Амерыканскі архітэктар на пенсіі Ількер Каджахан, які пераехаў у Гродна, адкрыў персанальную выставу ў культурным цэнтры «Фестывальны», паведамляе rgazeta.by.

Гэтым разам Ількер прадставіў каля ста работ: эскізы інтэр’ераў і экстэр’ер будынкаў, выкананыя для заказчыкаў ў Нью-Ёрку, карціны пейзажаў, створаных падчас падарожжа, і партрэты сваякоў і сяброў, напісаныя акварэллю.

– Гэтыя працы не прадаюцца. Проста хацеў паказаць гродзенцам сваю тэхніку выканання эскізаў у сферы архітэктуры. Я не працую на камп’ютары, ўсё раблю ад рукі, маркеры ў мяне заўсёды з сабой. Вы можаце ўбачыць работы, выкананыя на звычайных папяровых сурвэтках, якія апынуліся пад рукой, – зазначыў гаспадар выставы.

Ількер лічыць, што яго архітэктурныя эскізы будуць цікавыя, перш за ўсё, студэнтам. Бо ў такой манеры ў свеце працуе яшчэ толькі адзін чалавек, які пражывае ў Японіі. На палотнах публіка бачыць напісаныя офісныя будынкі, «апранутыя» у шкло, інтэр’еры будынка фермерскага рынку, гасцініцы, кафэ і кватэры-студыі амерыканскай сям’і.

Больш за тры дзесяткі работ Ількер выканаў, пражываючы ў Гродне. Па іх можна даведацца, дзе ён любіць шпацыраваць: Новы замак, пажарная каланча, плошча Савецкая з домам Мураўёва і Фарным касцёлам, старая забудова па вуліцы Савецкай і гандлёвы дом «Нёман».

Мастак намаляваў сваю сям’ю: старэйшую дачку з мужам, якія пражываюць у Стамбуле, і малодшую з хлопцам з Беларусі, якіх пакінуў у Нью-Ёрку. Побач – профіль яго жонкі, гродзенкі Марыны, і яе старэйшай дачкі. Выстава будзе доўжыцца да 5 лютага.