Выйшаў шосты нумар часопіса “Гарадзенскі гадавік”. Што пачытаць?

У Гродне прэзентавалі шосты нумар навуковага часопіса “Гарадзенскі гадавік”. Ён змяшчае артыкулы па гісторыі ўрбаністыкі, архітэктуры і аховы спадчыны Гродна. Выпуск прысвяцілі памяці гродзенскага краязнаўцы Віктара Саяпіна, які памёр у 2017 годзе. У часопіс уключылі яго поўную бібліяграфію.

Часопіс заснавалі ў 2011 годзе гродзенскія гісторыкі і краязнаўцы, каб асвятляць гісторыка-культурную праблематыку, не даследаваную дагэтуль. Як кажа навуковы рэдактар часопіса, доктар гістарычных навук Юрый Гардзееў, гісторыкі могуць памыляцца, але важная сама наяўнасць дыскусіі ў грамадстве.

Хто і пра што пісаў у новы нумар?

Чарговы нумар складаецца з двух блокаў: гістарычнага і таго, які расказвае пра ахову гісторыка-культурнай спадчыны. У падрыхтоўцы прынялі ўдзел восем гродзенскіх гісторыкаў.

Мечыслаў Супрон даследаваў, хто пабудаваў Фару Вітаўта ў Гродне. Аляксандр Перагудаў напісаў артыкул пра гравюру Адэльзаўзера-Цюнта. Ігар Трусаў даследаваў гісторыю аховы архітэктурнай спадчыны і рэстаўрацыі ў Гродне. Наталля Сліж расказала пра вопыт захавання гісторыка-культурнай спадчыны ў ЗША. Андрэй Вашкевіч напісаў пра гісторыка-культурную спадчыну Гродна ў 1920-х. Юрый Гардзееў даследаваў урбаністычнае развіццё міжваеннага Гродна. Інэса Ілюшына падрыхтавала поўную бібліяграфію працаў Віктара Саяпіна. Андрэй Ціхаміраў падрыхтаваў дзве рэцэнзіі.

Юрый Гардзееў, рэдактар часопіса "Гарадзенскі гадавік"
Юрый Гардзееў, рэдактар “Гарадзенскага гадавіка”

Як кажа Юрый Гардзееў, ужо ёсць задукі для наступнага нумара. Меркавана, ён выйдзе праз год. Рэдактар кажа, што гэты навуковы часопіс ад пачатку хацелі зрабіць зразумелым і для не спецыялістаў. Тым больш, што гістарычных выданняў у Гродне не так шмат. Акрамя “Гарадзенскага гадавіка” можна назваць “Веснік ГрДУ” і альманах “Горад святога Губерта”, які некалькі гадоў не выходзіць.

– Мы з самага пачатку вырашылі, што трэба пісаць навуковыя тэксты, але так, каб яны былі напісаны папулярнай мовай. Хаця не заўсёды можна напісаць навуковы тэкст простай мовай. Але мы старемся, каб зразумелі не толькі навукоўцы, але і тыя, хто не займаецца гісторыяй, – кажа Юрый.

Набыць нумар можна ў Цэнтры гарадскога жыцця на Кірава, 3. Наклад невялікі – варта паспяшацца!

Калі вы знайшлі ў тэксце памылку або абдрукоўку, калі ласка, паведаміце нам, выбраўшы адпаведны фрагмент і націснуўшы клавішы Ctrl+Enter.

Перадрук матэрыялаў Hrodna.life магчымы толькі з пісьмовага дазволу рэдакцыі. Звяртайцеся info@hrodna.life

Каментары

Spelling error report

The following text will be sent to our editors: