігоддзі таму.
